ଖଣିଜ ପାଣ୍ଠିର ସଠିକ ବିନିଯୋଗ ନେଇ ବୈଠକ, ଅଧାପନ୍ତରିଆ କାର୍ଯ୍ୟକୁ ଶୀଘ୍ର ଶେଷ କରିବାକୁ ନିର୍ଦ୍ଦେଶ

ଝାରସୁଗୁଡ଼ା: ଜିଲ୍ଲାର DRDA କନଫରେନ୍ସ ହଲ ଠାରେ ଜିଲ୍ଲା ଖଣିଜ ପାଣ୍ଠିର ସଠିକ ବିନିଯୋଗ କରିବାକୁ ନେଇ ଏକ ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ଆଗାମୀ ଦିନରେ ଝାରସୁଗୁଡ଼ା ଓ ବ୍ରଜରାଜନଗର ନିର୍ବାଚନ ମଣ୍ଡଳୀରେ ଥିବା ପୋୖରାଞ୍ଚଳ ଓ ପଞ୍ଚାୟତରେ ଯେଉଁ ସବୁ ଉନ୍ନୟନମୂଳକ କାର୍ଯ୍ୟ କରାଯାଉଛି ଓ ଯେଉଁ କାର୍ଯ୍ୟଗୁଡିକ ଅଧପନ୍ତରିଆ ହୋଇ ପଡ଼ିଛି ତାହାକୁ କିଭଳି ତ୍ବରାନ୍ବିତ କରିହେବ ତାହାକୁ ନେଇ ଆଲୋଚନା କରାଯାଇଥିଲା ।

ଏଥିସହ ଜିଲ୍ଲାରେ ରହିଥିବା ବିଭିନ୍ନ ପିକନିକ ସ୍ପଟ୍‌ମାନଙ୍କର ବିକାଶ ଓ ସୌନ୍ଦର୍ଯ୍ୟକରଣ କରିବା ନେଇ ଆଲୋଚନା ହୋଇଥିଲା । ଆଉ ମଧ୍ୟ ରମ୍ଫାଲୁଗା ପିକ୍‌ନିକ୍‌ ସ୍ପଟ୍‌ରେ ଇକୋ ପାର୍କ ନିର୍ମାଣ କରିବା ନେଇ ନିଷ୍ପତି ନିଆଯାଇଥିଲା । ଗ୍ରାମାଞ୍ଚଳ ଓ ସହରାଞ୍ଚଳରେ ରହିଥିବା ପୋଖରୀମାନଙ୍କ ପାଖରେ ସୌନ୍ଦର୍ଯ୍ୟୀକରଣ ନେଇ ପଦକ୍ଷେପ ଗ୍ରହଣ କରିବାକୁ ମଧ୍ୟ ଏହି ବୈଠକରେ ଆଲୋଚନା କରାଯାଇଥିଲା । ଏହି ସମସ୍ତ କାର୍ଯ୍ୟରେ ଜିଲ୍ଲା ଖଣିଜ ପାଣ୍ଠି ବିନିଯୋଗ କରି ଝାରସୁଗୁଡ଼ାର ବିକାଶ କରାଯିବ ।

ଝାରସୁଗୁଡ଼ା ଜିଲ୍ଲାର ତିନିଟି ବ୍ଲକ ଲଇକେର, କିରମିରା ଏବଂ କୋଲାବିରା ବ୍ଲକ ଆଇଟିଡିଏ ମାନ୍ୟତା ପାଇଲା ପରେ ପ୍ରଥମ କରି ଏନେଇ ବୈଠକରେ ଆଲୋଚନା ହୋଇଥିଲା । ଆଇଟିଡିଏ ଅନ୍ତର୍ଭୁକ୍ତ ଏହି ଅଞ୍ଚଳରେ କେଉଁ କେଉଁ ସରକାରୀ ଅଧିକାରୀ ନିୟୋଜିତ ହେବେ ଏବଂ ଅଞ୍ଚଳରେ ରହିଥିବା ବିଭିନ୍ନ ପ୍ରକାର ସମସ୍ୟାର ସମାଧାନ ଯଥାଶୀଘ୍ର କରିବା ପାଇଁ ନିଷ୍ପତି ହୋଇଥିଲା । ତେବେ ଏହି ବୈଠକରେ ବରଗଡ଼ ସାଂସଦ ସୁରେଶ ପୂଜାରୀ, ଝାରସୁଗୁଡା ବିଧାୟିକା ଦୀପାଳି ଦାସ, ଜିଲ୍ଲାପାଳ ଆବୋଲି ସୁନୀଲ ନରଓ୍ବଣେ, ଜିଲ୍ଲା ଆରକ୍ଷୀ ଅଧିକ୍ଷକ ସ୍ମିତ ପରମାର, ଡିଏଫ୍ଓ ମୋନୁ ଭଟ୍ଟ ପ୍ରମୁଖ ଉପସ୍ଥିତ ଥିଲେ ।

ଇଟିଭି ଭାରତ, ଝାରସୁଗୁଡ଼ା