பொறியியல், பாலிடெக்னிக் கல்லூரிகளில் பயிலும் மாணவர்கள் வெறும் புத்தகத்தை மட்டும் புரட்டினால் மதிப்பெண்களை மட்டுமே பெற முடியும். ஆனால் அதிலிருந்து மாறுபட்ட சில மாணவர்களுக்கு தனித்திறமையுடன் இருப்பதோடு, அவ்வப்போது புதிய கண்டுபிடிப்புகளை செய்து அனைவரையும் ஆச்சரியத்தில் ஆழ்த்துவதுண்டு. அந்த வகையில் ஆந்திர மாநிலம் கிழக்கு கோதாவரி மாவட்டத்தைச் சேர்ந்த பாலிடெக்னிக் மாணவர் திருமலாநேதி சாய் என்பவர் செல்ஃபோன் சார்ஜ் செய்ய புதிய வழிமுறையை கண்டறிந்துள்ளார்.
துணி நகரத்தைச் சேர்ந்த சாய், தற்போது முதலாமாண்டு பாலிடெக்னிக் பயின்று வருகிறார். இவர் தனது சிறுவயதிலிருந்தே சிறு சிறு தொழில்நுட்பங்களை கண்டுபிடிப்பதை வழக்கமாக கொண்டிருக்கிறார். தற்போது, அவர் தண்ணீர் பைப்பில் செல்போனுக்கு சார்ஜ் செய்யும் முறையை கண்டறிந்துள்ளார். அவர் பழைய பிளாஸ்டிக், 5 வாட்ஸ் பேட்டரி, யுஎஸ்பி கேபிள், எல்இடி பல்ப், இரண்டு சுவிட்ச் உள்ளிட்டவற்றை பயன்படுத்தி இந்த புதிய கருவியை சாய் உருவாக்கியுள்ளார்.
மேலும் அந்த கருவியின் உள்ளே சிறிய அளவிலான மோட்டாரை வைத்திருக்கும் அவர் அதனை வீட்டிலிருக்கும் பைப்பில் மாட்டுகிறார். அப்போது அந்த கருவியின் உள்ளே இருக்கும் மோட்டார் சுற்றுவதால் வெளிப்படும் சக்தியானது பேட்டரியில் சேமிக்கப்படுகிறது. பின்னர் அந்த கருவியோடு இணைக்கப்பட்டிருக்கும் யுஎஸ்பி கேபிள் மூலமாக செல்போன் சார்ஜ் செய்யப்படுகிறது. இந்த கருவியில் பொருத்தப்பட்டிருக்கும் எல்இடி விளக்கு மின்சாரம் இல்லாத இரவு சமயங்களில் விளக்காகவும் பயன்படுத்திக்கொள்ளலாம் என்கிறார் சாய்.
வீட்டிலிருக்கும் குழாய்களை திறந்து விட்டுச் செல்லும் பொறுப்பில்லாத இளைஞர்கள் வாழும் இந்தக் காலத்தில் அந்த குழாயைக் கொண்டு மின்சாரம் தயாரித்து செல்ஃபோனுக்கு சார்ஜ் செய்கிறார் இந்த இளம் விஞ்ஞானி.
