ହାଇଦ୍ରାବାଦ: ବିବାଦରେ ସାଉଥ ଫିଲ୍ମ ଇଣ୍ଡଷ୍ଟ୍ରିର ପ୍ରସିଦ୍ଧ ଅଭିନେତା ମନସୁର ଅଲ୍ଲୀ ଖାନ । ନିକଟରେ ଥାଲାପଥୀ ବିଜୟଙ୍କ ଫିଲ୍ମ 'ଲିଓ'ରେ ତାଙ୍କୁ ଦେଖିବାକୁ ମିଳିଥିଲା । ଏହି ଚଳଚ୍ଚିତ୍ରରେ ତାଙ୍କର ଦମଦାର ଅଭିନୟ ପାଇଁ ସେ ବେଶ ପ୍ରଶଂସା ସାଉଣ୍ଟିଥିଲେ । ତାଙ୍କର ଏହି ସଫଳତା ପରେ ଚେନ୍ନାଇରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା । ଯେଉଁଥିରେ ସେ ଦେଇଥିବା ବୟାନ ପାଇଁ ବିବାଦ ଘେରକୁ ଆସିଛନ୍ତି ।

ଫିଲ୍ମରେ ତ୍ରିଶା କ୍ରିଷ୍ଣନଙ୍କ ସହ ଦୁଷ୍କର୍ମ ସିନକୁ ନେଇ ଦେଇଥିବା ବିବାଦୀୟ ବୟାନ ପାଇଁ ତାଙ୍କୁ ସମାଲୋଚନା କରାଯାଉଛି । ଏହାକୁ ନେଇ ସୋସିଆଲ ମିଡିଆରେ ପୋଷ୍ଟ କରି ନିଜର ମତ ରଖିଛନ୍ତି ଲୋକେଶ କନକରାଜଙ୍କ ସମେତ ଅନ୍ୟାନ୍ୟ ଅଭିନେତା । ତାଙ୍କର ଏଭଳି ବୟାନ ଅତ୍ୟନ୍ତ ନିନ୍ଦନୀୟ ଓ ଲଜ୍ଜାଜନକ ବୋଲି ଉଲ୍ଲେଖ ରହିଛି ।

ସୂଚନା ଅନୁସାରେ, ମନସୁର ଅଲ୍ଲୀ ଖାନ ପ୍ରେସମିଟରେ କହିଥିଲେ,"ସେମାନେ ମୋତେ ଚଳଚ୍ଚିତ୍ରରେ ଦୁଷ୍କର୍ମ ସିନ୍ କରିବାକୁ ଦେଲେ ନାହିଁ । ମୁଁ ପୂର୍ବରୁ ସ୍ଥିର କରିଥିଲି ଯେ 'ଲିଓ' ଫିଲ୍ମର ସଫଳତା ପାଇଁ ଆୟୋଜିତ ମିଟ୍ ଇଭେଣ୍ଟରେ ମୁଁ ଏ ବିଷୟରେ କହିବି । କିନ୍ତୁ କିଛି ଲୋକ ଏହାକୁ ବିରୋଧ କରିଥିଲେ । ଅଭିନେତ୍ରୀ ତ୍ରିଶାଙ୍କ ସହ ବେଡରୁମ ସିନ କରିବାକୁ ମୁଁ ଆଗ୍ରହୀ ଥିଲି । ହେଲେ ନିର୍ଦ୍ଦେଶକ ମତେ ଏହି ଭୂମିକା ନଦେଇ ଖଳନାୟକର ଭୂମିକା ଦେଲେ ।"

ତାଙ୍କର ଏହି ବୟାନ ପରେ ବିବାଦ ମୁଣ୍ଡ ଟେକିଛି । ଏହି ଖବର ସୋସିଆଲ ମିଡିଆରେ ବିଜୁଳି ବେଗରେ ଭାଇରାଲ ହୋଇଥିଲା । ଯାହାକୁ ନେଇ ଅଭିନେତ୍ରୀ ତ୍ରିଶା ତାଙ୍କ ଏକ୍ସ (ଟ୍ବିଟର) ହ୍ୟାଣ୍ଡେଲରେ ଏକ ପୋଷ୍ଟ ସେୟାର କରି ଏଭଳି ମନ୍ତବ୍ୟକୁ ନିନ୍ଦା କରିଛନ୍ତି । ତ୍ରିଶା କହିଛନ୍ତି, "ନିକଟରେ ଏକ ଭିଡିଓ ମୋ ନଜରକୁ ଆସିଛି, ଯେଉଁଥିରେ ମନସୁର ମୋ ବିଷୟରେ ଅଶ୍ଳୀଳ ମନ୍ତବ୍ୟ ଦେଇଛନ୍ତି । ମୁଁ ଏଭଳି ଘୃଣ୍ୟ ମନ୍ତବ୍ୟକୁ ଦୃଢ ଭାବରେ ନିନ୍ଦା କରୁଛି । ତାଙ୍କ ପରି ଲୋକ ଚଳଚ୍ଚିତ୍ର ଜଗତ ପାଇଁ କଳଙ୍କ ।"

ଏହା ବି ପଢନ୍ତୁ...'ଲିଓ' ରିଲିଜ ପୂର୍ବରୁ ରାମେଶ୍ବରମଙ୍କ ଶରଣରେ ଲୋକେଶ କନଗରାଜ

ସେପଟେ 'ଲିଓ' ଫିଲ୍ମର ନିର୍ଦ୍ଦେଶକ ଲୋକେଶ କନକରାଜ ମଧ୍ୟ ତ୍ରିଶାଙ୍କ ଟ୍ବିଟକୁ ରିଟ୍ବିଟ କରି ଘଟଣାକୁ ନିନ୍ଦା କରିଛନ୍ତି । ସେପଟେ ଏହି ବିବାଦକୁ ନେଇ ପ୍ରତିକ୍ରିୟା ରଖିଛନ୍ତି ଅଭିନେତା ମନସୁର ଅଲ୍ଲୀ । ସେ କହିଛନ୍ତି, ମୁଁ ତ୍ରିଶାଙ୍କ ପ୍ରଶଂସା କରିବା ସହ ଥଟ୍ଟାରେ ଏଭଳି ମନ୍ତବ୍ୟ ଦେଇଥିଲେ । ଅଜଥାରେ ଏହାକୁ ପ୍ରସଙ୍ଗ କରାଯାଇ ବିବାଦ ସୃଷ୍ଟି କରାଯାଉଛି ।