ବ୍ରହ୍ମପୁର: ରେଶମ ସହର ବ୍ରହ୍ମପୁର । ସ୍ବତନ୍ତ୍ର କାରୁକାର୍ଯ୍ୟ ଉନ୍ନତମାନର ପାଟଶାଢୀ ପାଇଁ ଦେଶ ବିଦେଶରେ ବେଶ୍ ପରିଚିତ। ଏଠାକାର ଅଧିକାଂଶ ପରିବାର ପାଟଶାଢୀ ବୁଣି ତେଲଲୁଣ ସଂସାର ଚଳାନ୍ତି । ହେଲେ ଲକଡାଉନ ସେମାନଙ୍କ ଜୀବନରେ ଯେମିତି ଗ୍ରହଣ ଭଳି ଚାଲି ଆସିଛି । ନା ଆସି ପାରୁଛି କଞ୍ଚାମାଲ, ନା ବିକ୍ରି ହୋଇପାରୁଛି ପାଟ । ଫଳରେ 60 ଲକ୍ଷରୁ ଉର୍ଦ୍ଧ୍ବ ଟଙ୍କାର ଉତ୍ପାଦନ ବିକ୍ରି ନ ହୋଇପଡି ରହିଛି । ପାଟବସ୍ତ୍ରକୁ ନିଜ ରୋଜଗାର ପନ୍ଥା ଭାବେ ବାଛି ନେଇଥିବା ଅନେକ ପରିବାର ଏବେ ଆଶଆଶଙ୍କାରେ ।
ବ୍ରହ୍ମପୁର ସହରର ବାଲୁଙ୍କେଶ୍ବରପେଟ୍ଟା, ଗୋବର୍ଦ୍ଧନପେଟା, ଦେଶୀ ବେହେରା ସାହି ଅଞ୍ଚଳରେ ପ୍ରାୟ 400 ରୁ 500 ବୁଣାକାର ପରିବାର ପାଟବସ୍ତ୍ର ବୁଣାବୁଣି କରୁଥିଲେ । ହେଲେ ସମୟ କ୍ରମେ ୨୦୦୩ ମସିହାରେ ଗଠିତ ହୋଇଥିବା ବୁଣାକାର କଲ୍ୟାଣ ସଙ୍ଘରେ ୩୧୫ ଜଣ ପଞ୍ଜିକୃତ କରିଥିବା ବେଳେ ବର୍ତ୍ତମାନ ମାତ୍ର ୧୧୫ ବୁଣାକାରଙ୍କ ତନ୍ତ ରହିଛି । ଗୋଟିଏ ପରିବାରର ତିନି ଜଣ ସଦସ୍ୟ ମାସେ କାର୍ଯ୍ୟ କଲେ 3 ରୁ 4 ଟି ପାଟଶାଢୀ ତିଆରି କରିବା ସହ ଯୋଡ ପ୍ରସ୍ତୁତ କରିଥାନ୍ତି । ଆଉ ରୋଜଗାର ବାବଦକୁ ୧୦ ରୁ ୧୨ ହଜାର ଟଙ୍କା ମଜୁରୀ ପାଇଥାନ୍ତି ।
ହେଲେ ବର୍ତ୍ତମାନ ସମୟରେ ପାଟବସ୍ତ୍ର ବୁଣିବା ପାଇଁ ଆବଶ୍ୟକୀୟ ସୁତା ଆସୁନଥିବା ବେଳେ ବୁଣା ଯାଇଥିବା ପାଟଲୁଗା ବିକ୍ରୀ ହୋଇପାରୁନି । ଏଥିପ୍ରତି ଦୃଷ୍ଟି ନଦେଲେ ଆହୁରୀ ଅନେକ ବୁଣାକାର ଯେ ଏହି ବୃତ୍ତି ଛାଡିବାକୁ ବାଧ୍ୟ ହେବେ ତାହା କହିବା ଅସମ୍ଭବ । ଫଳରେ ଏଥିପ୍ରତି ସରକାର ଦୃଷ୍ଟି ଦେବାକୁ ଦାବି କରିଛନ୍ତି ବୁଣାକାରମାନେ ।
ଉନ୍ନତମାନର ହାତବୁଣା ସାଙ୍ଗକୁ ସ୍ବତନ୍ତ୍ର ଡିଜାଇନ ଲାଗି ବ୍ରହ୍ମପୁର ପାଟ ବସ୍ତ୍ରର ଆଦର ରହିଥିବା ବେଳେ ଏହି ପାଟବସ୍ତ୍ର ଦକ୍ଷିଣପୂର୍ବ ଏସିଆର ବିଭିନ୍ନ ଦେଶକୁ ରପ୍ତାନି ହୋଇଇ ଆସୁଥିବାର ନଜର ରହିଛି । ଏପରିକି ବ୍ରହ୍ମପୁର ପାଟଶାଢୀ କୁ ଭୌଗଳିକ ସୂଚାଙ୍କ(ଜିଆଇ ମାର୍କ ର ମାନ୍ୟତା ) ମିଳିସାରିଛି । ହେଲେ କୋରୋନା ପାଇଁ ଏହି ବୁଣାକାରଙ୍କ ଜୀବନ ଜୀବିକା ଏବେ ଚିନ୍ତାରେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
