ସୁନ୍ଦରଗଡ଼: ଆସନ୍ତା 9 ତାରିଖରେ ବିଧାନସଭା ଘେରାଉ କରିବା ନେଇ ସୂଚନା ଦେଲା ସୁନ୍ଦରଗଡ ବିଜେପି ଯୁବା ମୋର୍ଚ୍ଚା । କଳାହାଣ୍ଡି ଶିକ୍ଷୟିତ୍ରୀ ମମିତା ମେହେର(Mamita Meher murder case) ହତ୍ୟାକାଣ୍ଡ ଘଟଣାରେ ସିବିଆଇ ତଦନ୍ତ, ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବରଖାସ୍ତ ଓ ଗିରଫ ଦାବି କରି ଏହି ଘେରାଉ କରିବା ପାଇଁ ପ୍ରେସମିଟ କରି ମୋର୍ଚ୍ଚା ସୂଚନା ଦେଇଛି ।
ମମିତା ମେହେର ହତ୍ୟାକାଣ୍ଡରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ସଂପୃକ୍ତି ଥିବା କଥା କହି ଭାଜପା ଯୁବ ମୋର୍ଚ୍ଚା ମମିତାକୁ ନ୍ୟାୟ ଦେବା ଓ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବିରୁଦ୍ଧରେ CBI ତଦନ୍ତ ସହ ତାଙ୍କୁ ବରଖାସ୍ତ ଓ ଗିରଫ କରିବା ଦାବିରେ ଏହି ଘେରାଉ କରିବ ବୋଲି କହିଛି । ତେବେ ସମ୍ବଲପୁର, ଦେବଗଡ଼, ଝାରସୁଗୁଡ଼ା ଓ ସୁନ୍ଦରଗଡ଼ ଜିଲ୍ଲାରୁ ଏ ନେଇ 8 ହଜାରରୁ ଅଧିକ ଯୁବକ ଯୁବତୀ ବିଧାନସଭା ଘେରାଉରେ ଯୋଗ ଦେବେ ।
ଏ ସମ୍ପର୍କରେ ସୁନ୍ଦରଗଡ଼ ଭାଜପା(BJP) ଯୁବ ମୋର୍ଚ୍ଚା ପର୍ଯ୍ୟବେକ୍ଷକ ତଥା ରାଜ୍ୟ କାର୍ଯ୍ୟକାରିଣୀ ସଦସ୍ୟ ବିଭୁଦତ୍ତ ପଣ୍ଡା କହିଛନ୍ତି । ମମିତାଙ୍କୁ ନ୍ୟାୟ ଦେବା ଦାବିରେ ଏମାନେ ଘଟଣା ଜାଣିବା ଦିନ ଠାରୁ ବିଭିନ୍ନ ପର୍ଯ୍ୟାୟରେ ବିକ୍ଷୋଭ ପ୍ରଦର୍ଶନ କରି ସାରିଥିବା ବେଳେ ମୁଖ୍ୟମନ୍ତ୍ରୀ ସଠିକ ପଦକ୍ଷେପ ନେଇନଥିବାରୁ ଏପରି କରିବାକୁ ଯାଉଛନ୍ତି ବୋଲି କହିଛନ୍ତି ।
ସୁନ୍ଦରଗଡ଼ରୁ ହରିହର ଦାସ ମହାପାତ୍ର, ଇଟିଭି ଭାରତ
