ଭୁବନେଶ୍ବର: ସିଙ୍ଗର ସୌରିନ ଭଟ୍ଟଙ୍କ ପରେ ଏବେ ଆଉ ଜଣେ କଣ୍ଠଶିଳ୍ପୀଙ୍କ ନାଁରେ ଆସିଛି ସାଂଘାତିକ ଅଭିଯୋଗ । ଓଲିଉଡର ଲୋକପ୍ରିୟ ସିଙ୍ଗର ଦେବେଶ ପତିଙ୍କ ନାଁରେ ଲଭ, ସେକ୍ସ, ଧୋକାର ଅଭିଯୋଗ ଆଣିଛନ୍ତି ଜଣେ ଯୁବତୀ । ବିବାହର ପ୍ରତିଶ୍ରୁତି ଦେଇ ଯୁବତୀଙ୍କ ସହ ଶାରୀରିକ ସମ୍ପର୍କ ରଖିବା ଓ ଟଙ୍କା ଠକିବା ଅଭିଯୋଗରେ ନୟାପଲ୍ଲୀ ଥାନା ପୋଲିସ ଜଣାଶୁଣା ଓଡ଼ିଆ ସିଙ୍ଗର ଦେବେଶ ପତିଙ୍କୁ ଗିରଫ କରିଛି । ଗତ ବୁଧବାର ଦିନ ପୋଲିସ ତାଙ୍କୁ ଗିରଫ କରିଥିବା ନେଇ ସୂଚନା ମିଳିଛି ।
ନିଶା ଦେଇ ଗର୍ଭନଷ୍ଟ କରିଥିଲେ ଦେବେଶ: ସୂଚନା ଅନୁସାରେ, ଦେବେଶଙ୍କ ଘର ଯାଜପୁର ହୋଇଥିବା ବେଳେ ଅଭିଯୋଗ କରିଥିବା ଯୁବତୀଙ୍କ ଘର ଭଦ୍ରକ । ଏମିତିକି ଦେବେଶ ନିଶା ଦେଇ ଯୁବତୀଙ୍କ ଗର୍ଭ ନଷ୍ଟ କରିଥିବା ମଧ୍ୟ ଅଭିଯୋଗ ହୋଇଛି । ଯୁବତୀ ଜଣଙ୍କ ଦେବେଶଙ୍କ ନାଁରେ ନୟାପଲ୍ଲୀ ଥାନାରେ ଅଭିଯୋଗ କରିଥିଲେ । ଏହାସହ ଟଙ୍କା ଠକେଇ କରିଥିବା ନେଇ ମଧ୍ୟ ଅଭିଯୋଗ ହୋଇଥିଲା । ଅଭିଯୋଗକୁ ଆଧାର କରି ନୟାପଲ୍ଲୀ ଥାନା ପୋଲିସ କେଶ ନମ୍ବର 103/2023ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ତଦନ୍ତ ପରେ ବୁଧବାର ଦିନ ଦେବେଶଙ୍କୁ ଗିରଫ କରି କୋର୍ଟଚାଲାଣ କରିଛି । ତେବେ ଜାମିନ ନାମଞ୍ଜୁର ହେବାରୁ ତାଙ୍କୁ ବିଭାଗୀୟ ହାଜତକୁ ପଠାଇ ଦିଆଯାଇଥିବା ଜଣାପଡିଛି ।
ଦେବେଶଙ୍କ ସଙ୍ଗୀତ: ଲଛକ ମଣି ବେବି ଲୋ, ବୁଲେଟ ଗାଡିରେ ବୁଲେଇ ନେବି ଗୀତରୁ ବେଶ ଲୋକପ୍ରିୟ ହୋଇଥିଲେ ଦେବେଶ । ଏହାସହ ଚାଲିରେ ତୋର ପଦ୍ମ ଫୁଟେ, କହୁଛି ମୋ ମଥା ସିନ୍ଦୁର, ଶେହଜାଦୀ, ଦିଓ୍ବାନା, ଆଖି ତୋର ନୀଳ ସାଗର ଭଳି ଅନେକ ସୁପରହିଟ୍ ଗୀତରେ ସେ କଣ୍ଠଦାନ କରିଛନ୍ତି ।
କହିରଖୁଛୁ କି, ଦେବେଶଙ୍କ ପୂର୍ବରୁ ମଧ୍ୟ ଲଭ ସେକ୍ସ ଧୋକା ନେଇ ସୌରିନ ଭଟ୍ଟଙ୍କ ନାଁରେ ଅଭିଯୋଗ ହୋଇଥିଲା । ଏକ ଷ୍ଟେଜରେ ଗୀତ ଗାଇବା ସମୟରେ ଯୁବତୀଙ୍କ ସହିତ ସୌରିନଙ୍କ କୁଆଡେ ସମ୍ପର୍କ ସ୍ଥାପନ ହୋଇଥିଲା । ଉଭୟଙ୍କ ମଧ୍ୟରେ ଏତେ ଘନିଷ୍ଠତା ବଢି ଯାଇଥିଲା ଯେ ଉଭୟ ପରସ୍ପରକୁ ବିବାହ କରିବାକୁ ରାଜି ହୋଇଥିଲେ । ସୌରିନ ବିବାହ କରିବାକୁ କହି ଯୁବତୀଙ୍କ ଠାରୁ ୯ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଏନେଇ ସମସ୍ତ କାରବାର ପ୍ରମାଣ ଥାନାରେ ଦାଖଲ କରିଥିଲେ ପୀଡ଼ିତା । ଯୁବତୀ ଜଣକ କଟକ ଜଗତପୁର ଥାନାରେ ଏତଲା ଦେବା ପାଇଁ ଯାଇଥିଲେ ମାତ୍ର ଜଗତପୁର ଥାନା ପୋଲିସ ମହିଳା ଥାନାରେ ମାମଲା ରୁଜୁ କରିବାକୁ ପରାମର୍ଶ ଦେଇଥିଲା । ବର୍ତ୍ତମାନ ମାମଲାର ତଦନ୍ତ ଜାରି ରହିଥିବା ବେଳେ ପୋଲିସ NBW ପାଇଁ କୋର୍ଟରେ ଆବେଦନ କରିବ ବୋଲି ଜଣାପଡିଛି ।
ଇଟିଭି ଭାରତ, ଭୁବନେଶ୍ବର
