ବାଲିଯାତ୍ରାରେ ବ୍ୟାପକ ଦୁର୍ନୀତି ପ୍ରସଙ୍ଗ, ମୁହଁ ଖୋଲିଲେ ସିଏମସି କମିଶନର

କଟକ: ବାଲିଯାତ୍ରାରେ ବ୍ୟାପକ ଅନିୟମିତତା ପ୍ରସଙ୍ଗ । ବହୁ ଅଭିଯୋଗ ଆସିବା ପରେ ଶେଷରେ ମୁହଁ ଖୋଲିଲେ ସିଏମସି କମିଶନର ନିଖିଲ ପବନ କଲ୍ୟାଣ । ବାଲିଯାତ୍ରାରେ ୩ କୋଟିରୁ ଅଧିକ ଟଙ୍କାର ଅନିୟମିତତା ହୋଇଥିବା ନେଇ ଶାସକ ଦଳ ସମେତ ବିରୋଧୀମାନେ ଅଭିଯୋଗ ଆଣିଥିଲେ । ମାତ୍ର ଏନେଇ ସିଏମସି କମିଶନର କୌଣସି ପ୍ରତିକ୍ରିୟା ଦେଉନଥିଲେ କି କୌଣସି ସ୍ପଷ୍ଟୀକରଣ ବି ରଖୁନଥିଲେ । ଅଭିଯୋଗର ଫର୍ଦ୍ଦ ଲମ୍ବା ହେବା ପରେ ଶେଷରେ ଆଜି (ସୋମବାର) ମୁହଁ ଖୋଲିଛନ୍ତି କମିଶନର।

ଏନେଇ ସେ କହିଛନ୍ତି, "ବାଲିଯାତ୍ରାରେ ଯେଉଁ ସବୁ କାର୍ଯ୍ୟର ଟେଣ୍ଡର ଦିଆଯାଇଥିଲା ତାହାର କୌଣସି ପେମେଣ୍ଟ ଦିଆଯାଇନାହିଁ । କାର୍ଯ୍ୟ ଦେଖି ପେମେଣ୍ଟ ଦେବାର ବ୍ୟବସ୍ଥା ରହିଛି । ଏହାର ତଦନ୍ତ ପାଇଁ କମିଟି ମଧ୍ୟ ଗଠନ କରାଯାଇଛି। ସମସ୍ତ କାର୍ଯ୍ୟ ଆଇନ ଅନୁଯାୟୀ କରାଯାଇଛି । ସିଏମସି କାଉନସିଲରେ ପାସ ହେବା ପରେ ଟେଣ୍ଡର ଦିଆଯାଇଛି । ଏବେ ଯେଉଁ ସବୁ ଅଭିଯୋଗ ଆସିଛି ତାହା କମିଟି ରିପୋର୍ଟ ଆସିବା ପରେ ହିଁ ପେମେଣ୍ଟ କରାଯିବ। କୌଣସି ଅନିୟମିତତା ହୋଇନାହିଁ ।"

ମାତ୍ର ଏବେ ପ୍ରଶ୍ନ ଉଠୁଛି କିପରି ଏବଂ କେଉଁ ଉଦ୍ଦେଶ୍ୟରେ କମ ଦାମର କାର୍ଯ୍ୟକୁ ଅଧିକ ଚଢା ଦରରେ ଦିଆଗଲା ? ଅଭିଯୋଗ ଆସିବା ପରେ କମିଟି କାହିଁକି ଗଠନ କରାଗଲା ? ଏହି ପ୍ରକ୍ରିୟାରେ ମନ୍ଦ ଉଦ୍ଦେଶ୍ୟ ରହିଥିଲା କି ? ସୂଚନା ଥାଉ କି ବାଲିଯାତ୍ରାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି । ସେ ତୋରଣ ହେଉ ଏବା ବାଣ ଫୁଟା ବାଲିଯାତ୍ରାର ପ୍ରତ୍ୟେକ କାମରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଛି । ସବୁଠାରୁ ବଡ଼ କଥା ହେଉଛି ଏହି ଘଟଣାର ତଦନ୍ତ ପାଇଁ ଗଠିତ ହୋଇଥିବା କମିଟି ମଧ୍ୟ ଏହାର ଗନ୍ଧ ବାରି ପାରିଛି ।

ଟେଣ୍ଡର ପ୍ରକ୍ରିୟାରେ ସମୁଦାୟ ୩ କୋଟି ୩୨ ଲକ୍ଷ ଟଙ୍କାକୁ ଚଞ୍ଚକତା କରି ନେଇଥିଲେ ସମ୍ପୃକ୍ତ ଠିକା ସଂସ୍ଥା । ବିଭିନ୍ନ କାମ କରିବା ଆଳରେ ଅଧିକ ଟଙ୍କା ନେଇଥିଲେ ସଂସ୍ଥା । ଗତବର୍ଷ ଯେଉଁ ଏଜେନ୍ସି କାମ କରିଥିଲା, ଏଥର ୨୦୦ ପ୍ରତିଶତ ଅଧିକରେ ଉକ୍ତ ଏଜେନ୍ସି କାମ କରିବାକୁ ଅନୁକମ୍ପା ଦେଖାଇଥିଲା ସିଏମସି । କେଉଁ ଉଦ୍ଦେଶ୍ୟରେ ଉକ୍ତ ଏଜେନ୍ସିକୁ ସମାନ କାମକୁ ଅଧିକ ଟଙ୍କାରେ ଦିଆ ଯାଇଥିଲା ତାହା ଏବେ ସବୁଠାରୁ ବଡ଼ ପ୍ରଶ୍ନ ସୃଷ୍ଟି କରିଛି ?

ଇଟିଭି ଭାରତ, କଟକ