ପୁରୀ: ନିମାପଡା ଆଦର୍ଶ ବିଦ୍ୟାଳୟରେ ପରୀକ୍ଷାର୍ଥୀଙ୍କୁ କପି ସୁବିଧା ଯୋଗାଇବା ପାଇଁ ଅଭିଭାବକ ଓ ସ୍କୁଲ୍ ଶିକ୍ଷକଙ୍କ ମଧ୍ୟରେ ଅଲୋଚୋନାର ଅଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏନେଇ ପୁରୀ ଜିଲ୍ଲା ଶିକ୍ଷା ବିଭାଗ କାର୍ଯ୍ୟନୁଷ୍ଠାନ ନେଇଛି । ସ୍କୁଲର ସମସ୍ତ ଶିକ୍ଷକ ଓ କର୍ମଚାରୀଙ୍କୁ ଆସନ୍ତା ୩୦ ତାରିଖ ମାଟ୍ରିକ ପରୀକ୍ଷା ନସରିବା ଯାଏଁ ସ୍କୁଲକୁ ନଆସିବାକୁ ନିର୍ଦ୍ଦେଶ ଦିଆଯାଇଛି ।
ଘଟଣାକୁ ନେଇ ତଦନ୍ତ ଆରମ୍ଭ ହୋଇଛି । ପୁରୀ ଜିଲ୍ଲା ଶିକ୍ଷାଧିକାରୀ ବିଶ୍ବଜିତ ଘୋଷ ଓ ଅତିରିକ୍ତ ଜିଲ୍ଲା ଶିକ୍ଷାଧିକାରୀ ହିମାଂଶୁ ଭୂଷଣ ସମରଥ ରବିବାର ପରୀକ୍ଷା କେନ୍ଦ୍ର ଗସ୍ତ କରିଥିଲେ । ଏହାପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଏହି କେନ୍ଦ୍ରର ପରୀକ୍ଷା ପରିଚାଳକ ଓ ଅଧିକ୍ଷକଙ୍କ ସମେତ ସମସ୍ତ କର୍ମଚାରୀଙ୍କୁ ଆସନ୍ତା ମାର୍ଚ୍ଚ ୩୦ ତାରିଖ ପରୀକ୍ଷା ସମାପ୍ତ ହେବା ପର୍ଯ୍ୟନ୍ତ ବିଦ୍ୟାଳୟ ପରିସରକୁ ପ୍ରବେଶ ନିଷେଧ କରାଯାଇଛି । ତେବେ ମାଟ୍ରିକ ପରୀକ୍ଷା ପରିଚାଳନା ବିଶୃଙ୍ଖଳାକୁ ବରଦାସ୍ତ କରାଯିବ ନାହିଁ ବୋଲି ଜିଲ୍ଲା ଶିକ୍ଷା ଅଧିକାରୀ ଜଣାଇଛନ୍ତି ।
ଏହା ମଧ୍ୟ ପଢ଼ନ୍ତୁ.. Matric Exam: ଗଣଶିକ୍ଷା ମନ୍ତ୍ରୀଙ୍କ ଅଞ୍ଚଳରେ ଖୁଲମଖୁଲା କପି ! ଅଡିଓ ଭାଇରାଲ
ପ୍ରକା ଥାଉକି, ଗଣଶିକ୍ଷା ମନ୍ତ୍ରୀ ସମୀର ଦାଶଙ୍କ ଅଞ୍ଚଳରେ ମାଟ୍ରିକ ପରୀକ୍ଷାରେ ଖୁଲମ୍ ଖୁଲା କପି ଅଭିଯୋଗ ହେଇଥିଲା । ନିମାପଡ଼ା ବ୍ଲକ୍ ହରିପୁର ଆଦର୍ଶ ବିଦ୍ୟାଳୟରେ ପରୀକ୍ଷାର୍ଥୀଙ୍କଠାରୁ ଶିକ୍ଷକମାନେ ଟଙ୍କା ନେଇ କପି କରିବାର ସୁଯୋଗ ଦେଉଥିବା ଅଭିଯୋଗ ଆସିଥିଲା । ଏନେଇ ଏକ ଅଡିଓ କ୍ଲିପ ସୋସିଆଲ ମିଡିଆରେ ଭାଇରାଲ୍ ହେବାପରେ ଚର୍ଚ୍ଚା ଜୋର୍ ଧରିଥିଲା । ଜଣେ ପରୀକ୍ଷାର୍ଥୀଙ୍କ ଅଭିଭାବକ ହରିପୁର ସ୍କୁଲର ଜଣେ ଶିକ୍ଷକଙ୍କ ସହ କପି ସୁବିଧା ନେଇ ମୂଲଚାଲ କରୁଥିବା ଏହି ଅଡିଓରେ ଶୁଣାଯାଉଥିଲା ।
ନିମାପଡ଼ା ବ୍ଲକ ହରିପୁର ଆଦର୍ଶ ବିଦ୍ୟାଳୟରେ ଷ୍ଟେଟ ଇନ୍ଷ୍ଟିଚ୍ୟୁଟ୍ ଅଫ ଓପନ ସ୍କୁଲ ପରୀକ୍ଷାର୍ଥୀଙ୍କ ପାଇଁ ସେଣ୍ଟର୍ ହୋଇଛି । ସେଠାରେ ବୟସ୍କ ପରୀକ୍ଷାର୍ଥୀ ମାନେ ପରୀକ୍ଷା ଦେଉଛନ୍ତି । ୮୫ ଜଣ ପରୀକ୍ଷାର୍ଥୀ ଅଛନ୍ତି । ଏଠାରେ ଏଭଳି ଅଡିଓ ଭାଇରାଲ ହେବାପରେ ମାଟ୍ରିକ ପରୀକ୍ଷାରେ ସ୍ବଚ୍ଛତା ନେଇ ପ୍ରଶ୍ନ ଉଠିଥିଲା । ଗୋଟିଏ ପଟେ ପରୀକ୍ଷା କଡ଼ାକଡ଼ି ପାଇଁ ସବୁ ବ୍ୟବସ୍ଥା ହୋଇଥିବା ଗଣଶିକ୍ଷା ମନ୍ତ୍ରୀ କହୁଥିବା ବେଳେ ଖୋଦ୍ ମନ୍ତ୍ରୀଙ୍କ ଅଞ୍ଚଳରେ ପରୀକ୍ଷା କେନ୍ଦ୍ରରେ କପି ପାଇଁ ମୂଲଚାଲ ହେବା ଘଟଣା ସାଧାରଣରେ ଚର୍ଚ୍ଚାର ବିଷୟ ପାଲଟିଛି ।
ଇଟିଭି ଭାରତ, ପୁରୀ
