RCB vs DC WPL 2024: 2024 డబ్ల్యూపీఎల్ (Women's Premier League) పురుషుల ఐపీఎల్ (Indian Premier League)కు ఏ మాత్రం తీసిపోదని గురువారం ఆర్సీబీ- దిల్లీ మ్యాచ్ ప్రూవ్ చేసింది. రెండు జట్లు చిన్నస్వామి స్టేడియంలో పరుగుల వరద పారించాయి. ఈ మ్యాచ్లో 363 పరుగులు నమోదయ్యాయంటే ఫైట్ ఎలా సాగిందో అర్థం చేసుకోవచ్చు. ఈ హై స్కోరింగ్ మ్యాచ్ స్టేడియంలోని ప్రేక్షకులతోపాటు లైవ్లో చూసిన ఆడియెన్స్కు సైతం ఫుల్ మజానిచ్చింది.
టీమ్ఇండియా బ్యాటర్లు షఫాలీ వర్మ, స్మృతి మంధాన తుపాన్ ఇన్నింగ్స్తో రెచ్చిపోయారు. తొలి ఇన్నింగ్స్లో బౌండరీలతో షఫాలీ కదంతొక్కగా, ఛేజింగ్లో స్మృతి ఆకాశమే హద్దుగా చెలరేగిపోయింది. దీంతో మ్యాచ్ ఫలితం ఏమైనప్పటికీ టీమ్ఇండియా బ్యాటర్ల ఇన్నింగ్స్క్రికెట్ లవర్స్కు మస్త్ కిక్కిచ్చింది. ఇక తొలి ఇన్నింగ్స్లో ఆర్సీబీ ప్లేయర్ జార్జియా వేర్హమ్ ఫీల్డింగ్ విన్యాసం మ్యాచ్కై హైలైట్గా నిలిచింది.
దిల్లీ ఇన్నింగ్స్లో నడిన్ డి క్లెర్క్ 11వ ఓవర్ బౌలింగ్ చేసింది. ఈ ఓవర్ రెండో బంతిని షఫాలీ భారీ షాట్ ఆడింది. దీంతో బంతి స్టాండ్స్ దిశగా దూసుకెళ్లింది. అక్కడే ఫీల్డింగ్ చేస్తున్న వేర్హమ్ అమాంతం గాల్లోకి ఎగిరి బంతిని మైదానంలోకి విసిరేసింది. అంతే ఒక్కసారిగా అంతా షాక్కు గురయ్యారు. వేర్హమ్ ఫీల్డింగ్ విన్యాసం చూసిన నెటిజన్లు కూడా సూపర్ ఉమన్ అంటూ కామెంట్స్ చేస్తున్నారు.
రెండో ఇన్నింగ్స్లో విజయం దిశగా సాగుతున్న ఆర్బీసీని, దిల్లీ బౌలర్లు మరిజాన్ కాప్, జెస్ జొనసెన్ అద్భుతంగా అడ్డుకున్నారు. అప్పటిదాకా ఆర్సీబీ వైపు ఉన్న మ్యాచ్ను వరుస వికెట్లతో తమవైపు తిప్పుకున్నారు. ఇలా బ్యాటింగ్, బౌలింగ్, ఫీల్డింగ్ విన్యాసాలు, బంతి బంతికి మారే సమీకరణాలు అన్నీ కూడా పరుషుల ఐపీఎల్ను తలపించిందీ మ్యాచ్. ఇదే సీజన్ తొలి రెండు మ్యాచ్లు సైతం ఆఖరి బంతి వరకు ఉత్కంఠ రేపాయి. దీంతో మహిళల ప్రీమియర్ లీగ్కు కూడా రికార్డ్ స్థాయి వ్యూవర్షిప్ నమోదు అవుతోంది. ఇలా రానున్న సీజన్లలో డబ్ల్యూపీఎల్ కూడా ఐపీఎల్ అంతటి క్రేజ్ సంపాదిస్తుందనడంలో ఎలాంటి సందేహం లేదని క్రికెట్ లవర్స్ అభిప్రాయపడుతున్నారు.
హై స్కోరింగ్ మ్యాచ్లో దిల్లీ థ్రిల్లింగ్ విన్- స్మృతి పోరాటం వృథా
