ବୌଦ୍ଧ: ସମସ୍ୟା ଘେରରେ ଛନ୍ଦି ହୋଇ ରହିଛନ୍ତି ବୌଦ୍ଧ ଜିଲ୍ଲାର ତିନୋଟି ଗ୍ରାମର ପ୍ରାୟ ତିନି ହଜାରରୁ ଊର୍ଦ୍ଧ୍ବ ଅଧିବାସୀ । ବିକାଶ ନେଇ ସରକାର ଡିଣ୍ଡିମ ପିଟୁଥିବା ବେଳେ ଏହି ଗ୍ରାମଗୁଡିକରେ ଏହାର ଭିନ୍ନ ରୂପ ଦେଖିବାକୁ ମିଳୁଛି । ଜିଲ୍ଲାର ଉପାନ୍ତ ପଞ୍ଚାୟତର ଉକ୍ତ ଅଞ୍ଚଳକୁ ସଂଯୋଗ କରୁଥିବା ରାସ୍ତାର ସମସ୍ୟା ଯୋଗୁଁ ଆମ୍ବୁଲାନ୍ସ ସେବା ଏକପ୍ରକାର ଅପହଞ୍ଚ ହୋଇ ରହିଥିବା ବେଳେ ପାନୀୟଜଳ, ବିଦ୍ୟୁତ ସମସ୍ୟା ସହିତ ବନ୍ୟଜନ୍ତୁଙ୍କ ଭୟରେ ଦିନ କାଟୁଛନ୍ତି ସ୍ଥାନୀୟ ଅଧିବାସୀ ।
ବ୍ୟାପକ ସମସ୍ୟା ଘେରରେ ବୌଦ୍ଧ ଜିଲ୍ଲାର ଉପାନ୍ତ ଅଞ୍ଚଳ ତଥା କଣ୍ଟାମାଳ ବ୍ଲକର ଉପାନ୍ତ ପଞ୍ଚାୟତ ବରଗାଁ । ଏହି ବରଗାଁ ପଞ୍ଚାୟତର ମଲ୍ଲିକୁଦ ଠାରୁ ଉପରପଡା, ଘୋରଡାପଡା, ଦଣ୍ଡିପଡ଼ା ପର୍ଯ୍ୟନ୍ତ ଥିବା ରାସ୍ତାଟି ଅତ୍ୟନ୍ତ ଶୋଚନୀୟ ହୋଇପଡିଥିବାରୁ ଏହି ରାସ୍ତାଟି କେବଳ ଏକ ପାଦଚଲା ରାସ୍ତା ହୋଇପଡ଼ିଛି । ରାସ୍ତାର ଦୂରାବସ୍ଥା ଯୋଗୁଁ ଏହି ଅଞ୍ଚଳରେ ନା କୌଣସି ବଡ଼ ଗାଡ଼ି ଆସିପାରୁଛି ନା ଆମ୍ବୁଲାନ୍ସ ସେବା ସେବା ପାଇପାରୁଛନ୍ତି ସ୍ଥାନୀୟ ଅଧିବାସୀ ।
ଏହାମଧ୍ଯ ପଢନ୍ତୁ.. ଉପାନ୍ତ ଅଞ୍ଚଳରେ ଅପହଞ୍ଚ ସରକାରୀ ଯୋଜନା, ଅସୁବିଧାର ସମ୍ମୁଖୀନ ହେଉଛନ୍ତି ଗ୍ରାମବାସୀ
ଜରୁରୀ ସମୟରେ ରାସ୍ତା ନଥିବା ଯୋଗୁଁ ଆମ୍ବୁଲାନ୍ସ ସେବା ପାଇପାରୁନାହାନ୍ତି ସ୍ଥାନୀୟ ଲୋକେ । ଯେଉଁଥିପାଇଁ ଅନେକ ଜୀବନ ବିପଦ ମୁଖରେ ପଡ଼ୁଛି । ସେହିଭଳି ଏହି ଗାଁଠୁ ମାତ୍ର କିଛି କିଲୋମିଟର ଦୂରରେ ଥିବା ରାସ୍ତାଟି ଜଙ୍ଗଲ ବିଭାଗ ଅଧିନରେ ଥିବାବେଳେ ଏଠାରେ ପ୍ରତ୍ୟେକ ଦିନ ବନ୍ୟଜନ୍ତୁ ବିଶେଷ ଭାବରେ ବଣୁଆ ହାତୀଙ୍କ ଭୟ ଲାଗି ରହୁଛି । ହାତୀଙ୍କ ଚଳପ୍ରଚଳ ଯୋଗୁଁ ଏଠାରେ ଭୟରେ ଲୋକମାନେ ଦିନ କାଟୁଛନ୍ତି ।
ଏହାମଧ୍ୟ ପଢନ୍ତୁ.. ଅପହଞ୍ଚ ସରକାରୀ ଯୋଜନା, ଦୁର୍ବିସହ ଜୀବନ ବିତାଉଛନ୍ତି ଆଦିବାସୀ ପରିବାର
କେବଳ ଏତିକି ନୁହେଁ ପାନୀୟ ଜଳ, ବିଦ୍ୟୁତ ସେବା ଭଳି ଅତ୍ୟାବଶକୀୟ ସେବାରୁ ବି ବଞ୍ଚିତ ଏହି ଗ୍ରାମବାସୀ । ତେଲନଦୀର ନିକଟରେ ବରଗାଁ ପଞ୍ଚାୟତ ରହିଥିଲେ ମଧ୍ୟ ସ୍ୱଚ୍ଛ ପାନୀୟଜଳ ଅଞ୍ଚଳବାସୀଙ୍କ ପାଇଁ ଦିବା ସ୍ୱପ୍ନ । ଏହି ଅଞ୍ଚଳକୁ ସଂଯୋଗ କରୁଥିବା ରାସ୍ତା ଜଙ୍ଗଲ ବିଭାଗଠାରୁ ଆରଡ଼ି ବିଭାଗକୁ ସ୍ଥାନାନ୍ତର ପାଇଁ ଅଞ୍ଚଳବାସୀ ପ୍ରଶାସନ ନିକଟରେ ବାରମ୍ବାର ଦାବି କରୁଥିଲେ ମଧ୍ୟ କୌଣସି ସୁଫଳ ମିଳିନଥିବା ଅଭିଯୋଗ ହୋଇଛି । ଅନ୍ୟପଟେ ବିଭିନ୍ନ ସମସ୍ୟାରେ ଛନ୍ଦି ହୋଇପଡ଼ିଥିବା ଏହି ଅଞ୍ଚଳର ସମସ୍ୟା ସମ୍ପର୍କରେ ସ୍ଥାନୀୟ ଅଧିବାସୀ ଦୀର୍ଘ ବର୍ଷ ହେଲା ବ୍ଲକ ପ୍ରଶାସନଠାରୁ ନେଇ ଜିଲ୍ଲା ପ୍ରଶାସନ ନିକଟରେ ଗୁହାରି କଲେ ମଧ୍ୟ କୌଣସି କାର୍ଯ୍ୟ କରାଯାଉନଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ । ତୁରନ୍ତ ଏନେଇ ଜିଲ୍ଲା ପ୍ରଶାସନ ସ୍ବତନ୍ତ୍ର ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ ପାଇଁ ଦାବି ହୋଇଛି ।
ଇଟିଭି ଭାରତ, ବୌଦ୍ଧ
