ଖେଳୁଥିଲେ ଖସି ଗଲେ, ତାଳଦଣ୍ଡା କେନାଲରେ ଦୁଇ ଶିଶୁଙ୍କ ସଲିଳ ସମାଧି

ଜଗତସିଂହପୁର: ପାରାଦ୍ବୀପ ଅଠର ବାଙ୍କୀ ଥାନା ଅନ୍ତର୍ଗତ ଲକପଡା ଅଞ୍ଚଳରେ ଅଘଟଣ । ଖେଳୁଥିବା ସମୟରେ କେନାଲକୁ ଖସିଲେ ଦୁଇ ଶିଶୁ । ପାଣିରେ ବୁଡି ଉଭୟ ଶିଶୁଙ୍କ ମୃତ୍ୟୁ । ଶିଶୁ ଦୁଇ ମାତ୍ର ୪ ବର୍ଷର ଅଟନ୍ତି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି ।

ସୂଚନାଯୋଗ୍ୟ, ଆଜି ଦିନ 10ଟା ସମୟରେ ଦୁଇ ଶିଶୁ ନିଜ ଘର ସାମ୍ନାରେ ଖେଳୁଥିଲେ । ହେଲେ ଅସାବଧାନତା ବଶତଃ ତାଳଦଣ୍ଡା କେନାଲ ମଧ୍ୟକୁ ଖସି ପଡ଼ିଥିଲେ । କିଛି ସମୟ ପରେ ପରିବାର ଲୋକେ ଦୁଇ ପିଲାଙ୍କୁ ନ ପାଇ ବହୁ ଖୋଜାଖୋଜି କରିଥିଲେ । କିଛି ସମୟ ପରେ ପିଲା ଦୁହେଁ ତାଳଦଣ୍ଡା କେନାଲର ଦଳ ଭିତରେ ଫସିଥିବା ଲୋକେ ଦେଖିବାକୁ ପାଇଥିଲେ । ଉଭୟ ଶିଶୁଙ୍କୁ ସେଠାରୁ ଉଦ୍ଧାର କରି ପାରାଦ୍ବୀପ ବିଜୁ ମେମୋରିଆଲ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।

ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ