ଜାଲ ନୋଟ ଧରାଇ ଛେଳିନେଇ ଚମ୍ପଟ ମାରିଲେ ଦୁର୍ବୃତ୍ତ, ବୃଦ୍ଧ ହତାଶ

ଖୋର୍ଦ୍ଧା: ଜାଲ ନୋଟ ଦେଇ ଛେଳି ନେଇ ଚମ୍ପଟ । ଏଭଳି ଏକ ଘଟଣା ଦେଖିବାକୁ ମିଳିଛି ଖୋର୍ଦ୍ଧା ଜିଲା ବେଗୁନିଆ ବ୍ଲକ ଜଙ୍କିଆ ଥାନା ସିକୋ ଫାଣ୍ଡି ଅନ୍ତର୍ଗତ ହଜ ଗ୍ରାମରେ । ଛେଳି ବିକ୍ରି କରିବା ପାଇଁ 9ହଜାର ଟଙ୍କା ମୁଲଚାଲ ହୋଇଥିବା ବେଳେ 18ଟି ଜାଲ 500ଟଙ୍କିଆ ନୋଟ ଦେଇ ଛେଳି ନେଇଯାଇଥିବା କହିଛନ୍ତି ଛେଳି ମାଲିକ ।

ସୂଚନା ଅନୁଯାୟୀ ହଜ ଆଦିବାସୀ ସାହିର ପାଣ୍ଡବ ନାୟକ ନାମକ ଜଣେ 70 ବର୍ଷ ବୟସ୍କ ଗରିବ ବୃଦ୍ଧ ନିଜେ ପାଳିଥିବା କେତେକ ଛେଳିକୁ ନେଇ ହଜ ସିକୋ ରାସ୍ତାର ଟାଙ୍କୋଳ ଛକ ନିକଟରେ ରାସ୍ତାପାର୍ଶ୍ବରେ ଥିବା ଜଙ୍ଗଲରେ ଚରାଉଥିଲେ । ଏତିକିବେଳେ ହଜରୁ ସିକୋ ଅଭିମୁଖେ ଏକ ନୀଳ ରଙ୍ଗର ବାଇକରେ ଯାଉଥିବା ଜଣେ ଅଚିହ୍ନାବ୍ୟକ୍ତି ଗୋଠରେ ଥିବା ବଡଛେଳି (ବୋଦା) ନେବାପାଇଁ ମୂଲଚାଲ କରିଥିଲା । ଶେଷରେ ସେହି ଛେଳିଟିକୁ 9 ହଜାର ଟଙ୍କାରେ ବିକ୍ରି କରାଯିବ ବୋଲି ସ୍ଥିର କରାଯାଇଥିଲା । 18ଟି 500 ଟଙ୍କିଆ ନୋଟ ଦେଇ ସେହି ରାସ୍ତାରୁ ହିଁ ଏହି ଅଚିହ୍ନା ଲୋକ ଜଣକ ପାଖରେ ରଖିଥିବା ଏକ ବଡବ୍ୟାଗରେ ଛେଳିଟିକୁ ଭର୍ତିକରି ନେଇ ଫେରାର ଯାଇଥିଲା ।

ତେବେ ଏହି ଟଙ୍କା ଅସଲି ନା ନକଲି ବୃଦ୍ଧ ଜଣକ ପ୍ରଥମେ ଜାଣି ପାରିନଥିଲେ । ପରେ ବୃଦ୍ଧ ଜଣକ ସେହି ଟଙ୍କାକୁ ଆଣି ଗ୍ରାମର କିଛି ଲୋକଙ୍କୁ ଦେଖାଇଥିଲେ । ସେହି ନୋଟଗୁଡିକ ବଜାରରେ ମିଳୁଥିବା ପିଲାମାନଙ୍କ ନକଲି ଖେଳନା ଟଙ୍କା ହୋଇଥିବା ଜଣାପଡିଥିଲା । ତେବେ ବୟସ ଅଧିକ ହୋଇଥିବା ହେତୁ ବୃଦ୍ଧଜଣକ ପୋଲିସ ନିକଟରେ ଅଭିଯୋଗ କରିନାହାନ୍ତି । ତେବେ ଏଭଳି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଏଭଳି ଠକାମି ଘଟଣାର ତଦନ୍ତ କରିବା ସହ ଠକକୁ ଧରିବା ପାଇଁ ସାଧାରଣରେ ଦାବି ହୋଇଛି ।

ଅନ୍ୟପଟେ ଏଭଳି ଠକେଇ କେହି ପାଖଆଖର ବ୍ୟକ୍ତିବିଶେଷ ହିଁ କରିଥାଇ ପାରନ୍ତି ଓ ବିଶେଷକରି ବ୍ରାଉନସୁଗାରର ଅବାଧ ବିକ୍ରି ଓ ସେବନକୁ ନେଇ ଏଭଳି ପରିସ୍ଥିତି ସୃଷ୍ଟି ହେଉଥିବା ସାଧାରଣରେ ମତପ୍ରକାଶ ପାଇଛି । ଏଥିପ୍ରତି ବିଭାଗୀୟ ଉଚ୍ଚକର୍ତୁପକ୍ଷ ତୁରନ୍ତ ଦୃଷ୍ଟିଦେଇ ନିରପେକ୍ଷ ତଦନ୍ତ କରିବାକୁ ସାଧାରଣରେ ଦାବି ହେଉଛି ।

ଇଟିଭି ଭାରତ, ଖୋର୍ଦ୍ଧା