Harish Rao Comments on Congress : సీఎం రేవంత్‌రెడ్డి చేసిన వ్యాఖ్యలకు మాజీమంత్రి హరీశ్రావు కౌంటర్ ఇచ్చారు. కేసీఆర్ ఇంటిపై వాలిన కాకి తమ ఇంటిపై వాలొద్దని సీఎం రేవంత్ అంటున్నారని హరీశ్రావు పేర్కొన్నారు. కాంగ్రెస్ నుంచి పోటీ చేస్తున్న చేవెళ్ల అభ్యర్థి రంజిత్ రెడ్డి, సికింద్రాబాద్లో దానం నాగేందర్, మల్కాజిగిరి పట్నం సునీతారెడ్డి, వరంగల్ అభ్యర్థి కడియం కావ్య అంతకముందు బీఆర్ఎస్ పార్టీ వాళ్లు కాదా అని ప్రశ్నించారు. కాకులను వాలనీయను అని సీఎం రేవంత్ గద్దలను ఎత్తుకెళ్లారని మండిపడ్డారు.
ఇవాళ సిద్దిపేట జిల్లాలోని జగదేవపూర్ మండల కేంద్రంలో మెదక్ పార్లమెంట్ అభ్యర్థి వెంకట్రామిరెడ్డికి మద్దతుగా నిర్వహించిన రోడ్ షోలో హరీశ్రావు పాల్గొని ప్రసంగించారు. దిల్లీలో ప్రధాని మోదీకి, ఇక్కడ సీఎం రేవంత్కు మాటలెక్కువ, చేతలు తక్కువని మాజీ మంత్రి ఎద్దేవా చేశారు. ఆరు గ్యారెంటీలతో కాంగ్రెస్ దొడ్డిదారిలో వచ్చి గద్దె ఎక్కిన తరువాత ప్రజలను మోసం చేసిందని ఆరోపించారు. ఆరు గ్యారెంటీలే కాంగ్రెస్ పార్టీకి గడ్డ పారలు అవుతాయన్నారు. ముఖ్యమంత్రి రేవంత్ దేవుని మీద ప్రమాణాలు చేస్తున్నారని, కానీ రాజీనామా చేస్తానని చెప్పడం లేదని విమర్శించారు.
Harish Rao on Raghunandan Rao : కాంగ్రెస్ వచ్చాక కల్యాణ లక్ష్మీ పేరిట తులం బంగారం ఏమోగానీ, లక్ష రూపాయలు కూడా ఇవ్వడంలేదని హరీశ్రావు అన్నారు. ప్రజలు రూ.4 వేల పెన్షన్ వస్తుందని ఆశపడి కాంగ్రెస్ను నమ్మితే రెండు వేల రూపాయలు కూడా రావడం లేదని ఆరోపించారు. బీజేపీకి మాటలు ఎక్కువ మతలబు తక్కువ అని, ఆ పార్టీకి ఓటు వేస్తే ఆగమైపోతారని పేర్కొన్నారు. మెదక్లో పోటీ చేస్తున్న బీజేపీ అభ్యర్థి రఘనందన్రావు, దుబ్బాక ఉప ఎన్నికల్లో ప్రజలకు మాయ మాటలు చెప్పి ఆ ఎన్నికల్లో గెలిచారన్నారు. అసెంబ్లీ ఎన్నికల్లో ప్రజలు ఆయనను తిరస్కరిస్తే 54 వేల ఓట్లతో ఓటమిపాలయ్యారని, మళ్లీ ఏ ముఖం పెట్టుకుని ప్రజల ముందుకు వస్తున్నారని విమర్శించారు.
తనను మెదక్ ఎంపీగా గెలిపిస్తే ప్రజలకు సేవకుడిగా పని చేస్తానని బీఆర్ఎస్ అభ్యర్థి వెంకట్రామిరెడ్డి తెలిపారు. తన పేరు మీద ట్రస్టును ఏర్పాటు చేసి రూ.100 కోట్లతో పార్లమెంట్ నియోజకవర్గ ప్రజలకు సేవ చేస్తానన్నారు. కలెక్టర్గా పనిచేసినప్పుడు ప్రజల మధ్య ఉన్నానని, తాను కూడా ఈ ప్రాంత అభివృద్ధికి భాగస్వామిని అయ్యానని అన్నారు.
'కేసీఆర్ ఇంటి మీద వాలిన కాకి, మా ఇంటి మీద వాలొద్దని రేవంత్ రెడ్డి మట్లాడారు. మాటలు ముద్దుగా చెబుతావు చేసే చేష్టలు సక్కగా లేవు. ఆయన ఇంటి మీద వాలిన కాకి మీ ఇంటిమీద వాలనీయను అని అన్నావు కాదా. మరే చేవెళ్ల అభ్యర్థి ఎవరు? మల్కాజిగిరి సునీతారెడ్డి ఎవరు? వరంగల్ అభ్యర్థ కడియం కావ్య ఎవరు?'- హరీశ్రావు, మాజీ మంత్రి
