MI vs DC IPL 2024: వాంఖడే స్టేడియంలో ముంబయి ఇండియన్స్ ఆకాశమే హద్దుగా చెలరేగిపోయింది. టాస్ ఓడి బ్యాటింగ్కు దిగిన ముంబయి నిర్ణీత 20 ఓవర్లలో 5 వికెట్ల నష్టానికి 234 పరుగుల భారీ స్కోర్ నమోదు చేసింది. ముంబయి బ్యాటర్లు దిల్లీ బౌలర్లపై దండయాత్ర చేశారు. రోహిత్ శర్మ (49 పరుగులు 27 బంతుల్లో ; 6x4, 3x6), ఇషాన్ కిషన్ (42 పరుగులు, 23 బంతుల్లో ; 4x4, 2x6) అదరగొట్టగా, టిమ్ డేవిడ్ (45 పరుగులు, 21 బంతుల్లో; 2x4, 4x6), రొమారియో షెపర్డ్ (39 పరుగులు, 10 బంతుల్లో) దిల్లీ బౌలర్లకు చుక్కలు చూపించారు. వీరిద్దరూ చివరి 30 బంతుల్లో 96 పరుగులు పిండుకున్నారు. దిల్లీ బౌలర్లలో నోకియా 2, అక్షర్ పటేల్ 2, ఖలీల్ అహ్మద్ 1 వికెట్ దక్కించుకున్నారు.
ఈ మ్యాచ్లో నమోదైన రికార్డులు
- ఐపీఎల్ చరిత్రలో ఇది ముంబయి మూడో అత్యధిక (234-5) స్కోర్. ఇక టాప్లో 246-5 (2024లో), 235-9 (2021లో) ఉన్నాయి.
- ఐపీఎల్లో 200+ స్కోర్ సాధించడం ముంబయికి ఇది 24వ సారి. ఈ క్రమంలో ఆర్సీబీ (24)ని ముంబయి సమం చేసింది. ఈ లిస్ట్లో చెన్నై సూపర్ కింగ్స్ (29 సార్లు) అందరికంటే ముందుంది. చెన్నై తర్వాత ముంబయి, ఆర్సీబీదే రెండో ప్లేస్.
- దిల్లీపై ముంబయి 200+ స్కోర్ సాధించడం ఇది ఆరోసారి. ఒకే ప్రత్యర్థిపై అత్యధిక సార్లు 200+ స్కోర్లు సాధించిన జాబితాలో ఆర్సీబీతో కలిసి ముంబయి టాప్లో ఉంది. ఆర్సీబీ కూడా పంజాబ్పై ఆరుసార్లు 200+ స్కోర్లు సాధించింది.
- ఓ టీ20 ఇన్నింగ్స్లో ఒక్క బ్యాటర్ కూడా హాఫ్ సెంచరీ( 50+) సాధించకుండా భారీ ఇంతటి భారీ స్కోర్ (234-5) నమోదు చేయడం ఇదే తొలిసారి. ఇది కూడా ఓ రికార్డే.
ఖాతా తెరవని సూర్య: కొన్ని రోజులుగా గాయం కారణంగా ఆటకు దూరంగా ఉన్న సూర్య కుమార్, ఆదివారం దిల్లీతో 2024 ఐపీఎల్లో తొలి మ్యాచ్ ఆడాడు. భారీ అంచనాలతో బరిలోకి దిగిన సూర్య పరుగుల ఖాతా తెరవకుండానే పెవిలియన్ చేరాడు. అన్రీచ్ నోకియా సూర్యను వెనక్కిపంపాడు. అయితే ముంబయి భారీ స్కోర్ అందుకోవడం వల్ల సూర్య వైఫల్యంపై పెద్దగా ప్రభావం పడలేదు.
ఐపీఎల్లో రోహిత్ మరో ఘనత- దిల్లీపై క్రేజీ రికార్డ్ - Rohit Sharma IPL Record
