ବାଲେଶ୍ବର: ସଦର ବ୍ଲକ ଶ୍ରୀରାମପୁର ପଞ୍ଚାୟତର ବିଭିନ୍ନ ଗାଁରେ ଚାଷ ଜମିରେ ଜଳକା ନଦୀର ବନ୍ୟାପାଣି ମାଡ଼ିଯାଇଛି । ଫଳରେ ବ୍ୟାପକ କ୍ଷୟକ୍ଷତି ହୋଇଥିବା ଚାଷୀମାନେ ଅଭିଯୋଗ କରିଛନ୍ତି । ଜଳକା ନଦୀ ବନ୍ୟାରେ ପ୍ରଭାବିତ ହୋଇ ପ୍ରାୟ ୧୦ ଖଣ୍ଡ ଗାଁର ଚାଷୀଙ୍କ ଚାଷ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଅଦ୍ୟାବଧି ଜିଲ୍ଲା ପ୍ରଶାସନ ପକ୍ଷରୁ କୌଣସି ସହାୟତା ମିଳିନାହିଁ କି ପରିଦର୍ଶନ ପାଇଁ ମଧ୍ୟ କୌଣସି ଅଧିକାରୀ ଆସି ନଥିବା ଅଭିଯୋଗ କରିଛନ୍ତି ସ୍ଥାନୀୟ ଚାଷୀ ।
ଧାନ ବିଲରେ ବନ୍ୟାପାଣି ଜମିରହି ଧାନ ଗଛ ନଷ୍ଟ ହୋଇ କଳା ପଡ଼ିଗଲାଣି । ସଦର ବ୍ଲକ ଶ୍ରୀରାମପୁର ପଞ୍ଚାୟତରେ ୧୯ଟି ୱାର୍ଡରେ ପ୍ରାୟ 15 ହଜାରରୁ ଊର୍ଦ୍ଧ୍ବ ଲୋକ ବସବାସ କରୁଥିବାବେଳେ 15ଟି ଓ୍ବାର୍ଡ ବନ୍ୟାରେ ପ୍ରଭାବିତ ହୋଇଛନ୍ତି । ବିଶେଷକରି ପଞ୍ଚାୟତର ଖିରଙ୍ଗ, ନିମା, କାଟୁଳଡିହା, ଉଇଟିକରି, ପୁରାଣ, ଛତରା, ବଳବୁଦ୍ଧି, ମଛଡିହା, ବାଇଗଣଡିହା, ମାଣ୍ଡୁରକୁଲା, ବିଞ୍ଝ, ବରଡିହା ଆଦି ଗାଁରେ ଜଳକା ନଦୀ ବନ୍ୟାର ବନ୍ୟାଜଳ ପ୍ରତିବର୍ଷ ପ୍ରବେଶ କରୁଥିବାବେଳେ ଚଳିତବର୍ଷ 2 ଥର ବନ୍ୟା ଆସି ଚାଷବାସ ସବୁ ଉଜାଡିଦେଇଛି । ତେବେ ପ୍ରାୟ 3ଶହ ଚାଷୀ ଓ ଭାଗଚାଷୀ ବନ୍ୟାରେ ଚାଷ ହରାଇ ଚିନ୍ତାରେ ପଡିଛନ୍ତି। ତେବେ ତୁରନ୍ତ ସରକରୀ ସ୍ତରରେ ଅନୁଧ୍ୟାନ କରାଯାଇ ସହାୟତା ଯୋଗାଇ ଦେବାକୁ ଦାବି କରିଛନ୍ତି ଚାଷୀ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
