ମୁମ୍ବାଇ: ଦିବଙ୍ଗତ ହାସ୍ୟ କଳାକାର ରାଜୁ ଶ୍ରୀବାସ୍ତବଙ୍କ ଆତ୍ମାର ସଦଗତି ପାଇଁ ପରିବାର ପକ୍ଷରୁ ଆଜି ଏକ ପ୍ରାର୍ଥନା ସଭାର ଆୟୋଜନ କରାଯାଇଥିଲା । ଏହି ପ୍ରାର୍ଥନା ସଭାରେ ରାଜୁଙ୍କ ଅନେକ ବନ୍ଧୁ ଓ ସହ କଳାକାର ଆସି ଯୋଗ ଦେଇଥିଲେ । ତେବେ ଏହି ସଭାରେ ରାଜୁଙ୍କ କଥା ମନେ ପକାଇ ଭାଙ୍ଗିପଡ଼ିଥିଲେ ତାଙ୍କ ପତ୍ନୀ । ଏହି ଦୃଶ୍ୟ ଉପସ୍ଥିତ ସଭିଁଙ୍କ ଆଖିରେ ଲୁହ ଆଣି ଦେଇଥିଲା ।
ରାଜୁ ଶ୍ରୀବାସ୍ତବଙ୍କ ଆତ୍ମାର ସଦଗତି ପାଇଁ ଆୟୋଜିତ ପ୍ରାର୍ଥନା ସଭାରେ କପିଲ ଶର୍ମା, ଭାରତୀ ସିଂହ, ଜନି ଲିଭର, ନିଲ୍ ନୀତିନ ମୁକେଶ, କେକେ ମେନନ୍, ଏହଶାନ କ୍ୟୁରେସୀ ଓ କିକୁ ଶାରଦା ପ୍ରମୁଖ ଯୋଗ ଦେଇଥିଲେ । ପ୍ରାର୍ଥନା ସଭାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ସେ ଅତି ଦୁଃଖର ସହ ରାଜୁଙ୍କୁ ମନେ ପକାଇଛନ୍ତି ।
ଏହା ବି ପଢ଼ନ୍ତୁ ପଞ୍ଚଭୂତରେ ବିଲୀନ ରାଜୁ ଶ୍ରୀବାସ୍ତବ, ଆଧୁନିକ ଉପାୟରେ ହୋଇଥିଲା ମୃତଦେହ ବ୍ୟବଚ୍ଛେଦ
ରାଜୁଙ୍କ ପତ୍ନୀ କହିଥିଲେ, "ମୋ ଜୀବନରେ ଆଉ କିଛି ବାକି ନାହିଁ । ମୋ ଜୀବନର ଅନ୍ତ ହୋଇଗଲା । ସମସ୍ତେ ତାଙ୍କ ପାଇଁ ପ୍ରାର୍ଥନା କଲେ, ଡାକ୍ତର ମଧ୍ୟ ପ୍ରଚେଷ୍ଟା କରିଥିଲେ, ଆମେ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ । ସେ ଆମ ସମସ୍ତଙ୍କୁ ହସାଇଥିଲେ । ମୁଁ ନିଶ୍ଚିତ ଯେ, ସେ ସ୍ବର୍ଗରେ ରହି ମଧ୍ୟ ହସାଉଥିବେ । ତାଙ୍କ ଆତ୍ମାର ସଦଗତି ହେଉ । ତାଙ୍କ ବନ୍ଧୁମାନେ ଆମକୁ ବହୁତ ସାହାଯ୍ୟ କରିଛନ୍ତି । ଧନ୍ୟବାଦ ।" ଏତିକି କହି ସେ କାନ୍ଦି ପକାଇଥିଲେ । ଏହାପରେ ସେଠାରେ ଉପସ୍ଥିତ ସମସ୍ତ ଅତିଥିବୃନ୍ଦଙ୍କ ଆଖିରେ ବି ଲୁହ ଆସି ଯାଇଥିଲା ।
ଏହାପୂର୍ବରୁ ଗତ ରବିବାର ରାଜୁ ଶ୍ରୀବାସ୍ତବଙ୍କ ଝିଅ ନିଜ ବାପାଙ୍କୁ ମନେ ପକାଇଥିଲେ । ଏକ ଭିଡିଓରେ ସେ କହିଛନ୍ତି ଯେ, କିଭଳି ତାଙ୍କ ବାପା ଏକ ମାସରୁ ଅଧିକ ସମୟ ଧିର ହସ୍ପିଟାଲରେ ରହିବା ପରେ ବି ଗୋଟିଏ ଶବ୍ଦ କହିନଥିଲେ । ରାଜୁ ଶ୍ରୀବାସ୍ତବଙ୍କ ପରିବାର ବର୍ତ୍ତମାନ ମୁମ୍ବାଇ ଛାଡ଼ି ଦିଲ୍ଲୀ ଫେରି ଆସିବେ । କାନପୁରରେ ମଧ୍ୟ ରାଜୁଙ୍କ ପାଇଁ ଏକ ପ୍ରାର୍ଥନା ସଭାର ଆୟୋଜନ କରାଯିବ । ରାଜୁଙ୍କ ଝିଅ ଅନ୍ତରା କହିଛନ୍ତି, "କାନପୁର ବାପାଙ୍କ ଘର ଥିଲା । ତେଣୁ ଏଠାରେ ମଧ୍ୟ ଆମେ ବାପାଙ୍କ ପାଇଁ ପ୍ରାର୍ଥନା ସଭାର ଆୟୋଜନ କରିବୁ ।"
ଗତ ସେପ୍ଟେମ୍ବର ୨୧ ତାରିଖରେ ଭେଟେରାନ କମେଡିଆନ୍ ରାଜୁ ଶ୍ରୀବାସ୍ତବଙ୍କ ପରଲୋକ ହୋଇଥିଲା । ଛାତିରେ ଯନ୍ତ୍ରଣା ହେବାପରେ ସେ କୋମାକୁ ଚାଲି ଯାଇଥିଲେ । ୪୧ ଦିନ ଧରି ଦିଲ୍ଲୀ ଏମ୍ସରେ ଚିକିତ୍ସିତ ହେବାପରେ ଶେଷ ନିଃଶ୍ବାସ ତ୍ୟାଗ କରିଥିଲେ ରାଜୁ । ଏହାପରେ ଫିଲ୍ମ ଜଗତରେ ଶୋକର ଛାୟା ଖେଳି ଯାଇଥିଲା ।
