ବାଲେଶ୍ଵର: ସଡକ ଦୁର୍ଘଟଣାରେ ନାବାଳିକାର ମୃତ୍ୟୁ ଅଭିଯୋଗ । ବାଲେଶ୍ଵର ବସ୍ତା ଥାନା ଅଧିନ ଇନ୍ଦିରା ଛକ ଠାରେ ଏହି ଦୁର୍ଘଟଣା ଘଟିଛି । ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଚାପା ଉତ୍ତେଜନା ଦେଖାଦେଇଛି ।
ସୂଚନା ଅନୁସାରେ, ବୁଧବାର ସକାଳେ ବସ୍ତା ବ୍ଲକ ବାଗଲଡିହା ଗ୍ରାମର ବିପ୍ଳବ ଗାଆଣଙ୍କ ୫ବର୍ଷର ଝିଅ ଖୁସି ଜଳେଶ୍ଵର ବ୍ଲକ ସୁଗ ଗ୍ରାମର ମାମୁଁଘରୁ ନିଜ ମାଙ୍କ ସହ ଫେରୁଥିବା ସମୟରେ ଇନ୍ଦିରା ଛକରେ ଗାଡିରୁ ଓହ୍ଲାଇଥିଲେ । ରାଜପଥରୁ ୩୦ଫୁଟ ତଳକୁ ଓହ୍ଲାଇ ଘରକୁ ଯିବା ସମୟରେ ଖୁସିର ଗୋଡ଼ ଖସି ଯିବାରୁ ସେ ରାସ୍ତା ଉପରେ ପଡିଯାଇଥିଲେ ।
ଏହି ସମୟରେ ସେହି ରାସ୍ତା ଦେଇ ଯାଉଥିବା ଏକ ଟ୍ରକ ଖୁସି ଉପରେ ଚଢ଼ି ଯାଇଥିଲା । ସ୍ଥାନୀୟ ଲୋକେ ଗୁରୁତର ଅବସ୍ଥାରେ ତାଙ୍କୁ ବସ୍ତା ଡ଼ାକ୍ତରଖାନାକୁ ନେଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ଦୁର୍ଘଟଣାକୁ କେନ୍ଦ୍ର କରି ଘଟଣାସ୍ଥଳରେ ଉତ୍ତେଜନା ଦେଖାଦେଇଛି ।
ମୃତ ନାବାଳିକା ପରିବାରକୁ କ୍ଷତିପୂରଣ ଦାବିରେ 60ନମ୍ବର ଜାତୀୟ ରାଜପଥ ଇନ୍ଦିରା ଛକ ନିକଟରେ ରାସ୍ତା ଅବରୋଧ କରିଥିବା ଦେଖିବାକୁ ମିଳିଛି ।
ବାଲେଶ୍ବରରୁ ଜୀବନଜ୍ୟୋସି ନାୟକ, ଇଟିଭି ଭାରତ
