ନୟାଗଡ଼: ଗତ ଅଗଷ୍ଟ 31 ତାରିଖରେ ରୋଷେଇ କଲାବେଳେ ଗ୍ୟାସ ଟାଙ୍କି ଫାଟି ଘଟଣାସ୍ଥଳରେ ଜୀବନ୍ତ ଦଗ୍ଧ ହୋଇ ପ୍ରାଣ ହରାଇଥିବା ମହିଳାଙ୍କ ପରିବାରକୁ ସହାୟତା ପ୍ରଦାନ କରିବା ପାଇଁ ଦାବି ହୋଇଛି । ମୃତ ମହିଳାଙ୍କ ଏକ 6 ମାସର ଶିଶୁ ଥିବାବେଳେ ଦୁର୍ଘଟଣା ସମୟରେ ସ୍ତ୍ରୀକୁ ଉଦ୍ଧାର କରିବାକୁ ଯାଇ ସ୍ବାମୀ ମଧ୍ୟ ଗୁରୁତର ହୋଇ ବର୍ତ୍ତମାନ ହସ୍ପିଟାଲରେ ଚିକିତ୍ସାଧୀନ ଅଛନ୍ତି । ସେପଟେ ନିଆଁରେ ସବୁ କିଛି ହରାଇବା ପରେ ମାତ୍ର ଖଣ୍ତେ ପାଲ ଯୋଗାଇ ଦେଇ ନିଜ କାନ୍ଧରୁ ଦାୟିତ୍ବ ଖସାଇ ଦେଇଛି ସ୍ଥାନୀୟ ପ୍ରଶାସନ । ପିତାମାତା ଉଭୟଙ୍କ ଅନୁପସ୍ଥିତି ଓ ଏପରି ଅସହାୟତା ମଧ୍ୟରେ କଅଁଳ ଶିଶୁଟିର ଭବିଷ୍ୟତକୁ ନେଇ ପ୍ରଶ୍ନ ସୃଷ୍ଟି ହୋଇଛି ।
ଘଟଣା ଅନୁସାରେ, ଗତ ଅଗଷ୍ଟ 31 ତାରିଖରେ ନୟାଗଡ ଜିଲ୍ଲା ଖଣ୍ଡପଡା ଥାନା ରାଣୀପଡ଼ା ପଞ୍ଚାୟତ ବିରିଡିହି ଗାଁ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଥିଲା l ଏହି ଗାଁର ମହିଳା ହରପ୍ରିୟା ଜେନା ରନ୍ଧନ ଗ୍ୟାସ ଯୋଗେ ରୋଷେଇ କରୁଥିବାବେଳେ ଅଚାନକ ଗ୍ୟାସ ଟାଙ୍କି ଫାଟିବାରୁ ନିଆଁରେ ପୋଡି ହୋଇ ପ୍ରାଣ ହରାଇଥିଲେ । ମହିଳାଙ୍କ ଦେହରେ ନିଆଁ ଲାଗିଯାଇ ଥିବାବେଳେ ଉଦ୍ଧାର ଉଦ୍ୟମ କରିଥିବା ସ୍ବାମୀ ସିଲୁ ଜେନା ନିଆଁରେ ପୋଡି ଗୁରୁତର ହୋଇଥିଲେ l ଏବେ ବି ସ୍ବାମୀ ସିଲୁ ମେଡିକାଲରେ ଚିକିତ୍ସାଧୀନ ରହିଛନ୍ତି ।
ଅତ୍ୟନ୍ତ ଗରିବ ପରିବାର ହୋଇଥିବାରୁ ସିଲୁଙ୍କ ଚିକିତ୍ସା ଖର୍ଚ୍ଚ ବହନ କରିବା ମଧ୍ୟ ପରିବାର ପକ୍ଷେ ସମ୍ଭବ ହୋଇପାରୁନାହିଁ। ସବୁଠୁ ବଡ଼ କଥା ହେଉଛି ମା’ ହରପ୍ରିୟାଙ୍କ ଅକାଳ ବିୟୋଗ ଓ ବାପା ସିଲୁଙ୍କ ମେଡିକାଲରେ ଭର୍ତ୍ତି ପରେ ସେମାନଙ୍କ ନବଜାତ ଶିଶୁର ଭବିଷ୍ୟତ ନେଇ ମଧ୍ୟ ପ୍ରଶ୍ନ ସୃଷ୍ଟି ହୋଇଛି । ପ୍ରଶାସନ ତରଫରୁ କେବଳ ଜରିପାଲ ଖଣ୍ଡିଏ ଯୋଗାଇ ଦିଆଯାଇଛି l ଘର ପୋଡି ଯାଇଥିବାରୁ ପଡୋଶୀଙ୍କ ଘରେ ଆଶ୍ରୟ ନେଇଛନ୍ତି ପରିବାରର ଅନ୍ୟ ସଦସ୍ୟ l ଏପରି ସମୟରେ ଉକ୍ତ ଅସହାୟ ପରିବାରକୁ ତୁରନ୍ତ ସରକାରୀ ସହାୟତା ଯୋଗାଇଦେବାକୁ ସ୍ଥାନୀୟ ଗ୍ରାମବାସୀ ଦାବି କରିଛନ୍ତି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
