How To Vote Without Voter ID Card : దేశంలో సార్వత్రిక ఎన్నికల నగారా మోగింది. ఏప్రిల్ 19 నుంచి ఎన్నికల సమరం మొదలు కానుంది. మొత్తం ఏడు విడతల్లో ఈ ఎన్నికల నిర్వహించనున్నట్లు కేంద్ర ఎన్నికల సంఘం ఇప్పటికే ప్రకటించింది. అయితే, పోలింగ్ రోజు ఓటు వేయడానికి వెళ్తూ ఓటర్ ఐడీ కార్డు కనిపించడంలేదు! ఇప్పుడు ఎలా ఓటు వేయాలని చాలా మంది టెన్షన్ పడుతుంటారు. అయితే అలాంటి టెన్షన్ అవసరం లేదంటోంది కేంద్ర ఎన్నికల సంఘం. ఓటరు ఐడీ లేకున్నా మీరు హ్యాపీగా ఓటు వేయోచ్చని చెబుతోంది. తాజాగా ఈ విషయాన్ని ఓటర్లకు గుర్తు చేస్తూ సోషల్ మీడియా ప్లాట్ఫామ్ ఎక్స్లో ఎన్నికల సంఘం పోస్టు పెట్టింది.
ఓటు వేసేందుకు ఓటరు ఐడీ కార్డు తప్పనిసరిగా ఉండాలా? లేనివారు ఏం చేయాలి? ఇలాంటి ప్రశ్నలకు ఎన్నికల సంఘం ఇప్పటికే స్పష్టత ఇచ్చింది. ఓటరు జాబితాలో పేరున్న వారంతా ఓటరు ఐడీ అందుబాటులో లేకున్నా, ఓటు వేయవచ్చని ఈసీ స్పష్టం చేసింది. ఓటు వేయడానికి ముందు పోలింగ్ కేంద్రంలో ఓటరు గుర్తింపు కార్డులను చూపించాల్సి ఉంటుంది. లేదంటే ఈ కింద తెలిపిన 12 ప్రత్యామ్నాయ ఫొటో గుర్తింపు కార్డుల్లో ఏదైనా ఒకటి చూపించి ఓటు వేయవచ్చు. అవేంటంటే?
ఓటరు ఐడీ లేనివారు ఈ కార్డులను చూపించవచ్చు:
1. ఆధార్ కార్డు
2. డ్రైవింగ్ లైసెన్స్
3. పాన్ కార్డు
4. ఉపాధి హామీ కార్డు
5. పాస్ పోర్టు
6. బ్యాంక్ లేదా పోస్టాఫీస్ జారీ చేసిన ఫొటోతో కూడిన పాస్ బుక్
7. కార్మిక శాఖ మంజూరు చేసిన హెల్త్ ఇన్సూరెన్స్ కార్డు
8. ఎన్పీఆర్ స్మార్ట్ కార్డ్
9. ఫొటోతో కూడిన పెన్షన్ డాక్యుమెంట్
10. కేంద్ర, రాష్ట్ర ప్రభుత్వాలు ఉద్యోగులకు జారీ చేసిన సర్వీస్ ఐడీ కార్డులు
11. ఎంపీలు, ఎమ్మెల్యేలు, ఎమ్మెల్సీల అధికార గుర్తింపు కార్డులు
12. దివ్యాంగులకు జారీచేసిన ఐడీ కార్డుల్లో ఏదొకటి చూపించి ఓటు హక్కును వినియోగించుకోవచ్చు
ఇక ప్రవాసాంధ్రులు ఒరిజినల్ పాస్ పోర్టును పోలింగ్ సిబ్బందికి చూపించి ఓటును వినియోగించుకోవాలి.
ఓటరు జాబితాలో పేరు ఉందో లేదో తెలుసుకోవడం ఎలా?
ఒకవేళ ఓటర్ లిస్ట్లో మీ పేరు ఉందో లేదో తెలుసుకోవాలంటే https://electoralsearch.eci.gov.in వెబ్సైట్లోకి వెళ్లి మీ వివరాలను ఎంటర్ చేసి చెక్ చేసుకోవచ్చు. ఒకవేళ మీ దగ్గర ఫిజికల్ ఓటరు ఐడీ కార్డు లేకపోయినా కంగారు పడాల్సిన అవసరం లేదు. ఇలాంటి వారి కోసం ఎన్నికల సంఘం మరో ఆప్షన్తో భరోసా కల్పించింది. EC e-EPIC ద్వారా పౌరులు తమ ఓటరు ఐడీ కార్డు డిజిటల్ కాపీ పీడీఎఫ్తో డౌన్లోడ్ చేసుకోవచ్చు. మీరు దానిని డిజిలాకర్కు అప్లోడ్ కూడా చేసుకోవచ్చు. https://voters.eci.gov.in/login వెబ్ సైట్కు వెళ్లి ఓటరు కార్డు డిజిటల్ కాపీని ప్రింట్ తీసుకుని పోలింగ్ బూత్కు వెళ్లవచ్చు.
