ବ୍ରହ୍ମପୁର: ପ୍ରଥମ ଜାତୀୟ ସ୍କେଟ୍ ରୋଲର ଗେମ୍ସ ୨୦୨୨ ପ୍ରତିଯୋଗିତାରେ ବ୍ରହ୍ମପୁର ସହରର ୩ ଜଣ ଛାତ୍ରୀ କାଂସ୍ୟ ପଦକ ହାସଲ କରିଛନ୍ତି । ଜାତୀୟ ସ୍ତରରେ ବ୍ରହ୍ମପୁର ସହ ରାଜ୍ୟକୁ ଗୌରବାନ୍ବିତ କରିଥିବା ଏହି ୩ ଛାତ୍ରୀଙ୍କୁ ଗତ ଗୁରୁବାର ଏକ କାର୍ଯ୍ୟକ୍ରମରେ ସମ୍ବର୍ଦ୍ଧିତ କରାଯାଇଛି । ଏପ୍ରିଲ 21 ତାରିଖଠାରୁ 30 ତାରିଖ ପର୍ଯ୍ୟନ୍ତ ପଞ୍ଜାବର ମୋହାଲିରେ ଏହି ପ୍ରତିଯୋଗିତା ଅନୁଷ୍ଠିତ ହୋଇଥିଲା ।
ବ୍ରହ୍ମପୁର ସହରର କମାପଲ୍ଲୀସ୍ଥିତ ସିଲ୍କି ରୋଲର ସ୍କେଟିଂ ଏକାଡେମୀର ୪ ଜଣ ସ୍କେଟର ଏହି ପ୍ରତିଯୋଗିତାରେ ଭାଗ ନେଇଥିଲେ । ଏଥିରେ ରୋଲର ଡରବୀ କାଟାଗୋରୀରେ ୩ ଜଣ ସ୍କେଟର କାଂସ୍ୟ ପଦକ ହାସଲ କରିଛନ୍ତି । ପଦକ ହାସଲ କରି ସ୍କେଟରମାନେ ବ୍ରହ୍ମପୁର ଫେରିବା ପରେ ସଙ୍କଳ୍ପ ସ୍କୁଲ ପରିସରରେ ସେମାନଙ୍କ ପାଇଁ ଏକ ସମ୍ବର୍ଦ୍ଧନା କାର୍ଯ୍ୟକ୍ରମ ଆୟୋଜନ କାରଯାଇଥିଲା । ଜାତୀୟ ସ୍ତରରେ ସଫଳତା ହାସଲ କରିଥିବାରୁ ଉପସ୍ଥିତ ଅତିଥି ସେମାନଙ୍କୁ ଧନ୍ୟବାଦ ଦେବାସହ ପୁଷ୍ପଗୁଚ୍ଛ ଦେଇ ସମ୍ୱର୍ଦ୍ଧିତ କରିଥିଲେ ।
ରୋଲର ସ୍କେଟିଂ ଫେଡେରେସନ ଅଫ୍ ଇଣ୍ଡିଆ ପକ୍ଷରୁ ପ୍ରଥମ ଜାତୀୟ ସ୍କେଟ୍ ରୋଲର ଗେମ୍ସ ୨୦୨୨ ପ୍ରତିଯୋଗିତା ଆୟୋଜିତ ହୋଇଥିଲେ । ଏଥିରେ ଓଡ଼ିଶା ସ୍କେଟିଂ ଆସୋସିଏସନ ପକ୍ଷରୁ ୨୫ ଜଣ ସ୍କେଟର ଅଂଶ ଗ୍ରହଣ କରିଥିଲେ । ବ୍ରହ୍ମପୁର ସହରରୁ ଜୁନିଅର ବର୍ଗର ଇନ-ଲାଇନ ରୋଲର ସ୍କେଟିଂରେ ହରେକ୍ରିଷ୍ଣା ପାତ୍ର ଓ ରୋଲର ଡରବୀରେ ସମୀକ୍ଷା ନାୟକ, ଶ୍ରଦ୍ଧା ପ୍ରିୟଦର୍ଶନୀ ଓ ସ୍ୱସ୍ତିକା ପଣ୍ଡା ଅଂଶ ଗ୍ରହଣ କରିଥିଲେ ।
ରୋଲର ଡରବୀରେ ଓଡିଶା ଦଳ ପକ୍ଷରୁ 7 ଜଣ ସ୍କେଟର ଭାଗ ନେଇଥିବା ବେଳେ ଦଳଗତ ଭାବେ ବ୍ରୋଞ୍ଜ ମେଡାଲ ହାସଲ କରିଥିଲେ । ଏଥିରେ ବ୍ରହ୍ମପୁରର ୩ ଜଣ ସ୍କେଟର ସାମିଲ ରହିଛନ୍ତି । କୃତୀ କ୍ରୀଡ଼ାବିତ୍ଙ୍କ ସମ୍ବର୍ଦ୍ଧନା କାର୍ଯ୍ୟକ୍ରମରେ ମୁଖ୍ୟ ଅତିଥି ବ୍ରହ୍ମପୁର ସାଂସଦ ଚନ୍ଦ୍ର ଶେଖର ସାହୁଙ୍କ ସହ ଗଞ୍ଜାମ ଜିଲ୍ଲା ରୋଲର ସ୍କେଟିଂ ଆସୋସିଏସନର ସଭାପତି ଅଶୋକ ସାହୁ ଓ ବରିଷ୍ଠ ସମାଜସେବୀ ତୁମ୍ୱନାଥ ପଣ୍ଡା ପ୍ରମୁଖ ଯୋଗ ଦେଇଥିଲେ । ତାସହିତ ଏହି କାର୍ଯ୍ୟକ୍ରମରେ କୃତୀ କ୍ରୀଡ଼ାବିତ୍ଙ୍କ ଅଭିଭାବକ ମଧ୍ୟ ସାମିଲ ରହିଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ