ବରଗଡ଼: ଟାଉନ ଥାନା ଅନ୍ତର୍ଗତ ପାଣିଛତ୍ର ଗ୍ରାମରେ ଜଣେ 22 ବର୍ଷୀୟ ଯୁବକଙ୍କ ସନ୍ଦେହଜନକ ମୃତ୍ୟୁ । ଏପଟେ ଯୁବକଙ୍କ ଝୁଲନ୍ତା ମୃତଦେହ ଦେଖିବା ପରେ ଏହାକୁ ହତ୍ୟାକାଣ୍ଡ ବୋଲି ଅଭିଯୋଗ ଆଣିଛନ୍ତି ପରିବାର ଲୋକେ । ତେବେ ମୃତ ଯୁବକଙ୍କ ଗୋଡ଼ ମାଟିରେ ଯେଉଁଭଳି ଭାବରେ ରହିଛି ପୋଲିସ ମଧ୍ୟ ପାରିପାର୍ଶ୍ବିକ ସ୍ଥିତିରୁ ଅନୁଧ୍ୟାନ କରି ହତ୍ୟାକାଣ୍ଡ ବୋଲି ସନ୍ଦେହ କରିଛି ।
ସୂଚନା ଅନୁଯାୟୀ, ଗତ ରବିବାର ବରଗଡ଼ ଟାଉନ ଥାନା ଅନ୍ତର୍ଗତ ପାଣିଛତ୍ର ଗ୍ରାମର ଦିଲ୍ଲୀପ ହିଆଲ ନାମକ 22 ବର୍ଷର ଯୁବକ, ଘରୁ ଶୌଚ ଯାଉଛି କହି ଆଉ ଘରକୁ ଫେରିନଥିଲେ । ବହୁ ଖୋଜାଖୋଜି ପରେ ମଧ୍ୟ ପରିବାର ଲୋକେ ତାଙ୍କୁ ପାଇନଥିଲେ । ତେବେ ଗତକାଲି(ସୋମବାର) ଦିଲ୍ଲୀପଙ୍କର ଝୁଲନ୍ତା ମୃତଦେହ ପାଣିଛତ୍ରଠାରେ ଥିବା ଏକ ଦୋକାନ ସମ୍ମୁଖରେ ଦେଖିବାକୁ ମିଳିଥିଲା । ସ୍ଥାନୀୟ ଲୋକେ ଦେଖିବା ପରେ ଏନେଇ ପରିବାର ଲୋକ ଏବଂ ପୋଲିସକୁ ଖବର ଦେଇଥିଲେ ।
ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ପଠେଇଥିଲା । ତଦନ୍ତରୁ ଜଣାପଡ଼ିଛି ଯେ, ଦିଲ୍ଲୀପଙ୍କର ପୂର୍ବ ଦିନ କିଛି ଯୁବକଙ୍କ ସଙ୍ଗେ ଗଣ୍ଡଗୋଳ ହୋଇଥିଲା । ତେବେ ଦିଲ୍ଲୀପଙ୍କ ସନ୍ଦେହଜନକ ମୃତ୍ୟୁ ସହିତ ଏହି ଗଣ୍ଡଗୋଳର ସମ୍ପର୍କ ଥିବାର ପୋଲିସ ସନ୍ଦେହ କରିଛି ଏବଂ ସେହିଦିଗରେ ଅଧିକ ତଦନ୍ତ ଜାରି ରଖିଛି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
