ଅହମ୍ମଦାବାଦ: ଗୁଜୁରାଟର ଅହମ୍ମଦାବାଦସ୍ଥିତ ନରେନ୍ଦ୍ର ମୋଦି ଷ୍ଟାଡିୟମରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ବର୍ଡର ଗାଭାସ୍କର ଟ୍ରଫିର ଶେଷ ଟେଷ୍ଟର ଚତୁର୍ଥ ଦିନର ଖେଳ ଶେଷ ହୋଇଛି । ଚତୁର୍ଥ ଦିନର ଖେଳ ଶେଷ ସୁଦ୍ଧା ଭାରତ ସମସ୍ତ ୱିକେଟ ହରାଇ ୫୭୧ ରନ ସଂଗ୍ରହ କରିଛି । ତେବେ ଏହି ମ୍ୟାଚ୍ରେ ଚୂଡ଼ାନ୍ତ ଏକାଦଶରେ ସ୍ଥାନ ପାଇଥିଲେ ମଧ୍ୟ ବ୍ୟାଟିଂ କରିବାକୁ ଆସିନଥିଲେ ଶ୍ରେୟସ ଆୟର । ହଠାତ ତାଙ୍କ ପିଠିରେ ଯନ୍ତ୍ରଣା ଅନୁଭବ ହେବାରୁ ତାଙ୍କୁ ସ୍କାନ୍ ପାଇଁ ନିଆଯାଇଥିବା ଜଣାପଡ଼ିଛି ।
ବର୍ଡର ଗାଭାସ୍କର ଟ୍ରଫିର ଚତୁର୍ଥ ତଥା ଶେଷ ଟେଷ୍ଟ ମ୍ୟାଚ୍ର ଚତୁର୍ଥ ଦିନରେ ଭାରତର ପ୍ରଥମ ପାଳି ବ୍ୟାଟିଂ ସରିଛି । ଚତୁର୍ଥ ଦିନର ଖେଳ ଶେଷ ସୁଦ୍ଧା ଭାରତ ସମସ୍ତ ୱିକେଟ ହରାଇ ୫୭୧ ରନ ସଂଗ୍ରହ କରିଛି । କିଙ୍ଗ କୋହଲିଙ୍କ ୧୮୬ ଓ ଶୁଭମନ ଗିଲଙ୍କ ୧୨୮ ରନର ପାଳି ବଳରେ ଭାରତ ଭ୍ରମଣକାରୀ ଦଳ ଠାରୁ ୯୧ ରନ ଆଗୁଆ ରହି ପ୍ରଥମ ପାଳି ଶେଷ କରିଛି । ତେବେ ଏଥିରେ ଭାରତ ପକ୍ଷରୁ କେବଳ ୧୦ ଜଣ ଖେଳାଳି ଖେଳିଥିଲେ । ଚୂଡ଼ାନ୍ତ ଏକାଦଶରେ ସ୍ଥାନ ପାଇଥିବା ଶ୍ରେୟସ ଆୟର ଏହି ମ୍ୟାଚ୍ରେ ଖେଳିବାକୁ ଆସିନଥିଲେ । ରବିନ୍ଦ୍ର ଜାଡ଼େଜା ଆଉଟ ହେବାପରେ ଶ୍ରେୟସ ଆୟର ବ୍ୟାଟିଂ ପାଇଁ ଆସିବାର ଥିଲା । କିନ୍ତୁ ତାଙ୍କ ସ୍ଥାନରେ ୱିକେଟ ରକ୍ଷକ ବ୍ୟାଟର ଶ୍ରୀକର ଭରତ ଆସିଥିଲେ । ତେବେ ପାଳି ଶେଷ ପର୍ଯ୍ୟନ୍ତ ମଧ୍ୟ ପିଚ୍କୁ ଆସି ନଥିଲେ ଆୟର ।
ଏହା ମଧ୍ୟ ପଢ଼ନ୍ତୁ... BGT 4th Test, Day-4 Stumps: କୋହଲିଙ୍କ ବିରାଟ ପାଳି, ସିରିଜ ବିଜୟ ମୁହାଁ ଭାରତ
ତେବେ ଜଣାପଡ଼ିଛି ଯେ ଶ୍ରେୟସ ଆୟରଙ୍କ ପିଠିରେ ଯନ୍ତ୍ରଣା ଅନୁଭବ ହେବାରୁ ସେ ଖେଳିବାକୁ ଆସିନଥିଲେ । ଗତ ଜାନୁଆରୀ ମାସରେ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ଶୃଙ୍ଖଳାରୁ ମଧ୍ୟ ଏହି କାରଣରୁ ବାଦ ପଡ଼ିଥିଲେ ଆୟର । ତାଙ୍କୁ ସତର୍କତା ଦୃଷ୍ଟିରୁ ବାଙ୍ଗାଲୋରସ୍ଥିତ ନାସନାଲ କ୍ରିକେଟ ଏକାଡେମୀକୁ ପଠାଯାଇଥିଲା । ତେବେ ପୁଣିଥରେ ଯୁବ ତାରକା ବ୍ୟାଟର ଶ୍ରେୟସ ଆୟରଙ୍କ ଏଭଳି ଯନ୍ତ୍ରଣା ଭାରତୀୟ ଦଳ ପାଇଁ ଚିନ୍ତାର ବିଷୟ ପାଲଟିଛି । ତେବେ ଆଜି ଚତୁର୍ଥ ଦିନର ଖେଳ ଶେଷ ସୁଦ୍ଧା ଭାରତ ଭ୍ରମଣକାରୀ ଦଳ ଅଷ୍ଟ୍ରେଲିଆଠାରୁ ୮୮ ରନରେ ଆଗୁଆ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
