ଖୋର୍ଦ୍ଧା : ହୀରାକୁଦରୁ ନିଷ୍କାସିତ ହେଉଛି ବନ୍ୟାଜଳ । ଫଳରେ ମହାନଦୀ ଏବଂ ତା'ର ଶାଖା ନଦୀମାନଙ୍କରେ ଧୀରେ ଧୀରେ ବନ୍ୟାଜଳ ପ୍ରବାହିତ ହେବାରେ ଲାଗିଲାଣି । ଏହି କ୍ରମରେ ଖୋର୍ଦ୍ଧା ଜିଲ୍ଲା ଜଟଣୀ ବ୍ଲକରେ ମଧ୍ୟ ବନ୍ୟା ପରିସ୍ଥିତି ସୃଷ୍ଟି ହୋଇଛି । ବେଣାପଞ୍ଜରୀ ପଞ୍ଚାୟତର ତିରିମଲଠାରେ ଦୟାନଦୀ ଉପରେ ପାଣ୍ଡିଆବିଲିକୁ ସଂଯୋଗ କରୁଥିବା ଅସ୍ଥାୟୀ ରାସ୍ତା ଧୋଇଯାଇଛି । ତେବେ ଏହି ଘଟଣା ନୂଆ ନୁହେଁ । ପ୍ରତ୍ୟେକ ବର୍ଷ ବର୍ଷା ଦିନେ ଏଭଳି ସ୍ଥିତି ଉପୁଜିଥାଏ ।
ଦୟାନଦୀରେ ଜଳସ୍ତର ବୃଦ୍ଧି ଫଳରେ ବୁଧବାର ଅପରାହ୍ନରେ ସ୍ଥିତି ସଙ୍ଗୀନ ହୋଇଥିବା ଦେଖିବାକୁ ମିଳିଛି । ରାସ୍ତା ଉପରେ ଦେଇ ଚାଲୁଛି ନଦୀ ପାଣି । ସେହିପରି ବିଳମ୍ବିତ ରାତିରେ ଦୟା ନଦୀରେ ଜଳସ୍ତର ବୃଦ୍ଧି ପାଇଁ ଏହି ଅସ୍ଥାୟୀ ରାସ୍ତା ଧୋଇଯାଇଥିବା ଦେଖିବାକୁ ମିଳିଛି । ଏହି ରାସ୍ତା ଉଭୟ ଜଟଣୀ ବ୍ଲକ ଓ ଡେଲାଙ୍ଗ ବ୍ଲକର ଅନେକ ଗାଁକୁ ସଂଯୋଗ କରୁଥିବାରୁ ପ୍ରତ୍ୟେକ ଦିନ ଯାତାୟତ ପାଇଁ ଏହି ରାସ୍ତା ଉପରେ ନିର୍ଭର କରିଥାନ୍ତି ଅଞ୍ଚଳବାସୀ ।
ତେବେ ପ୍ରତି ବର୍ଷ ଦୟା ନଦୀରେ ବନ୍ୟାଜଳ ପ୍ରବାହିତ ହେଉଥିବାବେଳେ ପଣ୍ଡିଆବିଲି ଭଳି ଏକାଧିକ ଗାଁକୁ ଯୋଗାଯୋଗ ବିଛିନ୍ନ ହୋଇଥାଏ । ବର୍ଷକ 4 ମାସ ଏହି ଅସ୍ଥାୟୀ ରାସ୍ତା ଦେଇ ଲୋକମାନେ ଯାତାୟତ କରୁଥିବାବେଳେ ଅନ୍ୟ ସମୟ ଡଙ୍ଗା ଭରଷାରେ ନଦୀ ପାର ହୋଇଥାନ୍ତି ଲୋକେ । ଦୀର୍ଘଦିନ ଧରି ବ୍ରିଜ ନିର୍ମାଣ ପାଇଁ ଦାବି ହୋଇଆସୁଥିଲେ ମଧ୍ୟ ତାହା ଫାଇଲ ତଳେ ଚାପି ହୋଇ ରହୁଛି । ନଦୀ ପାର ହେବାକୁ ପୋଲଟିଏ ନଥିବାରୁ ବିପଦ ଶଙ୍କୁଳ ଅବସ୍ଥାରେ ଲୋକେ ଯାତାୟତ କରୁଛନ୍ତି । ବର୍ଷା ଦିନେ ନଦୀରେ ପ୍ରଚୁର ପାଣି ହେବା ପରେ ଯାତାୟତ ଠପ ହୋଇପଡୁଛି ।
ଏହା ବି ପଢନ୍ତୁ...ଜିଲ୍ଲାର ବିଭିନ୍ନ ନଦୀରେ ବୃଦ୍ଧି ପାଉଛି ଜଳସ୍ତର, ଚିନ୍ତାରେ ନଦୀକୂଳିଆ ବାସିନ୍ଦା
ତେବେ ରାସ୍ତା ଧୋଇ ଯିବା ଫଳରେ ପାଣ୍ଡିଆବିଲିବାସୀଙ୍କୁ ବେଣାପଞ୍ଜରୀ ପଞ୍ଚାୟତକୁ ଯିବା ଅସମ୍ଭବ ହୋଇପଡ଼ିଥାଏ । ଖାଲି ସେତିକି ନୁହେଁ, ପିଲାଙ୍କ ପାଠପଢ଼ାରେ ମଧ୍ୟ ବାଧା ଉପୁଜିଥାଏ । ବର୍ଷା ଦିନେ ନଦୀ ପାର୍ କରି ସ୍କୁଲ କିମ୍ବା କଲେଜକୁ ଯିବା ଛାତ୍ରଛାତ୍ରୀଙ୍କ ପାଇଁ ସମ୍ଭବପର ନଥାଏ । ତେବେ ବର୍ତ୍ତମାନ ଜୋରକଣି, ପାଣ୍ଡିଆବିଲି, ଗଡ଼ବରପୁଟ, ବାରଦା, ତିଗିରିଆ, ବାଦଲପୁର, ବିରିକେଶରପୁର, ବେଅଣ୍ଟା ଆଦି ଗ୍ରାମବାସୀଙ୍କ ପାଇଁ ଏବେ ଯାତାୟାତ ଠପ୍ ହୋଇଯାଇଛି । ଫଳରେ ନାହିଁ ନଥିବା ଅସୁବିଧା ଭୋଗୁଛନ୍ତି ଲୋକେ । ସେପଟେ ଛତିଶଗଡ଼ କଲମା ବ୍ୟାରେଜ ଖୋଲିବା ପରେ ହୀରାକୁଦର ଜଳସ୍ତର ବଢିଛି । ଯାହା ଫଳରେ ପର୍ଯ୍ୟାୟକ୍ରମେ ଖୋଲା ଯାଉଛି ହୀରାକୁଦର ଗେଟ୍ । ତେଣୁ ବିଭିନ୍ନ ନଦୀରେ ଜଳସ୍ତର ବୃଦ୍ଧି ପାଇଥିବା ଦେଖିବାକୁ ମିଳିଛି ।
ଇଟିଭି ଭାରତ, ଖୋର୍ଦ୍ଧା
