ବାଲେଶ୍ବର: ବାଲିଆପାଳରେ ଥମିବାରେ ନାଁ ନେଉନି ଉତ୍ତେଜନା । ଗତକାଲିଠାରୁ ଲୋକଙ୍କ ମଧ୍ୟରେ ଥିବା ଅସନ୍ତୋଷ ତିଳେ ମାତ୍ର ବି କମିନାହିଁ । ଯାହାକୁ ନେଇ ପୁଣିଥିରେ ସ୍ଥାନୀୟ ଲୋକେ ବାଲିଆପାଳରେ ରାସ୍ତାରୋକ କରିଛନ୍ତି । ନାବାଳକର ସନ୍ଦେହଜନକ ମୃତ୍ୟୁକୁ ନେଇ ପରିବାର ତଥା ଗ୍ରାମବାସୀଙ୍କ ପକ୍ଷରୁ ତୀବ୍ର ବିରୋଧ କରାଯିବା ସହ କମର୍ଦ୍ଦା ବାଲିଆପାଳ ରାସ୍ତା ଅବରୋଧ କରିଛନ୍ତି ଶତାଧିକ ଲୋକ ।
ସୂଚନା ମୁତାବକ ଭୋଗରାଇ ବ୍ଲକ କମର୍ଦ୍ଦା ଥାନା ଅଧିନସ୍ଥ ଉଳୁଡା ଗ୍ରାମର ଦେବେନ୍ଦ୍ର ଦଳାଇଙ୍କ ପୁଅ ବିଜୟ(୧୭) ବାଲିଆପାଳସ୍ଥିତ ଏକ ହୋଟେଲ ଢାବାରେ ଦେଢ ବର୍ଷ ହେଲା କାମ କରୁଥିଲେ । ଗତକାଲି ତାଙ୍କର ସନ୍ଦେହଜନକ ମୃତ୍ୟୁ ଘଟଣାରେ ପ୍ରବଳ ଉତ୍ତେଜନା ପ୍ରକାଶ ପାଇଥିଲା । ସନ୍ଧ୍ୟା ହେବାରୁ ଆଜି ସକାଳେ ଶବ ବ୍ୟବଚ୍ଛେଦ ହେବ ବୋଲି ପରିବାର ଲୋକଙ୍କୁ କୁହାଯାଇଥିଲା । ମାତ୍ର ଆଜି ସକାଳେ ହଠାତ୍ ପରିବାର ଲୋକଙ୍କ ଅନୁପସ୍ଥିତିରେ ଶବକୁ ବ୍ୟବଚ୍ଛେଦ କରି ମୃତକଙ୍କ ଘରକୁ ପଠାଇ ଦିଆଯାଇଥିଲା ।
ଏହାକୁ ନେଇ ଗାଁରେ ପ୍ରବଳ ଉତ୍ତେଜନା ପ୍ରକାଶ ପାଇଥିଲାବେଳେ ଉତ୍ୟକ୍ତ ଲୋକେ ଟାୟାର ଜାଳି କମର୍ଦ୍ଦା ବାଲିଆପାଳ ରାସ୍ତାର ଉଳୁଡା ଠାରେ ରାସ୍ତା ଅବରୋଧ କରିଥିବା ଦେଖିବାକୁ ମିଳିଛି । ଏପରିକି ଜିଲ୍ଲାପାଳଙ୍କ ହସ୍ତକ୍ଷେପ ଲୋଡିବା ସହିତ ଶବ ବ୍ୟବଚ୍ଛେଦ ସମୟର ଭିଡିଓ ଦାବି କରିଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
