ବୌଦ୍ଧ: ଆନନ୍ଦ ଉଲ୍ଲାସର ସହିତ ପାଳିତ ହେଲା ୭୭ ତମ ଜିଲ୍ଲା ସ୍ତରୀୟ ସ୍ବାଧୀନତା ଦିବସ । ଜିଲ୍ଲାପାଳ ମୁଖ୍ୟ ଅତିଥି ରୂପେ ଜିଲ୍ଲା ସ୍ତରୀୟ ସ୍ବାଧୀନତା ଦିବସରେ ଯୋଗଦେଇ ଜାତୀୟ ପତାକାକୁ ଉତ୍ତୋଳନ କରିବା ସହିତ ଦେଶ ମାତୃକାର ମୁକ୍ତି ପାଇଁ ବଳିଦାନ ଦେଇଥିବା ସ୍ବାଧୀନତା ସଂଗ୍ରାମୀଙ୍କ ସ୍ମୃତି ଚାରଣ କରିଥିଲେ । ଏହି ଅବସରରେ ୧୦୦ ମିଟର ଲମ୍ବ ବିଶିଷ୍ଟ ତ୍ରିରଙ୍ଗା ପତାକାକୁ ଏକ ଶୋଭାଯାତ୍ରାରେ ସହର ପରିକ୍ରମା କରାଯାଇଥିଲା । ଯାହାକି ଆଜି ମୁଖ୍ୟ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଥିଲା । ତ୍ରିରଙ୍ଗା ପତାକା ଶୋଭାଯାତ୍ରାକୁ ଶତାୟୁ ସ୍ବାଧିନତା ସଂଗ୍ରାମୀ ଗୌର ମୋହନ ମିଶ୍ର ଶୁଭାରମ୍ଭ କରିଥିଲେ ।
ବୌଦ୍ଧ ଜିଲ୍ଲାପାଳ ନୃସିଂହ ଚରଣ ସ୍ବାଇଁ ମୁଖ୍ୟ ଅତିଥି ରୂପେ ଯୋଗଦେଇ ଜାତୀୟ ପତାକାକୁ ଉତ୍ତୋଳନ କରିବା ସହିତ ସମ୍ମିଳିତ ପରେଡରେ ଅଭିବାଦନ ଗ୍ରହଣ କରିଥିଲେ । ଏହି ଅବସରରେ ଜିଲ୍ଲାପାଳ ଭାରତ ମାତାଙ୍କ ସୁଯୋଗ୍ୟ ସନ୍ତାନଙ୍କୁ ସ୍ମରଣ କରିଥିଲେ । ଆଜି ଜିଲ୍ଲାରେ ବିଭିନ୍ନ କାର୍ଯ୍ୟକ୍ରମ ଓ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଯୋଜନାର ସଫଳତା ନେଇ ଜିଲ୍ଲାପାଳ ଆଶାବ୍ୟକ୍ତ କରିଥିଲେ । ବିଶେଷ ଭାବରେ ବୌଦ୍ଧ ଜିଲ୍ଲାର ବାନ୍ଧକଳା, ଦୁଗ୍ଧ ଉତ୍ପାଦନ, ଜୀବନ ଜୀବିକା ଭଳି ଅନେକ କ୍ଷେତ୍ରରେ ବିକାଶ ହୋଇ ପାରିଥିବାରୁ ନାଗରିକଙ୍କ ଯଥେଷ୍ଟ ଉନ୍ନତି ଘଟିପାରି ଥିବା ଜିଲ୍ଲାପାଳ ସୂଚନା ଦେଇଛନ୍ତି ।
ଜିଲ୍ଲା ଷ୍ଟାଡିୟମଠାରେ ପ୍ରଥମ ଥର ପାଇଁ ସ୍ବାଧୀନତା ଦିବସ ପାଳନ କରାଯାଇଥିବା ବେଳେ କାର୍ଯ୍ୟକ୍ରମରେ ସମ୍ମାନିତ ଅତିଥି ରୂପେ ଏସପି ରାଜ ପ୍ରସାଦ, ଅତିରିକ୍ତ ଜିଲ୍ଲାପାଳ, ଉପଜିଲ୍ଲାପାଳ ପ୍ରମୁଖ ଉପସ୍ଥିତ ଥିଲେ । ତେବେ ଏହି ଜାତୀୟ ଦିବସର ମୁଖ୍ୟ ଆକର୍ଷଣ ଥିଲା ୧୦୦ ମିଟର ଲମ୍ବ ବିଶିଷ୍ଟ ତ୍ରିରଙ୍ଗା ପତାକା । ବୌଦ୍ଧଠାରେ ସ୍ଥାନୀୟ ରଘୁନାଥ ମନ୍ଦିରଠାରୁ ଏକ ବିଶାଳ ଶୋଭାଯାତ୍ରାରେ ୧୦୦ ମିଟର ଲମ୍ବ ବିଶିଷ୍ଟ ତ୍ରିରଙ୍ଗା ପତାକାକୁ ସମ୍ମାନର ସହିତ ସହର ପରିକ୍ରମା କରାଯାଇଥିଲା ।
ଏଥିରେ ବୌଦ୍ଧର ବିଭିନ୍ନ ସଂଗଠନ, ବୁଦ୍ଧିଜିବୀ, କଳାକାର, ସୁରକ୍ଷାକର୍ମୀ, ଯୁବ ବର୍ଗ, ମହିଳା ଗୋଷ୍ଠୀ ସାମିଲ ହୋଇଥିଲେ । ପାରମ୍ପରିକ ଲୋକ ନୃତ୍ୟ ସଙ୍ଗୀତ ପରିବେଷଣ ସହିତ ମର୍ଜାକୁଦ ସେତୁଛକଠାରେ ରଙ୍ଗାରଙ୍ଗ ଦେଶାତ୍ମବୋଧକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଯାହାକୁ ଜିଲ୍ଲାବାସୀ ବେଶ ଉପଭୋଗ କରିଥିଲେ । ସ୍ବାଧୀନତା ଦିବସ ଅବସରରେ ଜିଲ୍ଲା ଉତ୍ସବମୁଖର ହୋଇପଡ଼ିଥିବା ଦେଖିବାକୁ ମିଳିଛି ।
ଇଟିଭି ଭାରତ, ବୌଦ୍ଧ
