ଢେଙ୍କାନାଳ: ଆସନ୍ତାକାଲି ଅର୍ଥାତ ସୋମବାର 5T ସଚିବ ଭିକେ ପଣ୍ଡିଆନଙ୍କ ଜୋରନ୍ଦାସ୍ଥିତ ମହିମା ଗାଦି ଗସ୍ତ କାର୍ଯ୍ୟକ୍ରମ ପାଇଁ ମହିମା ଗାଦିରେ ଚାଲିଛି ବ୍ୟାପକ ପ୍ରସ୍ତୁତି । ମାତ୍ର ଜଣେ ସଚିବଙ୍କ ପାଇଁ ଏପରି ଭବ୍ୟ ବ୍ୟୟ ବହୁଳ ଆୟୋଜନକୁ ଢେଙ୍କାନାଳ ଜିଲ୍ଲା ବିଜେପି ପକ୍ଷରୁ ନିନ୍ଦା କରାଯାଇଛି । ଜନ ସାଧାରଣଙ୍କ ସମ୍ମାନ ତଥା ସ୍ବାଭିମାନର ପ୍ରତୀକ ଗଣତନ୍ତ୍ରର ଲୋକ ପ୍ରତିନିଧି ମାନେ ଜଣେ ସଚିବଙ୍କ ଆଗମନ ପାଇଁ ଏପରି ଭବ୍ୟ ପ୍ରସ୍ତୁତି କରିବା ଗଣତନ୍ତ୍ର ପାଇଁ ଆଦୌ ଶୋଭନୀୟ ନୁହଁ ବୋଲି ବିଜେପି ପକ୍ଷରୁ ଅଭିଯୋଗ କରାଯାଇଛି ।
ଏନେଇ ଢେଙ୍କାନାଳ ଜିଲ୍ଲା ବିଜେପି କାର୍ଯ୍ୟାଳୟ ପରିସରରେ ଏକ ସାମ୍ବାଦିକ ସାମ୍ବାଦିକ ସମ୍ମିଳନୀର ଆୟୋଜନ କରାଯାଇଥିଲା । ଗଣତନ୍ତ୍ରରେ ଲୋକ ପ୍ରତିନିଧିଙ୍କ ଏପରି କାର୍ଯ୍ୟଧାରା ଗଣତନ୍ତ୍ର ପାଇଁ କଳଙ୍କିତ ଅଧ୍ୟାୟ ସୃଷ୍ଟି କରୁଛି ବୋଲି ସାମ୍ବାଦିକ ସମ୍ମିଳନୀରେ ବିଜେପି ପକ୍ଷରୁ ଅଭିଯୋଗ କରାଯାଇଛି । ଗଣତନ୍ତ୍ରରେ ଲୋକ ପ୍ରତିନିଧି (ବିଧାୟକ)ମାନେ ସମ୍ମାନ ଓ ସ୍ଵାଭିମାନର ପ୍ରତୀକ ହୋଇଥିଲେ ମଧ୍ୟ ସଚିବଙ୍କ ଗସ୍ତ ପାଇଁ ଲୋକ ଏମାନେ ଭବ୍ୟ ଆୟୋଜନ କରି ପ୍ରସ୍ତୁତି ତଦାରଖ କରିବା ସମାଜ ପାଇଁ ଶୁଭଙ୍କର ନୁହେଁ ବୋଲି ଅଭିଯୋଗ କରିଛି ବିଜେପି । ଏହି ସାମ୍ବାଦିକ ସମ୍ମିଳନୀରେ ବିଜେପିର ପୂର୍ବତନ ରାଜ୍ୟସଭା ସାଂସଦ ରୁଦ୍ରନାରାୟଣ ପାଣି, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର, ଜିଲ୍ଲା ବିଜେପି ସଭାପତି ନରେଶ ଚନ୍ଦ୍ର ମହାପାତ୍ର, ବିଜେପି ନେତା ସୁନୀଲ ଶର୍ମା, ବିଭୁତି ଭୂଷଣ ପ୍ରଧାନ, ନବ କିଶୋର ଗୁରୁ ଓ ଶତ୍ରୁଘ୍ନ ଜେନାଙ୍କ ସମେତ ଅନ୍ୟ ବିଜେପି ନେତା ଓ କର୍ମୀ ଉପସ୍ଥିତ ଥିଲେ ।
ସୂଚନା ଥାଉ କି, ନିକଟରେ ରାଜ୍ୟ ସରକାରଙ୍କ ପକ୍ଷରୁ ମହିମା ଗାଦିର ବିକାଶ ତଥା ଉନ୍ନତୀକରଣ ପାଇଁ ୧୦ କୋଟି ଟଙ୍କା ଅନୁଦାନ ଘୋଷଣା କରାଯାଇଛି । ତେବେ ଏହି ଉନ୍ନୟନ କାର୍ଯ୍ୟର ତଦାରଖ ଓ ପରିଦର୍ଶନ ପାଇଁ ଆସନ୍ତାକାଲି ରାଜ୍ୟ ଖଣି ଇସ୍ପାତ ଓ ପୂର୍ତ୍ତ ବିଭାଗ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ଓ ରାଜ୍ୟ 5T ସଚିବ ଭିକେ ପାଣ୍ଡିଆନଙ୍କର ଜୋରନ୍ଦା ଗସ୍ତ କାର୍ଯ୍ୟକ୍ରମ ରହିଛି । ଏଥିପାଇଁ ଢେଙ୍କାନାଳ ଜିଲ୍ଲାପାଳ, ବିଧାୟକ ସୁଧୀର ସାମଲ ଓ ବିଜେଡିର ରାଜ୍ୟ ସାଙ୍ଗଠନିକ ସମ୍ପାଦକ ତଥା ଢେଙ୍କାନାଳ ଜିଲ୍ଲା ବିଜେଡି ପର୍ଯ୍ୟବେକ୍ଷକ ପ୍ରଣବ ପ୍ରକାଶ ଦାସ ଜୋରନ୍ଦା ଗସ୍ତ କରି ଆସନ୍ତାକାଲି ପାଇଁ ହେବାକୁ ଥିବା ଆୟୋଜନର ତଦାରଖ କରୁଛନ୍ତି । ଯାହାକୁ ନେଇ ଜିଲ୍ଲା ବିଜେପି ପ୍ରତିକ୍ରିୟାଶୀଳ ହୋଇଛି । ଜଣେ ସଚିବଙ୍କ ଆଗମନ ପାଇଁ ଏପରି ଭବ୍ୟ ଆୟୋଜନ କରିବା ଓ 5T ସଚିବଙ୍କ ପାଇଁ ଲୋକ ପ୍ରତିନିଧିଙ୍କ ତତ୍ପରତା ଅତି ଦୁର୍ଭାଗ୍ୟଜନକ ବୋଲି ଜିଲ୍ଲା ବିଜେପି ସଭାପତି ନରେଶ ମହାପାତ୍ର ଓ ପୂର୍ବତନ ସାଂସଦ ରୁଦ୍ରନାରାୟଣ ପାଣି ପ୍ରକାଶ କରିଛନ୍ତି । ଗଣତନ୍ତ୍ରରେ ଜନପ୍ରତିନିଧିକୁ ସଚିବ ସମ୍ମାନ ଦେବା ବଦଳରେ ଏଠାରେ ଓଲଟା ଜଣେ ସଚିବଙ୍କ ପାଇଁ ଲୋକ ପ୍ରତିନିଧି ତଥା ବିଧାୟକ ମାନେ କାର୍ଯ୍ୟ ତଦାରଖ କରିବା ଗଣତନ୍ତ୍ରରେ କଳଙ୍କ ବୋଲି ବିଜେପି ନେତୃବୃନ୍ଦ ପ୍ରକାଶ କରିଛନ୍ତି ।
ଇଟିଭି ଭାରତ, ଢେଙ୍କାନାଳ
