Ind vs Eng 4th Test 2024: భారత్- ఇంగ్లాండ్ నాలుగో టెస్టులో తొలి రోజు ఆట ముగిసింది. తొలి రోజు ఆట ముగిసేసరికి ఇంగ్లాండ్ 301-7తో నిలిచింది. జో రూట్ (106) సెంచరీతో అదరగొట్టాడు. ప్రస్తుతం క్రీజులో రూల్ (106), ఒలి రాబిన్సన్ (31) ఉన్నారు. అరంగేట్ర పేసర్ ఆకాశ్ దీప్ 3, సిరాజ్ 2, జడేజా , అశ్విన్ తలో వికెట్ దక్కించుకున్నారు.
టాస్ నెగ్గి బ్యాటింగ్ ఎంచుకున్న ఇంగ్లాండ్ ఈ మ్యాచ్లోనూ దూకుడుగా ఆడే ప్రయత్నం చేసింది. కానీ, పేసర్ ఆకాశ్ దీప్ ప్రత్యర్థి జట్టుకు బ్రేక్స్ వేశాడు. అతడు 9.2 వద్ద ఓపెనర్ బెన్ డకెట్ (11)ను పెవిలియన్ చేర్చి అంతర్జాతీయ కెరీర్లో తొలి వికెట్ ఖాతాలో వేసుకున్నాడు. అదే ఓవర్ నాలుగో బంతికే వన్డౌన్లో వచ్చిన ఒలీ పోప్ (0)ను ఎల్బీడబ్ల్యూగా వెనక్కిపంపాడు. హాఫ్ సెంచరీ దిశగా సాగుతున్న మరో ఓపెనర్ జాక్ క్రాలీ (42)ని కూడా ఆకాశే పెవిలియన్ చేర్చి, ఇంగ్లాండ్ను దెబ్బకొట్టాడు.
దీంతో ఇంగ్లాండ్ 57 పరుగులకే 3 వికెట్లు కోల్పోయి ఆత్మరక్షణలో పడింది. ఈ క్రమంలో రూట్, జాని బెయిర్ స్టో (38)తో కలిసి ఇన్నింగ్స్ను చక్కదిద్దే ప్రయత్నం చేశాడు. కానీ, ఇంగ్లాండ్ స్కోర్ 100 పరుగులు దాటగానే ఈసారి అశ్విన్ బ్రేక్ ఇచ్చాడు. అతడు బెయిర్ స్టోను ఎల్బీడబ్ల్యూగా పెవిలియన్ చేర్చాడు. ఈ తర్వాత వచ్చిన కెప్టెన్ బెన్ స్టోక్స్ (3) కూడా ఎక్కువసేపు క్రీజులో ఉండలేకపోయాడు. జడేజా అతడిని ఔట్ చేశాడు.
అరంగేట్రం అదుర్స్: ఈ మ్యాచ్తో భారత్ యంగ్ ప్లేయర్ 27ఏళ్ల ఆకాశ్ దీప్ అంతర్జాతీయ అరంగేట్రం చేశాడు. బుమ్రాకు మేనేజ్మెంట్ విశ్రాంతి ఇవ్వడం వల్ల ఆకాశ్కు తుది జట్టులో ఛాన్స్ వచ్చింది. డెబ్యూ మ్యాచ్లోనే కీలక మూడు వికెట్లు పడగొట్టి అదరగొట్టాడు. అతడి దెబ్బకు 60 పరుగులలోపే ఇంగ్లాండ్ టాపార్డర్ కుప్పకూలింది. తొలి రోజు 17 ఓవర్లు బౌలింగ్ చేసిన ఆకాశ్ 70 పరుగులిచ్చి 3 వికెట్లు దక్కించుకున్నాడు.
ఎన్నాళ్ల ఎన్నాళ్లకో!: జో రూట్ ఈ సిరీస్లో తొలిసారి తన స్థాయికి తగ్గ ప్రదర్శన చేశాడు. ఈ మ్యాచ్లో బజ్బాల్ వ్యూహాన్ని మర్చిపోయి, పూర్తిగా సంప్రదాయ క్రికెట్ ఆడాడు. ఎలాంటి అనవసర షాట్లకు పోకుండా నిదానంగా ఆడాడు. 219 బంతులు ఆడి అతడు సెంచరీ మార్క్ అందుకున్నాడు. కాగా, టెస్టుల్లో రూట్కు ఇది 31వ శతకం.
టెస్టుల్లో రూట్ రికార్డ్: ఈ మ్యాచ్లో సెంచరీతో రూట్ అరుదైన ఘనత సాధించాడు. టెస్టుల్లో భారత్పై 10 సెంచరీలు బాదిన ఏకైక బ్యాటర్గా నిలిచాడు. రూట్ తర్వాత ఈ లిస్ట్లో ఆస్ట్రేలియా బ్యాటర్ స్టీవ్ స్మిత్ (9), వివ్ విచర్డ్స్ (8), రికీ పాంటింగ్ (8) ఉన్నారు. కాగా, అన్ని ఫార్మాట్లలో కలిపి రూట్కు భారత్పై ఇది 13వ శతకం. ఈ విషయంలో రూట్ కంటే ముందు స్టీవ్ స్మిత్, రికీ పాంటింగ్ చెరో 14 శతకాలతో ముందున్నారు.
భారత్xఇంగ్లాండ్ రాంచీ టెస్టు- సిరీస్పై టీమ్ఇండియా కన్ను- బుమ్రా స్థానంలో ఎవరంటే?
ఫుల్ ఫామ్లో యశస్వి- 500 రన్స్ క్రాస్- ఈ ఏడాది టాప్ స్కోరర్ల లిస్ట్ ఔట్
