ପୁରୀ: ନକଲି ସାର୍ଟିଫିକେଟ ବିକ୍ରି କରିବା ଅଭିଯୋଗରେ ବନ୍ଧା ହେଲେ ଯୁବକ । ପୁରୀ କାକଟପୁର ଥାନା ଅନ୍ତର୍ଗତ ସୋମନାଥପୁର ଅଞ୍ଚଳରୁ ଅଭିଯୁକ୍ତକୁ ଗିରଫ କରାଯାଇଛି । ଅଭିଯୁକ୍ତର ନାମ ଶୁଭ୍ରଜିତ କାଣ୍ଡି ବୋଲି ଜଣାପଡିଛି ।
ସୂଚନାଯୋଗ୍ୟ, ଶୁଭ୍ରଜିତ ବେଆଇନ ଭାବେ ଉଚ୍ଚଶିକ୍ଷା ସାର୍ଟିଫିକେଟ ପ୍ରସ୍ତୁତ କରି ବିକ୍ରି କରୁଥିଲା । ଏପରିକି ସେ ତହସିଲଦାରଙ୍କ ଦସ୍ତଖତ ଜାଲିଆତି କରି 3ଟି ଜାଲି ସାର୍ଟିଫିକେଟ ପ୍ରସ୍ତୁତ କରିଥିବା ଅଭିଯୋଗ ହୋଇଥିଲା । ଏନେଇ କାକଟପୁର ଥାନା ପୋଲିସର ତଦନ୍ତ ପରେ ଅଭିଯୁକ୍ତ ଯୁବକକୁ ଗିରଫ କରାଯିବା ସହ ଜାଲି ସାର୍ଟିଫିକେଟ ତିଆରି ପାଇଁ ବ୍ୟବହୃତ କମ୍ପ୍ୟୁଟର ସିଷ୍ଟମକୁ ଜବତ କରାଯାଇଛି । ଆଇପିସିର ଦଫା ୪୧୯/୪୨୦/୪୬୭/୪୬୮ ଓ ୪୭୧ରେ ଗିରଫ ପରେ ଅଭିଯୁକ୍ତକୁ କୋର୍ଟଚାଲାଣ କରିଛି ପୋଲିସ । ଏହି ଘଟଣାରେ ଆଉ କିଏ ସମ୍ପୃକ୍ତ ରହିଛନ୍ତି ସେନେଇ ତଦନ୍ତ ଚାଲୁ ରହିଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
