ବରଗଡ: ଜିଲ୍ଲାର ପଦ୍ମପୁର ଉପଖଣ୍ଡରେ ଅପରାଧ ଦିନକୁ ଦିନ ବଢିଚାଲିଛି । ଏହାସହ ଖଣି ମାଫିଆଙ୍କ ଗୁଣ୍ଡାରାଜ ମଧ୍ୟ ବୃଦ୍ଧି ପାଉଛି । ହେଲେ ଏହି ଅଞ୍ଚଳରେ ପୋଲିସର ନିଷ୍କ୍ରିୟତା ଅଞ୍ଚଳବାସୀଙ୍କୁ ନାରାଜ କରିଛି । ନିକଟରେ ଘଟିଥିବା ନାବାଳିକା ହତ୍ୟାକାଣ୍ଡ ମାମଲାରେ ପୋଲିସର ଶିଥିଳତା ଲୋକଙ୍କ ଭିତରେ ଅସନ୍ତୋଷ ସୃଷ୍ଟି କରିଛି ।
ଗତ ଜୁନ ୧୨ ତାରିଖ ରାତିରେ ଜଗଦଲପୁର ଥାନା ଅନ୍ତର୍ଗତ ଲଉଡି ଦର୍ହା ଗ୍ରାମରେ ଘଟିଥିଲା ଏହି ଅଘଟଣ । ଏଠାରେ ବିରଞ୍ଚି ସାମଲଙ୍କ ୧୪ ବର୍ଷିୟା ନାବାଳିକା ଘରୁ ନିଖୋଜ ହୋଇଯାଇଥିଲା । ଘର ଲୋକେ ବହୁ ଖୋଜାଖୋଜି କଲା ପରେ ରାତିରେ ନାବାଳିକାଙ୍କ ମୃତଦେହ ପାଇଥିଲେ । ସେହି ଗ୍ରାମର ଭୁବନେଶ୍ବର ପ୍ରଧାନଙ୍କ କ୍ଷେତ ନିକଟରେ ଏକ କୂଅ ପରିସରରୁ ଏହା ମିଳିଥିଲା ।
ପରିବାର ଲୋକେ ଜଗଦଳପୁର ପୋଲିସକୁ ଜଣାଇ ହତ୍ୟାର କାରଣ ପ୍ରେମ ଜନିତ ହୋଇଥିବାର କହିଥିଲେ । ନାବାଳିକାଙ୍କର ସେହି ଗ୍ରାମର ଭୁବନେଶ୍ବର ପ୍ରଧାନଙ୍କ ପୁଅ ସନ୍ଦେଶ ପ୍ରଧାନ ସହିତ ପ୍ରେମ ସମ୍ପର୍କ ରହିଥିଲା । ତେବେ ହଠାତ ରାତିରେ ନାବାଳିକା ନିଖୋଜ ହେବା ଓ ତାର ମୃତଦେହ ପ୍ରେମିକଙ୍କ ବିଲ ନିକଟରେ ପଡିଥିବା ଘଟଣାରେ ଘର ଲୋକେ ସନ୍ଦେଶ ପ୍ରଧାନକୁ ହତ୍ୟାକାରୀ ବୋଲି ସନ୍ଦେହ କରିଥିଲେ ।
ଏନେଇ ଜଗଦଳପୁର ଥାନାରେ ଜୁନ ୧୩ ତାରିଖରେ ଏତଲା ଦେଇଥିଲେ । ଜଗଦଳପୁର ପୋଲିସ କିନ୍ତୁ ସନ୍ଦେହ ଘେରରେ ରହିଥିବା ସନ୍ଦେଶ ପ୍ରଧାନକୁ ଥାନାରେ ଆଣି ଅଟକାଇ ରଖିଥିଲା । ତେବେ ଉକ୍ତ ହତ୍ୟାକାଣ୍ଡ ଘଟଣାରେ ପରିବାର ଲୋକେ ଦେଇଥିବା FIR କପି ପରିବାର ଲୋକଙ୍କୁ ଥାନାଅଧିକାରୀ ହସ୍ତଗତ କରୁନଥିବା ଅଭିଯୋଗ ହୋଇଛି ।
ଜଗଦଳପୁର ପୋଲିସର ନିଷ୍କ୍ରିୟତା ଯୋଗୁଁ ସ୍ଥାନୀୟ ଅଞ୍ଚଳବାସୀ ନାରାଜ ହେଉଛନ୍ତି । ଚୋରି ଡକାୟତି ଭଳି ସାଧାରଣ କଥା ଛାଡନ୍ତୁ ଅତି ସମ୍ବେଦନଶୀଳ ହତ୍ୟାକାଣ୍ଡ ଘଟଣାର ଅଭିଯୋଗରେ ମଧ୍ୟ ଜଗଦଳପୁର ପୋଲିସ ଚୁପ ରହୁଥିବା ବାରମ୍ବାର ଅଭିଯୋଗ ହେଉଛି । ଜିଲ୍ଲା ପୋଲିସର ହେଡ ଅଫିସ ବରଗଡ ହୋଇଥିବା ବେଳେ ଏଠାରୁ ୧୦୦ କିଲୋମିଟର ଦୂରରେ ରହିଛି ଜଗଦଳପୁର ଥାନା । ଏହି ଅଞ୍ଚଳରେ ପୋଲିସ ବିଭାଗର ମୁଖ୍ୟ SDPO ହୋଇଥିବା ବେଳେ ଜିଲ୍ଲା ପୋଲିସ ବିଭାଗର ମୁଖ୍ୟ ଏସପିଙ୍କ ନିକଟକୁ ଏଠାକାର ଟିକିନିକି ଖବର ପହଞ୍ଚିବା ସମ୍ଭବ ହୋଇପାରୁନାହିଁ । ଯାହାର ଫାଇଦା ଉଠାଉଛନ୍ତି ପଦ୍ମପୁର ଉପଖଣ୍ଡ ଅଞ୍ଚଳରେ ରହିଥିବା ଥାନାର ପୋଲିସ ଅଧିକାରୀ ବୋଲି ଲୋକେ ଅଭିଯୋଗ କରିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
