ବୌଦ୍ଧ: ଜିଲ୍ଲାର ବହୁବିଧ ଉନ୍ନତି ତଥା ସାମୂହିକ ବିକାଶ ଦିଗରେ ସମସ୍ତଙ୍କ ମିଳିତ ସହଯୋଗ ପାଇଁ ସାଂସଦଙ୍କ ଆହ୍ବାନ । ବୌଦ୍ଧ ଜିଲ୍ଲାର ବହୁବିଧ ଉନ୍ନତି ପାଇଁ ସମନ୍ବୟ ତଥା ତଦାରଖ କମିଟିର ବୈଠକ ସହିତ ଜିଲ୍ଲା ଯୋଜନା ବୋର୍ଡର ବୈଠକ ଅନୁଷ୍ଠିତ ହୋଇଛି । ତେବେ ବୌଦ୍ଧ ଜିଲ୍ଲାର ସାମୂହିକ ବିକାଶ ଦିଗରେ ସମସ୍ତଙ୍କ ମିଳିତ ଉଦ୍ୟମ ପାଇଁ ଆହ୍ବାନ ଦେଇଛନ୍ତି କନ୍ଧମାଳ ସାଂସଦ ଡ଼ ଅଚ୍ୟୁତ ସାମନ୍ତ ।
ବୁଧବାର ବୌଦ୍ଧ ଡିଆରଡିଏ ସମ୍ମିଳନୀ କକ୍ଷରେ ଦିଶା ତଥା ଜିଲ୍ଲା ଉନ୍ନୟନ ଓ ପରିଚାଳନା କମିଟିର ବୈଠକ ଅନୁଷ୍ଠିତ ହୋଇଥିଲା । ସାଂସଦ ସାମନ୍ତ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବୌଦ୍ଧ ବିଧାୟକ ପ୍ରଦୀପ କୁମାର ଅମାତ, କଣ୍ଟାମାଳ ବିଧାୟକ ମହୀଧର ରଣା, ଜିଲ୍ଲାପାଳ ଲଲାଟେନ୍ଦୁ ମିଶ୍ର, ଜିଲ୍ଲା ପରିଷଦ ଅଧ୍ୟକ୍ଷ, ଉପାଧ୍ୟକ୍ଷ ଓ କମିଟିର ସମସ୍ତ ସଦସ୍ୟ ଉପସ୍ଥିତ ରହି 2021 ବର୍ଷର କାର୍ଯ୍ୟ ଖସଡା ସମ୍ପର୍କରେ ଆଲୋଚନା କରିଥିଲେ । ସେହିପରି ସାଂସଦ ଚାରିଛକ ସ୍ଥିତ ହରଭଙ୍ଗା ବ୍ଲକ କାର୍ଯ୍ୟାଳୟ ପରିସରରେ 120 ଜଣ ଗ୍ରାମୀଣ ରାଜ ମିସ୍ତ୍ରୀଙ୍କୁ ବିଭିନ୍ନ ସରଞ୍ଜାମ ବଣ୍ଟନ କରିଥିଲେ ।
ସେପଟେ ରାଜ୍ୟର ବରିଷ୍ଠ କୃଷି ବୈଜ୍ଞାନିକ ବିଷ୍ଣୁ ପ୍ରସାଦ ବେହେରା ବୌଦ୍ଧ ଜିଲ୍ଲାର ବଘିଆପଡା ନିକଟରେ ଥିବା କୃଷି ବିଜ୍ଞାନ କେନ୍ଦ୍ର ପରିଦର୍ଶନ କରିଥିଲେ । ତେବେ ବୌଦ୍ଧ ଜିଲ୍ଲାରେ ଜୈବିକ ଚାଷର ବିରାଟ ସମ୍ଭାବନା ରହିଥିବା ସେ ସୂଚନା ଦେଇଛନ୍ତି।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
