ରାଜଧାନୀର ରାସ୍ତା ଉପରେ ବୁଲିଲା କଟୁରି, ପୋଲିସ ଉପସ୍ଥିତିରେ ଭାଇକୁ ହାଣିଲା ଭାଇ

ଭୁବନେଶ୍ବର: ଲିଙ୍ଗରାଜ ଥାନା ରଥ ରୋଡରେ ଘଟିଛି ଅଘଟଣ । ଜମିଜମା ବିବାଦକୁ ନେଇ ରାସ୍ତା ଉପରେ ବଡ ଭାଇକୁ କଟୁରିରେ ହାଣିଲା ସାନ ଭାଇ । ଜମିଜମା ବିବାଦକୁ ନେଇ ଭାଇ ଭାଇ ଭିତରେ ଗଣ୍ଡଗୋଳ ଲାଗିରହିଥିଲା, ଆଉ ଆଜି ତାହା ଉଗ୍ର ରୂପ ନେଇଛି । ଖବର ପାଇ ଘଟଣା ସ୍ଥଳରେ ପହଞ୍ଚିଥିଲା ପୋଲିସ । ହେଲେ ପରିସ୍ଥିତି ଏପରି ହେଲା ଯେ, ପୋଲିସ ଉପସ୍ଥିତିରେ ବଡ ଭାଇକୁ ତଳେ ପକାଇ ହାଣିଲା ସାନ ଭାଇ ।

ଏହି ଘଟଣାରେ ବଡ ଭାଇ ଚନ୍ଦ୍ରକାନ୍ତ ବଡୁ ଗୁରୁତର ହୋଇ ନିକଟସ୍ଥ ହସ୍ପିଟାଲରେ ଭର୍ତ୍ତି ହୋଇଥିବା ବେଳେ, ଆକ୍ରମଣକାରୀ ସାନ ଭାଇ ଦିପୁ ବଡୁକୁ ଅଟକ ରଖିଛି ପୋଲିସ । ଘଟଣାକୁ ନେଇ ଜୋନ 2 ଏସିପି କହିଛନ୍ତି ପୋଲିସ ସିରିୟସ ଭାବେ ଘଟଣାକୁ ନେଇଛି । ଘଟଣାର ଛାନଭିନ ଜାରି ରଖିଛି । ଅଭିଯୁକ୍ତ ଅଟକ ରହିଥିବା ବେଳେ, ଆକ୍ରମଣର ଶିକାର ଯୁବକଙ୍କ ଅବସ୍ଥା ସ୍ଥିର ରହିଛି । ଏନେଇ ପୋଲିସ ବିଭିନ୍ନ ଦିଗକୁ ନେଇ ତଦନ୍ତ ଜାରି ରଖିଛି ।

ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ