ଦେବଗଡ଼: ପାଖେଇ ଆସୁଛି ମତଦାନ ତାରିଖ । 25ରେ ସମ୍ବଲପୁର ଲୋକସଭା ଓ ଏହା ଅଧୀନ ଦେବଗଡ଼ ବିଧାନସଭା କ୍ଷେତ୍ରରେ ଭୋଟ ଗ୍ରହଣ ହେବ । ବିଜେପିରୁ ପ୍ରାର୍ଥୀ ହୋଇଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ଦାସ (ବବି)ଙ୍କ ମଧ୍ୟରେ ସମ୍ବଲପୁର ଲୋକସଭା ଆସନରେ ହାଇ-ଭୋଲଟେଜ ଫାଇଟ ହେଉଛି । ସମଗ୍ର ରାଜ୍ୟର ନଜରରେ ରହିଛି ଏହି ଚର୍ଚ୍ଚିତ ଆସନର ଫଳାଫଳ । ତେବେ ସମ୍ବଲପୁର ସଂସଦୀୟ କ୍ଷେତ୍ର ଓ ଏହା ଅନ୍ତର୍ଗତ ବିଧାନସଭା ଆସନରେ ପ୍ରଚାର ଜୋରଦାର କରିଛନ୍ତି ତିନି ପ୍ରମୁଖ ରାଜନୈତିକ ଦଳ ବିଜେଡି କଂଗ୍ରେସ ଓ ବିଜେପି ।
ଏହି ପ୍ରଚାର କାର୍ଯ୍ୟକ୍ରମରେ ବିଜେଡି ଅନ୍ୟ ଦୁଇ ପ୍ରତିଦ୍ବନ୍ଦ୍ବୀ ଦଳଠାରୁ ସାମାନ୍ୟ ଆଗରେ ଥିବା ଦୃଶ୍ୟମାନ ହେଉଛି । ଦଳର ଲୋକସଭା ପ୍ରାର୍ଥୀ ପ୍ରଣବ ପ୍ରକାଶ ଦାସ ଓ ଦେବଗଡ଼ ବିଧାନସଭା ବିଜେଡି ପ୍ରାର୍ଥୀ ଜିଲ୍ଲାର ବିଭିନ୍ନ ଗ୍ରାମାଞ୍ଚଳ ଓ ଦୁର୍ଗମ ଅଞ୍ଚଳକୁ ଘନ ଘନ ଗସ୍ତ କରି ରାଜ୍ୟରେ ନବୀନ ସରକାରଙ୍କ ବିଭିନ୍ନ ଜନହିତକର ଯୋଜନା ଓ ସେସବୁର ସଫଳ ରୂପାୟନ ସମ୍ପର୍କରେ ଭୋଟରଙ୍କୁ ବୁଝାଇ ଭୋଟ ମାଗୁଛନ୍ତି । ଆଦିବାସୀ ବହୁଳ ଦେବଗଡ଼ ଜିଲ୍ଲାରେ ଆଦିବାସୀ ଓ ବନବାସୀ ଭୋଟରଙ୍କ ଭୋଟ ଦଳୀୟ ପ୍ରାର୍ଥୀଙ୍କ ବିଜୟ ପାଇଁ ନିର୍ଣ୍ଣାୟକ ଭୂମିକା ଗ୍ରହଣ କରୁଥିବା ବେଳେ ଏହି ଭୋଟରଙ୍କୁ ନିଜ ସପକ୍ଷକୁ ଟାଣିବାରେ ବିଜେଡି ସମସ୍ତ ପ୍ରୟାସ ଜାରି ରଖିଛି ।
ଦେବଗଡ ବିଧାନସଭା କ୍ଷେତ୍ରରେ ଚଳିତ ନିର୍ବାଚନରେ କଂଗ୍ରେସ ବିଧାୟକ ପ୍ରାର୍ଥୀ ସେମ ହେମ୍ବ୍ରମଙ୍କ ସ୍ଥିତି ପ୍ରାୟତଃ ସେତେଟା ସୁଦୃଢ ନଥିବା ଚର୍ଚ୍ଚା ହେଉଛି । ମୁଖ୍ୟତଃ ବିଜେଡି ପ୍ରାର୍ଥୀ ରୋମାଞ୍ଚ ରଞ୍ଜନ ବିଶ୍ୱାଳ ଓ ବିଜେପି ପ୍ରାର୍ଥୀ ସୁବାଷ ଚନ୍ଦ୍ର ପାଣିଗ୍ରାହୀଙ୍କ ମଧ୍ୟରେ ମୁଖ୍ୟ ପ୍ରତିଦ୍ବନ୍ଦିତା ହେବାର ସମ୍ଭାବନା ରହିଛି । ଏହିକ୍ରମରେ ବିଜେଡି ନେତୃତ୍ୱରେ ଜିଲ୍ଲାର ଗ୍ରାମାଞ୍ଚଳ ଓ ଦୁର୍ଗମ ଅଞ୍ଚଳରେ ବସବାସ କରୁଥିବା ଆଦିବାସୀ ଓ ବନବାସୀ ଭୋଟର ଏକତ୍ରିତ ହୋଇ ଚଳିତ ନିର୍ବାଚନରେ ବିଜେଡି ଉଭୟ ଲୋକସଭା ଓ ବିଧାନସଭା ପ୍ରାର୍ଥୀଙ୍କୁ ବିଜୟୀ କରିବା ପାଇଁ ସଂକଳ୍ପ ନେଉଥିବା ପରିଲକ୍ଷିତ ହୋଇଛି । ଗ୍ରାମରେ ତାଳକୁଣ୍ଡି , ଦୁଧିଆନାଳି,କଂସର, ଢୋଲପଡା ଓ ଲଇମୁରା ଆଦି ପାଞ୍ଚଟି ପଞ୍ଚାୟତର ଶତାଧିକ ସଂଖ୍ୟାରେ ଆଦିବାସୀ ସମ୍ପ୍ରଦାୟର ମହିଳା ଓ ପୁରୁଷ ଏକତ୍ରିତ ହୋଇ ନିଜ ପାରମ୍ପରିକ ରୀତିରେ ପ୍ରାର୍ଥନାସଭା କରିବା ପରେ ସାମ୍ପ୍ରତିକ ରାଜନୈତିକ ସ୍ଥିତି ସମ୍ପର୍କରେ ଆଲୋଚନା କରିଥିଲେ । ସେମାନେ ଏଥର ବିଜେଡି ପ୍ରାର୍ଥୀଙ୍କୁ ଭୋଟ ଦେବା ସହ ନବୀନ ପଟ୍ଟନାୟକଙ୍କୁ 6ଷ୍ଠ ଥର ପାଇଁ ମୁଖ୍ୟମନ୍ତ୍ରୀ କରିବାକୁ ଶପଥ ଗ୍ରହଣ କରିଛନ୍ତି ।
ଇଟିଭି ଭାରତ, ଦେବଗଡ
