SRH vs KKR IPL 2024 Final: ఐపీఎల్ 17 సీజన్‌లో కోల్కతా నైట్‌రైడర్స్ ఛాంపియన్‌గా నిలిచింది. చెన్నై చెపాక్ వేదికగా సన్రైజర్స్ హైదరాబాద్‌తో ఆదివారం జరిగిన ఫైనల్ మ్యాచ్లో కేకేఆర్ 8 వికెట్ల తేడాతో ఘన విజయం సాధించింది. ఈ మ్యాచ్లో సన్రైజర్స్ నిర్దేశించిన 114 పరుగుల స్వల్ప లక్ష్యాన్ని కోల్కతా 10.3 ఓవర్లలో 2 వికెట్లు కోల్పోయి ఛేదించింది. వెంకటేశ్ అయ్యర్ (52*; 26 బంతుల్లో 4 ఫోర్లు, 3 సిక్స్‌లు) హాఫ్‌ సెంచరీతో చెలరేగిపోయాడు. రెహ్మనుల్లా గుర్బాజ్ (39; 32 బంతుల్లో 5 ఫోర్లు, 2 సిక్స్‌లు) రాణించాడు.
స్వల్ప లక్ష్య ఛేదనలో కేకేఆర్ రెండో ఓవర్లోనే సునీల్ నరైన్ (6 పరుగులు) వికెట్ కోల్పోయింది. దీంతో సన్రైజర్స్ బౌలర్లు ఏదైనా మాయ చేస్తారని ఫ్యాన్స్ ఆశించారు. కానీ, అలాటిందేమీ జరగలేదు. మ్యాచ్ ఏకపక్షంగా సాగింది. వన్డౌన్లో క్రీజులోకి వచ్చిన వెంకటేశ్ బౌండరీలతో విరుచుకుపడ్డాడు. ప్రత్యర్థులకు ఎక్కడా అవకాశం ఇవ్వకుండా రహ్మానుల్లా గుర్బాజ్తో 91 పరుగులు భాగస్వామ్యం నెలకొల్పి కేకేఆర్ను విజయానికి దగ్గర చేశాడు. ఇక 102 పరుగుల వద్ద గుర్భాజ్ ఔటైనా, అప్పటికే జరగాల్సిన నష్టం జరిగిపోయింది. కెప్టెన్ శ్రేయస్ అయ్యర్ (6*) మిగతా పని పూర్తి చేసి కేకేఆర్కు మూడో ఐపీఎల్ టైటిల్ అందించాడు. ప్యాట్ కమిన్స్, షహబాజ్ అహ్మద్ తలో వికెట్ పడగొట్టారు.
చేతులెత్తేసిన హైదరాబాద్
అంతకుముందు టాస్ గెలిచి బ్యాటింగ్కు దిగిన హైదరాబాద్ కోల్కతా బౌలర్లు ముందు చేతులెత్తేసింది. దీంతో 18.3 ఓవర్లలో సన్రైజర్స్ 113 పరుగులకే ఆలౌటైంది. టాప్‌ స్కోరర్‌గా నిలిచిన పాట్ కమిన్స్ (24) చివరి వికెట్‌గా వెనుదిరిగాడు. టాప్‌-3 బ్యాటర్లు అభిషేక్ శర్మ (2), ట్రావిస్ హెడ్ (0), రాహుల్ త్రిపాఠి (9) సింగిల్ డిజిట్ స్కోరుకే పరిమితమయ్యారు. మార్‌క్రమ్ (20), నితీశ్‌ రెడ్డి (13), క్లాసెన్ (16) పరుగులు చేశారు. కోల్కతా బౌలర్లలో ఆండ్రీ రస్సెల్ 3, మిచెల్ స్టార్క్ 2, హర్షిత్ రాణా 2, వైభవ్ అరోరా, నరైన్, వరుణ్‌ చక్రవర్తి తలో వికెట్ తీశారు.
మూడోసారి ఐపీఎల్ టైటిల్ ముద్దాడిన కోల్కతా- హైదరాబాద్కు ఘోర పరాజయం - IPL 2024
ఐపీఎల్ 'ఫైనల్'- రైజర్స్ Vs రైడర్స్- మ్యాచ్ జరగకపోతే పరిస్థితేంటి? - IPL 2024
