ପୁରୀ: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ଅର୍ପଣ ରଥ ମାଧ୍ୟମରେ ଭକ୍ତମାନେ ଦାନ କରିଥିବା ଅରୁଆ ଚାଉଳରେ ପ୍ରସ୍ତୁତ ହେଲା ଭୋଗ । ଏହି ଭୋଗକୁ ମହାପ୍ରଭୁଙ୍କଠାରେ ଲାଗି କରାଯାଇଛି । ଭୋଗ ଲାଗି ପରେ ଏହାକୁ ଭକ୍ତଙ୍କ ମଧ୍ୟରେ ବିତରଣ କରାଯାଇଛି । ସୁଆର ମହାସୁଆର ନିଯୋଗ ପକ୍ଷରୁ ଶ୍ରୀମନ୍ଦିର ଉତ୍ତର, ଦକ୍ଷିଣ ଓ ପଶ୍ଚିମ ଦ୍ୱାରରେ ଏହି ଖେଚୁଡ଼ି, କାନିକା ମହାପ୍ରସାଦକୁ ଭକ୍ତଙ୍କ ମଧ୍ୟରେ ବଣ୍ଟା ଯାଇଛି ।
ତେବେ ସୁଆର ମହାସୁଆର ନିଯୋଗ ସମ୍ପାଦକଙ୍କ ସୂଚନା ଅନୁସାରେ, ମହାପ୍ରଭୁଙ୍କର ଦୈନନ୍ଦିନ ବିଭିନ୍ନ ଧୂପ ନୀତି ଅନୁଷ୍ଠିତ ହେଉଥିବା ବେଳେ ପ୍ରତ୍ୟେକ ଧୂପରେ ଭକ୍ତ ଦାନ କରିଥିବା ଚାଉଳକୁ ଭୋଗ ପ୍ରସ୍ତୁତ କରାଯାଇ ମହାପ୍ରଭୁଙ୍କ ପାଖରେ ଲାଗି କରାଯିବ । ଖେଚୁଡ଼ି ଓ କାନିକା ପ୍ରସ୍ତୁତ କରାଯାଇ ଏହାକୁ ମହାପ୍ରସାଦ ଭାବରେ ଭକ୍ତଙ୍କୁ ଶ୍ରୀମନ୍ଦିର ସିଂହଦ୍ଵାର ଛାଡ଼ି ଅନ୍ୟ ତିନି ଦ୍ୱାରରେ ବଣ୍ଟାଯିବ । ମହାପ୍ରଭୁଙ୍କୁ ଚାଉଳ ଦାନ କରିଥିବା ଭକ୍ତଙ୍କ ଚାଉଳରେ ଖେଚୁଡ଼ି, କାନିକା ପ୍ରସ୍ତୁତ କରାଯାଇ ମହାପ୍ରଭୁଙ୍କ ପାଖରେ ଭୋଗ ଲାଗି କରାଯାଇ ଏହାକୁ ବଣ୍ଟା ଯାଇଥିବାରୁ ନିଜକୁ ବେଶ ଭାଗ୍ୟବାନ ମନେ କରିଛନ୍ତି ଭକ୍ତ । ଅର୍ପଣ ରଥରୁ ସଂଗୃହିତ ହୋଇଥିବା ଚାଉଳକୁ ସୁରକ୍ଷିତ ଭାବେ ଗୁଣ୍ଡିଚା ମନ୍ଦିରରେ ରଖାଯାଇଛି । ମହାପ୍ରଭୁଙ୍କଠାରେ ଭୋଗ ଲାଗି ହେବା ପୂର୍ବରୁ ଶ୍ରୀମନ୍ଦିର ପ୍ରଶାସନ ଦ୍ୱାରା ଗଠିତ ହୋଇଥିବା ସ୍ୱତନ୍ତ୍ର କମିଟିର ସଦସ୍ୟମାନେ ପ୍ରଥମେ ଚାଉଳର ମାନ ଯାଞ୍ଚ କରି ଶ୍ରୀମନ୍ଦିର ରୋଷଶାଳାକୁ ଯୋଗାଉଛନ୍ତି ।
ଏହା ମଧ୍ୟ ପଢ଼ନ୍ତୁ....ବ୍ୟର୍ଥ ଯିବନି ଶ୍ରଦ୍ଧାଳୁଙ୍କ ଦାନ, ଶ୍ରୀମନ୍ଦିର କାର୍ଯ୍ୟାଳୟରେ ସ୍ବତନ୍ତ୍ର ବ୍ୟବସ୍ଥା
ସେପଟେ ଭକ୍ତମାନେ ମହାପ୍ରଭୁଙ୍କ ଉଦ୍ଦେଶ୍ୟରେ ଚାଉଳ ଦାନ କରିଥିବାରୁ ଏହି ଚାଉଳ କିଭଳି ମହାପ୍ରଭୁଙ୍କ ଭୋଗରେ ଲାଗି ପାରିବ ସେଦିଗରେ ଶ୍ରୀମନ୍ଦିର ପ୍ରଶାସନ ବିଶେଷ ଗୁରୁତ୍ବ ଦେଇଛି । ସଂଗୃହିତ ଚାଉଳକୁ ମହାପ୍ରଭୁଙ୍କ ପାଖରେ ଭୋଗ ଲାଗି କରିବା ପାଇଁ ଯେଭଳି କୌଣସି ପ୍ରକାର ଅସୁବିଧା ସୃଷ୍ଟି ନହୁଏ ସେନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ବତନ୍ତ୍ର କମିଟି ଗଠନ କରାଯାଇଛି । ନିୟମିତ ବ୍ୟବଧାନରେ ବୈଠକ ବସି ଏହି କାର୍ଯ୍ୟକୁ କିଭଳି ତ୍ବରାନ୍ବିତ କରାଯାଇପାରିବ ସେ ବିଷୟରେ କମିଟି ପକ୍ଷରୁ ଆଲୋଚନା କରାଯାଉଛି । ତେବେ ଅର୍ପଣ ରଥରୁ ସଂଗୃହିତ ହୋଇଥିବା ଚାଉଳରୁ ପ୍ରତିଦିନ ଶହେ ହାଣ୍ଡି ଖେଚୁଡ଼ି ଓ କାନିକା ପ୍ରସ୍ତୁତ କରାଯାଇ ଭକ୍ତଙ୍କ ମଧ୍ୟରେ ବଣ୍ଟାଯିବାର ବ୍ୟବସ୍ଥା କରାଯାଇଛି ବୋଲି ସୁଆର ମହାସୁଆର ନିଯୋଗ ସମ୍ପାଦକ ସୂଚନା ଦେଇଛନ୍ତି । ସେପଟେ ଏହି ପ୍ରସାଦକୁ ଖାଇ ନିଜର ଖୁସି ବ୍ୟକ୍ତ କରିଛନ୍ତି ଭକ୍ତ ।
ଇଟିଭି ଭାରତ, ପୁରୀ
