'మాదే అతిపెద్ద పార్టీ'- సంకీర్ణ ప్రభుత్వ ఏర్పాటుకు పిలుపునిచ్చిన నవాజ్ షరీఫ్!

Pakistan Election Results 2024 : పాకిస్థాన్‌ సార్వత్రిక ఎన్నికల ఫలితాల్లో మాజీ ప్రధాని ఇమ్రాన్‌ ఖాన్‌ 'పాకిస్థాన్‌ తెహ్రీక్‌-ఇ-ఇన్సాఫ్‌' పార్టీకి మద్దతున్న స్వతంత్ర అభ్యర్థులు ముందంజలో ఉన్నారని సమాచారం. ఇప్పటివరకు వారు 61 స్థానాల్లో గెలుపొందినట్లు స్థానిక మీడియాలో వార్తలు వెలువడుతున్నాయి. ఇక మాజీ ప్రధాని నవాజ్‌ షరీఫ్‌ నేతృత్వంలోని 'పీఎంఎల్‌-ఎన్‌' పార్టీకి 43 సీట్లు, అలాగే 'పీపీపీ' పార్టీకి 34 సీట్లు దక్కినట్లు వెల్లడించింది. అయితే ప్రభుత్వాన్ని ఏర్పాటు చేసేందుకు కనీసం 135 సీట్లలో గెలుపొందాల్సి ఉంది. ఈ నేపథ్యంలో ఓ వైపు ఓట్ల లెక్కింపు కొనసాగుతుండగానే 'పీఎంఎల్-ఎన్' పాకిస్థాన్‌లోనే అతిపెద్ద పార్టీగా అవతరించిందంటూ నవాజ్‌ షరీఫ్‌ ప్రకటించడం గమనార్హం.

వారికి నవాజ్‌ పిలుపు!
మరోవైపు పాకిస్థాన్​లోని ఇతర పార్టీలతో కలిసి సంకీర్ణ ప్రభుత్వాన్ని ఏర్పాటు చేసేందుకు నవాజ్‌ షరీఫ్‌ ప్లాన్ చేస్తున్నారు. ఈ నేపథ్యంలో శుక్రవారం ఆయన మీడియాతో మాట్లాడారు. ఇప్పటి ఎన్నికల ఫలితాలను గౌరవిస్తున్నానని చెప్పిన ఆయన, దేశ పునర్నిర్మాణం దిశగా సుస్థిర ప్రభుత్వాన్ని ఏర్పాటు చేసేందుకు ఇతర పార్టీలు తమతో చేతులు కలపాలంటూ ఆయన ఈ మేరకు పిలుపునిచ్చారు. సంక్షోభ పరిస్థితుల నుంచి దేశాన్ని బయటకు తీసుకువచ్చే విషయంలో అన్ని సంస్థలు కలిసి సానుకూల పాత్ర పోషించాలని షరీఫ్​ కోరారు. సంకీర్ణ ప్రభుత్వాన్ని ఏర్పాటు చేసేందుకు పీపీపీ, జేయూఐ-ఎఫ్‌, ఎంక్యూఎం-పీతో పాటు తదితర పార్టీలతో సంప్రదింపులు జరపాలంటూ తన సోదరుడు షెహబాజ్‌కు ఆయన సూచించినట్లు తెలిపారు.

ఇమ్రాన్‌ 'అభ్యర్థుల' హవా?
ప్రస్తుతం పాకిస్థాన్‌లో 265 స్థానాలకు గురువారం ఎన్నికలు నిర్వహించగా, అందులో భాగంగా ఇప్పుడు ఓట్ల లెక్కింపు ప్రక్రియ కొనసాగుతోంది. అయితే ఇక్కడి జాతీయ అసెంబ్లీలో మొత్తం 336 సీట్లు ఉన్నాయి. ఇందులో 266 స్థానాలకు డైరెక్ట్​గా ఎలక్షన్స్​ జరుగుతాయి. మిగతా 70 స్థానాలను మైనారిటీలకు, మహిళలకు కేటాయిస్తారు. ఓ స్థానంలో అభ్యర్థి మరణించడం వల్ల 265 సీట్లకే ఎన్నికలు నిర్వహించారు. ఇక జైల్​లో ఉన్న ఇమ్రాన్‌ ఖాన్‌పై ఎన్నికల్లో పోటీ చేయకుండా నిషేధం ఉన్న విషయం తెలిసిందే. ఆయన పార్టీ పీటీఐ అధికారిక చిహ్నం క్రికెట్‌ బ్యాట్‌ను ఎన్నికల్లో ఉపయోగించుకునేందుకు కూడా అనుమతిని నిరాకరించారు. దీంతో ఆ పార్టీ అభ్యర్థులు స్వతంత్రంగానే బరిలోకి దిగారు.

ఇమ్రాన్ ఖాన్​ 'బౌన్స్​ బ్యాక్'- అంచనాలు తారుమారు- విజయం దిశగా పాక్ మాజీ ప్రధాని!