ଭୁବନେଶ୍ବର: ମହାନଦୀ ଆମର ଏକ ପ୍ରମୁଖ ନଦୀ । ରାଜ୍ୟର 15 ରୁ 16 ଜିଲ୍ଲାର ଜୀବନ ରେଖା । ପ୍ରାୟ ଅଢେଇ କୋଟି ଲୋକ ମହାନୀଦ ଜଳ ଉପରେ ନିର୍ଭରଶୀଳ । କିନ୍ତୁ ଆଜି ବିଶ୍ବ ଜଳ ଦିବସରରେ ମହାନଦୀରେ ପାଣି ନାହିଁ । ଦୀର୍ଘଦିନର ନୀରବତା ପରେ ଆଜି ଚାପରେ ହେଉ ବା ବିରୋଧୀଙ୍କ ମୁକାବିଲା ପାଇଁ ବିଜେଡି ପୁଣି ଥରେ ମହାନଦୀ ପ୍ରସଙ୍ଗକୁ ଫେରିଛି । ଆଜି ବିଧାନସଭାରେ ଏହି ପ୍ରସଙ୍ଗ ଉଠାଇଛନ୍ତି ବରିଷ୍ଠ ବିଜେଡି ବିଧାୟକ ଦେବୀ ପ୍ରସାଦ ମିଶ୍ର ।
ଆଜି ଶୂନ୍ୟକାଳରେ ଦେବୀ ମିଶ୍ର ମହାନଦୀ ପ୍ରସଙ୍ଗ ଉଠାଇ କହିଛନ୍ତି, ‘‘1947 ମସିହାରେ ଯେତେବେଳେ ଡା. ଅଯୋଧ୍ୟାନାଥ ଖୋସଲା ସେଣ୍ଟ୍ରାଲ ୱାଟରୱେଜ ନେଭିଗେସନ ଏଜେନ୍ସୀ ଅଥରୀଟିର ଅଧ୍ୟକ୍ଷ ଥିଲେ ଏହି ଅନ୍ତରାଜ୍ୟ ନଦୀର ଜଳ ଆବଣ୍ଟନ ହୋଇଥିଲା । କେଉଁ ରାଜ୍ୟକୁ କେତେ ଜଳ ମିଳିବ ତାର ଆକଳନ କରାଯାଇଥିଲା । ସେତେବେଳେ କରାଯାଉଥିବା ଆକଳନ ଅନୁସାରେ ହୀରାକୁଦ ଉପର ମୁଣ୍ଡରେ ପ୍ରଭାବ 12.47 ମିଲିୟନ ଏକର ଫିଟ ଜଳ ଓଡିଶା ପାଇବ । ଅବିଭକ୍ତ ମଧ୍ୟପ୍ରଦେଶ 8.33 ମିଲିୟନ ଏକର ଫିଟ ଜଳ ପାଇବ । ଜଳ ଆବଣ୍ଟନରେ ମହାରାଷ୍ଟ୍ର ଓ ଝାଡଖଣ୍ଡ ମଧ୍ୟ ଥିଲେ । କିନ୍ତୁ ଛତିଶଗଡ ନୂଆ ରାଜ୍ୟ ଗଠନ ହେବା ପରେ ସେଠାକାର ସରକାର ସବୁ ଆଇନ ଉଲ୍ଲଙ୍ଘନ କରି 27.47 ମିଲିୟନ ଏକର ଫିଟ ଜଳର ଏକ ଭୁଲ ଆକଳନ ଦେଇ ନିଜ ଅଞ୍ଚଳରେ ମନ ଇଚ୍ଛା ଡ୍ୟାମ ବ୍ୟାରେଜ ନିର୍ମାଣ କରିଚାଲିଲେ । ପରିବେଶ ମଞ୍ଜୁରୀ ନଥାଇ ମଧ୍ୟ ନିର୍ମାଣ କରିଛନ୍ତି । ଯାହା 2016 ମସିହାରେ ଧରାପଡିଛି ।’’
ଦେବୀ ମିଶ୍ର କହିଛନ୍ତି ପ୍ରସଙ୍ଗ ହେଉଛି ଅଣମୌସୁମୀ ସମୟରେ ମହାନଦୀର ଜଳ ପ୍ରଭାବ ବନ୍ଦ ହୋଇଯାଇଛି । ବର୍ଷା ଦିନେ ତ ବର୍ଷା କାରଣରୁ ପାଣି ଆସୁଛି । ହେଲେ ମହାନଦୀ ଜଳ ବିବାଦକୁ ନେଇ ଗଠିତ ହୋଇଥିବା ଟ୍ରିବ୍ୟୁନାଲରେ ଓଡିଶା ଅଣମୌସୁମୀ ସମୟ ନଭେମ୍ବରରରୁ ମେ’ ମଧ୍ୟରେ ମଧ୍ୟବର୍ତ୍ତୀକାଳୀନ ରାୟ ବଳରେ ଅତିକମରେ 2 ମିଲିୟନ ଏକର ଫିଟ ଜଳ ଦେବାକୁ ଦାବି କରାଯାଇଥିଲା । କିନ୍ତୁ ଛତିଶଗଡ ଶୁଣୁନାହିଁ । ସେତେବେଳେ ରମଣ ସିଂ ସରକାର ଥିଲେ । କେନ୍ଦ୍ରରେ ମଧ୍ୟ ବିଜେପି ସରକାର ଥିଲା । ଉଭୟ ରାଜ୍ୟ ଓ କେନ୍ଦ୍ରରେ ବିଜେପି ସରକାର ଥାଇ ଓଡିଶାର ଦାବି ପ୍ରତି କର୍ଣ୍ଣପାତ କଲେ ନାହିଁ । ସିଡବ୍ଲୁସି ମଧ୍ୟ କିଛି କଲା ନାହିଁ । ଛତିଶଗଡରେ ସରକାର ପରିବର୍ତ୍ତନ ହେଲା ପରେ ମଧ୍ୟ କିଛି ଲାଭ ହେଲା ନାହିଁ । ଯଦ୍ବାରା ଅଣ ମୌସୁମୀ ସମୟରେ ମହାନଦୀରେ ପାଣିନଥିବା କାରଣରୁ ଓଡିଶାର 15 ଜିଲ୍ଲାର ପାଖାପାଖି ଅଢେଇ କୋଟି ଲୋକ ପ୍ରଭାବିତ ହେବା ସହ କୃଷି କାର୍ଯ୍ୟ ମଧ୍ୟ ହୋଇପାରୁନାହିଁ । ଯାହାକୁ ନେଇ ବିଧାନସଭାରେ ଦାବି କରିଛି । ବାଚସ୍ପତି ଅନ୍ୟ ଫୋରମରେ ଆଲୋଚନା କରିବାକୁ ପରାମର୍ଶ ଦେଇଛନ୍ତି । ଏହାସହ ବିଭାଗୀୟ ମନ୍ତ୍ରୀଙ୍କୁ ଏସମ୍ପର୍କରେ ବିବୃତ୍ତି ଦେବାକୁ ନିର୍ଦ୍ଦେଶ ଦେଇଛନ୍ତି । ଦେବୀ ମିଶ୍ରଙ୍କୁ ସମର୍ଥନ କରି ଶାସକ ଦଳ ସଦସ୍ୟ ମାନେ ଗୃହରେ କେନ୍ଦ୍ର ବିରୋଧୀ ନାରା ଦେଇଥିଲେ ।
ଅନ୍ୟପଟେ ଶୂନ୍ୟକାଳରେ ଶାସକ ଦଳର ମହାନଦୀ ଚିନ୍ତା ଦେଖି, କଡା ଆକ୍ରମଣ କରିଛନ୍ତି ବିରୋଧୀ ଦଳନେତା ଜୟ ନାରାୟଣ ମିଶ୍ର । ଜୟ କହିଛନ୍ତି ଯେ ଆଜି ଶାସକ ଦଳ ହୋଇ ବିଜେଡି ଦଳ ବିରୋଧୀଙ୍କ ଭଳି ଆଭିମୁଖ୍ୟ ଆପଣାଇଛି । ଆମେ ଦାବି କରିଥିଲୁ ବିଜେଡି ଯଦି ଆଲୋଚନା ଚାହୁଁଛି ଏଥିପାଇଁ ଗୋଟିଏ ସ୍ବତନ୍ତ୍ର ମୋସନ ଆଣନ୍ତୁ । ଆମେ ଆଲୋଚନା ପାଇଁ ପ୍ରସ୍ତୁତ ଅଛୁ । ବିଜେଡି ସବୁବେଳେ କୁହେ ସେମାନେ ଆଲୋଚନା ପାଇଁ ପ୍ରସ୍ତୁତ । କିନ୍ତୁ ଆଜି ତାହାର ଓଲଟା ହେଲା । ଜୟ କହିଛନ୍ତି ରାଜ୍ୟର ନଦୀ, ଝରଣା ଯୋର ଗୁଡିକରେ ପାଣି ବୋହିଯାଉଛି । ଓଡିଶା ସରକାରଙ୍କର କଣ କୌଣସି ଦାୟିତ୍ବ ନାହିଁ? ବୋହି ଯାଉଥିବା ପାଣି ଅଟକାଇବାକୁ । କାହିଁକି ଜଳନୀତି ଆଣୁନାହାଁନ୍ତି? ମହାନଦୀ ପାଇଁ କୌଣସି ଚିନ୍ତା ନାହିଁ କେବଳ ସରକାର ଓ ବିଜେଡି ଡ୍ରାମା କରୁଛି ବୋଲି ଅଭିଯୋଗ କରିଛନ୍ତି ।
ଇଟିଭି ଭାରତ, ଭୁବନେଶ୍ବର
