ହାଇଦ୍ରାବାଦ: ନିକଟରେ ରିଲିଜ ହୋଇଛି ହଲିଉଡ ଫିଲ୍ମ ଓପେନହାଇମର । ଗୋଟିଏ ପଟେ ଏହି ଫିଲ୍ମ ବକ୍ସ ଅଫିସରେ ଧମାକା କରୁଥିବା ବେଳେ ଅନ୍ୟ ପଟେ ଫିଲ୍ମର ଏକ ସିନକୁ ନେଇ ବିବାଦ ବଢିବାରେ ଲାଗିଛି । ଏନେଇ ଅନେକ ଫିଲ୍ମକୁ ବୟକଟ କରିବାକୁ ଦାବି ଉଠିବାରେ ଲାଗିଛି । ବର୍ତ୍ତମାନ କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ମଧ୍ୟ ଫିଲ୍ମରେ ଥିବା ସିନ୍କୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ସେ ଏନେଇ ସେଣ୍ଟ୍ରାଲ୍ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ୍ (ସେନ୍ସର ବୋର୍ଡ) ଉପରେ ବର୍ଷିଛନ୍ତି ।
ରିପୋର୍ଟ ଅନୁଯାୟୀ, ଅନୁରାଗ ଠାକୁର ସେନ୍ସର ବୋର୍ଡକୁ ପଚାରିଛନ୍ତି ଯେ, ଏହି ସିନ୍ କିପରି ସେ ପାରିତ କରିଛନ୍ତି ? ଓପେନହାଇମର ଏହି ସିନ କାହିଁକି ଫିଲ୍ଟର ହୋଇନାହିଁ ? କେବଳ ଏତିକି ନୁହେଁ, ଏହି ସିନ୍ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ସେ ଏହାକୁ ଫିଲ୍ମରୁ ହଟାଇବାକୁ କହିଛନ୍ତି । ଏଥିପାଇଁ ଦାୟୀ ଅଧିକାରୀଙ୍କ ବିରୋଧରେ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ବୋଲି ମଧ୍ୟ କହିଛନ୍ତି ।
ସୂଚନା ଥାଉ କି, ଏହି ଚଳଚ୍ଚିତ୍ରଟି ପ୍ରଥମ ପରମାଣୁ ବୋମା ତିଆରି କରିଥିବା ବୈଜ୍ଞାନିକ ଜେ. ରୋବର୍ଟ ଓପେନହାଇମରଙ୍କ ଜୀବନୀ ଉପରେ ଆଧାରିତ । ଜେ ରୋବର୍ଟ ଓପେନହାଇମର ଭଗ୍ବତ୍ ଗୀତା ପଢୁଥିଲେ, ଫିଲ୍ମରେ ଓପେନହାଇମର ଇଣ୍ଟିମେଟ୍ ସିନ ସମୟରେ ଭଗବତ୍ ଗୀତା ପଢୁଥିବା ଦେଖିବାକୁ ମିଳିଛି, ଯାହାକୁ ନେଇ ବର୍ତ୍ତମାନ ବିବାଦ ସୃଷ୍ଟି ହୋଇଛି । ଫିଲ୍ମରେ ଏହା ଦର୍ଶାଯାଇଛି ଯେ ଓପେନହାଇମର ଭୂମିକାରେ ଅଭିନୟ କରୁଥିବା ପ୍ରସିଦ୍ଧ ଅଭିନେତା ସିଲିୟାନ୍ ମର୍ଫି ତାଙ୍କ ପ୍ରେମିକାଙ୍କ ସହ ଇଣ୍ଟିମେଟ ସିନ ସମୟରେ ଭଗବତ୍ ଗୀତା ପଢୁଛନ୍ତି । ଚଳଚ୍ଚିତ୍ରରେ ହିନ୍ଦୁ ଶାସ୍ତ୍ର ଭଗବତ୍ ଗୀତା ପାଠ କରୁଥିବାବେଳେ ଇଣ୍ଟିମେଟ୍ ସିନ୍ ପାଇଁ ଲୋକମାନେ ନିର୍ଦ୍ଦେଶକ ଖ୍ରୀଷ୍ଟୋଫର ନୋଲାନଙ୍କୁ ଟ୍ରୋଲ୍ କରୁଛନ୍ତି । ଅନେକ ଲୋକ ସେନ୍ସର ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ୍ (ସିବିଏଫସି)କୁ ଏହି ସିନ୍କୁ ନହଟାଇ ଭାରତରେ ରିଲିଜ କରିଥିବାରୁ ସମାଲୋଚନା କରିବା ସହ ପ୍ରଶ୍ନ କରିଛନ୍ତି ।
ଏହା ମଧ୍ୟ ପଢନ୍ତୁ: ଭାରତରେ ଓପେନହାଇମର କ୍ରେଜ, 3 ଦିନରେ ଆୟ କଲା 49 କୋଟି
ଖ୍ରୀଷ୍ଟଫର ନୋଲନଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ରଟି ବୈଜ୍ଞାନିକ ରବର୍ଟ ଜେ ଓପେନହାଇମରଙ୍କ ବାୟୋପିକ ଅଟେ । ଓପେନହାଇମର ହେଉଛନ୍ତି ସେହି ବ୍ୟକ୍ତି ଯିଏ ବିଶ୍ୱର ପ୍ରଥମ ଆଣବିକ ବୋମା ପ୍ରସ୍ତୁତ କରିଥିଲେ। ଆମେରିକା ଏବଂ ଜାପାନ ଯୁଦ୍ଧ ସମୟରେ ତାଙ୍କର ଏହି ପରମାଣୁ ବୋମା ପ୍ରସ୍ତୁତ ହୋଇଥିଲା । ଏହି ବୋମା ଜାପାନର ହିରୋସିମା ଏବଂ ନାଗାସାକି ଉପରେ ପକାଯାଇଥିଲା । ପରେ ଜାପାନ ଆତ୍ମସମର୍ପଣ କରିଥିଲା। ଏବଂ ଏହା ଦ୍ବାରା ଜାପାନକୁ ବହୁ କ୍ଷତି ସହିବା ସହ ସ୍ଥିତାବସ୍ତାକୁ ଫେରିବାକୁ ଦୀର୍ଘ ଦିନ ଲାଗିଥିଲା ।
