ଝାରସୁଗୁଡା: ଜନ୍ମମାଟିରେ ଅଲମ୍ପିକ୍ସ ଷ୍ଟାର । ଟୋକିଓ ଅଲମ୍ପିକ୍ସରେ ଇତିହାସ ରଚି ନିଜ ଜନ୍ମମାଟି ସୁନ୍ଦରଗଡକୁ ଫେରିଛନ୍ତି ଓଡିଆ ହକି ଖେଳାଳି । ଭାରତୀୟ ପୁରୁଷ ଓ ମହିଳା ହକି ଟିମର ବିରେନ୍ଦ୍ର ଲାକ୍ରା, ଅମିତ ରୋହିଦାସ, ଦୀପଗ୍ରେସା ଏକ୍କା ଓ ନମିତା ଟପ୍ପୋ ଘର ବାହୁଡିଛନ୍ତି । ଝାରସୁଗୁଡା ବିମାନ ବନ୍ଦରରେ ଅବତରଣ ପରେ ସେମାନଙ୍କୁ ଭବ୍ୟ ସମ୍ବର୍ଦ୍ଧନା ସହ ସ୍ବାଗତ କରାଯାଇଛି ।
ଝାରସୁଗୁଡ଼ା ବିମାନ ବନ୍ଦରରେ ସେମାନେ ପହଞ୍ଚିବା ପରେ ପାରମ୍ପରିକ ନୃତ୍ୟ ସଙ୍ଗୀତ ସହ ଭବ୍ୟ ସ୍ଵାଗତ ସମ୍ବର୍ଦ୍ଧନା ଦିଆଯାଇଥିଲା । ବିମାନ ବନ୍ଦର ପରିସର ତାଙ୍କ ସ୍ଵାଗତ ପାଇଁ ସମ୍ପୂର୍ଣ୍ଣ ଲୋକାରଣ୍ୟ ହୋଇ ଉଠିଥିଲା । ଝାରସୁଗୁଡ଼ା ଓ ତାଙ୍କ ନିଜସ୍ଵ ଜିଲ୍ଲା ସୁନ୍ଦରଗଡ଼ର ବିଭିନ୍ନ ସ୍ଥାନରୁ ଲୋକେ ତାଙ୍କୁ ସ୍ବାଗତ କରିବା ଓ ଦେଖିବା ଉଦ୍ଦେଶ୍ୟର ସେଠାରେ ଭିଡ ଜମାଇଥିଲେ । ପୂର୍ବରୁ କୌଣସି ବ୍ୟକ୍ତି ପାଇଁ ଝାରସୁଗୁଡ଼ା ବିମାନ ବନ୍ଦରରେ ଏଭଳି ଭିଡ ଦେଖିବାକୁ ମିଳି ନଥିବା ବେଳେ ଆଜି ଏହି ସ୍ଥାନ ଉତ୍ସବମୁଖର ହୋଇଉଠିଥିଲା ।
ଅନ୍ୟପଟେ 'ଅଲମ୍ପିକ୍ସରେ ଦମଦାର ସଫଳତା ପାଇବା ପରେ ଗାଁକୁ ଫେରୁଥିବାରୁ ବହୁତ ଖୁସି ଲାଗୁଛି । ଯାହା ବଖାଣିବା ପାଇଁ ପାଖରେ ଶବ୍ଦ ନାହିଁ' ବୋଲି କହିଛନ୍ତି ଅଲମ୍ପିକ୍ସ ଷ୍ଟାର ଅମିତ ରୋହିଦାସ ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
