ఏపీ సీఎంవోకు చేరిన చిలకలూరిపేట రూ.6.5 కోట్ల పంచాయితీ - జగన్​కు ఆధారాలు అందజేత

Mallela Rajesh met CM YS Jagan : ఏపీలోని పల్నాడు జిల్లా చిలకలూరిపేట వైఎస్సార్సీపీలో అంతర్గత విభేదాలు భగ్గుమంటున్నాయి. మంత్రి విడుదల రజిని, మల్లెల రాజేశ్ మధ్య రాజుకున్న వివాదం చివరికి సీఎంవోకు చేరింది. మంత్రి విడదల రజని డబ్బు వసూలు చేసిన వ్యవహారంపై సీఎం జగన్​కు ఫిర్యాదు చేసిన రాజేశ్,​ అందుకు సంబంధించి ఆధారాలు కూడా అందించినట్లు తెలిసింది.

Mallela Rajesh met CM YS Jagan : ఆంధ్రప్రదేశ్​లోని పల్నాడు జిల్లా చిలకలూరిపేట వైసీపీ పంచాయితీ తాడేపల్లికి చేరింది. సీఎంవో నుంచి పిలుపు రావడంతో చిలకలూరిపేట వైసీపీ నేత మల్లెల రాజేశ్​ నాయుడు సీఎం వైఎస్ జగన్​ను కలిశారు. చిలకలూరిపేట స్థానిక ఎమ్మెల్యే విడుదల రజినికి గుంటూరు వెస్ట్ టికెట్​ను పార్టీ అధిష్ఠానం ఖరారు చేసింది. నూతన ఇన్​ఛార్జిగా మల్లెల రాజేశ్​ నాయుడును నియమించి, ఆ తర్వాత కొద్దిరోజులకే బాధ్యతల నుంచి తప్పించింది. ఇటీవలే చిలకలూరిపేట అసెంబ్లీ అభ్యర్థిగా కావటి మనోహర్ నాయుడును నియమించింది. ఈ క్రమంలో మల్లెల రాజేశ్​ పార్టీలో తనకు జరిగిన అన్యాయంపై అధిష్ఠానంపై విమర్శలు గుప్పించారు. పైగా తాను రూ.6.5 కోట్లు రజినీకి ఇచ్చానని బహిరంగంగా ప్రకటించారు. ఈ విషయంలో సజ్జల జోక్యం చేసుకుని రూ.3 కోట్లు తిరిగి ఇప్పించారని తెలిపారు.

'సజ్జలను మార్చండి - పార్టీని బతికించండి - రూ. 6.5 కోట్లు తీసుకున్నారు'

ఎమ్మెల్యే సీటు కోసం మంత్రి విడదల రజినికి రూ.6 కోట్లు ఇచ్చినట్లు మల్లెల రాజేశ్​ బహిరంగంగా ఆరోపణలు చేశారు. పార్టీ ప్రధాన కార్యదర్శి సజ్జలకు ఫిర్యాదు చేస్తే రూ.3 కోట్లు తిరిగి ఇచ్చారని తెలిపారు. మిగిలిన డబ్బు ఇవ్వాలని మంత్రి రజినిని కోరితే, దిక్కున్నచోట చెప్పుకోమన్నారని రాజేశ్​ ఆరోపించారు. మల్లెల రాజేశ్​ ఆరోపణలు సంచలనం రేకెత్తించడంతో ఈ వ్యవహారంపై సీఎం జగన్ దృష్టి పెట్టారు. మల్లెల రాజేశ్​ను సీఎంవోకు పిలిపించి సజ్జల రామకృష్ణారెడ్డి (Sajjala Ramakrishna Reddy) మాట్లాడారు. అనంతరం సీఎంతో సమావేశమైన మల్లెల రాజేశ్​, మంత్రి విడదల రజిని డబ్బు వసూలు చేసిన వ్యవహారంపై జగన్​కు ఫిర్యాదు చేశారు. దీనికి సంబంధించి సీఎంకు ఆధారాలు కూడా అందించినట్లు తెలిసింది. పంచాయితీ దృష్ట్యా నరసారావుపేట ఎంపీ అభ్యర్థి అనిల్ కుమార్ యాదవ్ సైతం సీఎంవోకు చేరుకున్నారు.

మంత్రి రజిని తనకు ఇంకా రూ.3 కోట్లు ఇవ్వాల్సి ఉందని కార్యకర్తల సమావేశంలో రాజేశ్​ వాపోయారు. సజ్జల జోక్యంతో కేవలం రూ.3 కోట్లు మాత్రమే తిరిగి ఇచ్చారని, మిగతా డబ్బులు ఇవ్వకుండా మంత్రి రజిని తనను మోసం చేసిందని ఆగ్రహం వ్యక్తం చేశారు. ఈ సందర్భంగా పలువురు కార్యకర్తలు స్పందిస్తూ సజ్జలను మార్చాలని, పార్టీని బతికించాలని నినాదాలు చేశారు. బయటి వారికి టికెట్ ఇస్తే ఊరుకోబోమని అధిష్ఠానాన్ని హెచ్చరించిన రాజేశ్​,​ మర్రి రాజశేఖర్​కు టికెట్ ఇస్తే రూ.20 కోట్లు ఖర్చు పెట్టుకుంటానని అన్నారు. స్థానికుడికి మాత్రమే టికెట్ ఇవ్వాలని కార్యకర్తలు సైతం డిమాండ్ చేశారు. కాదని వేరే వ్యక్తికి టికెట్ ఇస్తే, దగ్గరుండి మరీ ఓడిస్తామని హెచ్చరించారు. మరి ఈ వివాదానికి సీఎం జగన్​ ఏ విధంగా చెక్​ పెడతారో వేచి చూడాలి.