ହାଇଦ୍ରାବାଦ: ଲକ୍ଷଣ ଗୁଡିକ ଉପରେ ଆଧାର କରି ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି ଯୋଧପୁର (IIT Jodhpur) ବୃଦ୍ଧଙ୍କ ଦୂରାରୋଗ୍ୟ ଆଲଜାଇମର(ଭୁଲିବା ରୋଗ)କୁ ଠିକ ସମୟରେ ଚିହ୍ନଟ କରିବାରେ ଏକ ସହାୟକ କୌଶଳ ପ୍ରସ୍ତୁତ କରିଛନ୍ତି(New Technique To Detect Alzheimer) । ଏହି କୌଶଳ ସହିତ, ମସ୍ତିଷ୍କର ସ୍ମୃତିକୁ ଦୁର୍ବଳ କରୁଥିବା କାରକ(ଆଲଜାଇମର ଲକ୍ଷଣ) ଠାବ କରାଯାଇପାରିବ ।
ଏଥିପାଇଁ ଲ୍ୟାବରେ ଏକ ନୂତନ ଅଣୁ ମଲିକୁଲାର ପ୍ରୋବ ଆବିଷ୍କୃତ ହୋଇଥିଲା, ଯାହା ମସ୍ତିଷ୍କକୁ ଯାଇ ଫ୍ଲୋରୋସେଣ୍ଟ ଲ୍ୟାମ୍ପ ମାଧ୍ୟମରେ ଆଲଜାଇମର କାରକୁ ଚିହ୍ନଟ କରିବ । ଏନେଇ ଲ୍ୟାବରେ ଥିବା ମୂଷାଙ୍କ ମସ୍ତିଷ୍କ ଉପରେ ପରୀକ୍ଷଣ ସଫଳତାର ସହିତ କରାଯାଇଛି । ଏହି ପରୀକ୍ଷଣର ଫଳାଫଳ ଦୀର୍ଘ 5 ବର୍ଷ ପରେ ପ୍ରକାଶ ପାଇଛି । ବିଶ୍ବ ଆଲଜାଇମର ଦିବସ(World alzheimer's day 2022)ରେ ଅନୁସନ୍ଧାନକାରୀଙ୍କୁ ଏକ ବଡ ସଫଳତା ମିଳିଛି ।
ଆଇଆଇଟି ଯୋଧପୁରର ଜୈବ ବିଜ୍ଞାନ ବିଭାଗର ପ୍ରଫେସର ଡ. ସୁରଜିତ ଘୋଷ କହିଛନ୍ତି ଯେ, ‘‘ଆମେ ପ୍ରସ୍ତୁତ କରିଥିବା ନୂତନ କୌଶଳ ଆଲଜାଇମର ଆମିଲଏଡ ବିଟା ଏଗ୍ରିଗେଟକୁ ଚିହ୍ନଟ କରିଥାଏ । ଆଲଜାଇମରରେ, ଆମିଲଏଡ୍ ବିଟା ଏକ ଏଗ୍ରିଗେଟ୍ ଭାବରେ ମସ୍ତିଷ୍କରେ ଜମା ହୋଇଥାଏ, ଯେଉଁ କାରଣରୁ ନ୍ୟୁରନ୍(ସ୍ନାୟୁ) ପ୍ରଭାବିତ ହୁଏ । ଏହା ଧୀରେ ଧୀରେ ସ୍ମୃତି ଉପରେ ପ୍ରଭାବ ପକାଇଥାଏ । ବିକଶିତ ଅଣୁ ମାଧ୍ୟମରେ ଏହି ଆମିଲଏଡ୍ ବିଟା ଏଗ୍ରିଗେଟର ଉପସ୍ଥିତି ଚିହ୍ନଟ ହୁଏ ।’’
ଏହି ଅନୁସନ୍ଧାନ SCS କେମିକାଲ୍ ନ୍ୟୁରୋ ସାଇନ୍ସ ଜର୍ଣ୍ଣାଲରେ ପ୍ରକାଶ ପାଇଛି । ଏହି ଅନୁସନ୍ଧାନରେ ତାଙ୍କର ଅନୁସନ୍ଧାନକାରୀ ରତ୍ନାମ ମାଲାଇସ୍, ଜୁହି ଖାନ୍ ଏବଂ ରାଜଶେଖର ରୟ (Researchers Ratnam Malais, Juhi Khan and Rajshekhar Roy, Biosciences Department, IIT Jodhpur) ସାମିଲ୍ ଥିଲେ । ଡକ୍ଟର ଘୋଷ କହିଛନ୍ତି ଯେ ଅଲଜାଇମର ଚିହ୍ନଟ ପାଇଁ ବ୍ରିଟେନ ଏବଂ ଆମେରିକାରେ ଏହାର କାର୍ଯ୍ୟ ଚାଲିଛି । ବିଭିନ୍ନ ଅନ୍ୟାନ୍ୟ ଟିମ୍ ମଧ୍ୟ ଏ ଉପରେ କାର୍ଯ୍ୟ କରୁଛନ୍ତି । ଆମେ ରୋଗ ଚିହ୍ନଟ ସହ ଥେରାପି ବିକଶିତ ପାଇଁ କାର୍ଯ୍ୟ କରୁଛୁ ।
Alzheimer କ'ଣ ?
ଏହା ଏକ ମସ୍ତିସ୍କଜନିତ ସମସ୍ୟା, ଏହି କାରଣରୁ ସ୍ମୃତିଶକ୍ତି ହ୍ରାସ ପାଇଥାଏ । ବୟସ୍କମାନଙ୍କ ଠାରେ ଏହି ସମସ୍ୟା ଅଧିକ ଦେଖାଦିଏ । ଆଲଜାଇମର ଏବଂ ଆନୁଷଙ୍ଗିକ ଡିସଅର୍ଡର୍ସ ସୋସାଇଟି ଅଫ୍ ଇଣ୍ଡିଆର ଡିମେନ୍ସିଆ ଇଣ୍ଡିଆ ରିପୋର୍ଟ ଅନୁଯାୟୀ, 2010 ମସିହାରେ ଦେଶରେ ପ୍ରାୟ 37 ଲକ୍ଷ ଲୋକ ଆଲଜାଇମର ରୋଗରେ ପୀଡିତ ଥିଲେ । 2030 ସୁଦ୍ଧା ଏହି ସଂଖ୍ୟା 7.6 ମିଲିୟନକୁ ବୃଦ୍ଧି ପାଇବ ବୋଲି ସୋସାଇଟି ଆକଳନ କରିଛି । ଏହାର କାରଣ ହେଉଛି ଅଲଜାଇମର ବିଷୟରେ ଲୋକଙ୍କ ମଧ୍ୟରେ ସଚେତନତାର ଅଭାବ । ବିଶେଷକରି ଗ୍ରାମାଞ୍ଚଳ ଏବଂ ସହରରେ ଲୋକମାନେ ଏହାର ଲକ୍ଷଣ ବିଷୟରେ ଅବଗତ ନୁହଁନ୍ତି । ଏପରି ପରିସ୍ଥିତିରେ ଲୋକଙ୍କୁ ସଚେତନ କରାଇବା ଆବଶ୍ୟକ । ଯାହାଫଳରେ ଠିକ୍ ସମୟରେ ଯତ୍ନ ନିଆଗଲେ ରୋଗର ଭୟାବହତାକୁ ଏଡାଇ ଦିଆଯାଇ ପାରିବ । ଏଥିପାଇଁ ପ୍ରତିବର୍ଷ ଆଜିର ଦିନ ଅର୍ଥାତ୍ ସେପ୍ଟେମ୍ବର 21 କୁ ବିଶ୍ବ ଆଲଜାଇମର ଦିବସ ରୂପେ ପାଳନ କରାଯାଉଛି ।
