ଭୁବନେଶ୍ବର: ଓଡିଶା ପୋଲିସକୁ ମିଳିଛି ବଡ ସଫଳତା । ଗଞ୍ଜେଇ ବୋଝେଇ ଟ୍ରକକୁ ଜବତ କରିଛି ପୋଲିସ । ସୂଚନା ଅନୁଯାୟୀ ବିହାରରେ ମଦ ବ୍ୟାନ ହୋଇଥିବାବେଳେ ସେଠାରେ ନିଶାଡିଙ୍କ ମଧ୍ୟରେ ଗଞ୍ଜେଇର ଡିମାଣ୍ଡ ବଢିଚାଲିଛି । ଏଥିପାଇଁ ରୀତିମତ ଭାବେ ଓଡିଶାରୁ ଗଞ୍ଜେଇ ଏବେ ବିହାର ହେଉଛି ଚାଲାଣ । କ୍ରାଇମବ୍ରାଞ୍ଚ ଏସଟିଏଫ ଏସପି କିଶୋର ଚନ୍ଦ୍ର ପାଣିଗ୍ରାହୀଙ୍କ ସୂଚନା ମୁତାବକ, UP 22T3635 ନମ୍ବର ଥିବା ଏକ ଟ୍ରକ ଆନ୍ଧ୍ରର ବିଜୟନଗରମରୁ ବ୍ୟାଟେରୀ ବୋଝେଇ କରି ବିହାର ଆସୁଥିଲା । ପୂର୍ବ ଯୋଜନା ମୁତାବକ ବ୍ରହ୍ମପୁରରେ ଗାଡିଟି ଗିରିସୋଲାରେ ପହଞ୍ଚିଥିଲା । ପୁର୍ବରୁ ଗଞ୍ଜାମ ଓ ଗଜପତିରୁ ଆସିଥିବା ଗଞ୍ଜେଇକୁ ବ୍ୟାଟେରି ବୋଝେଇ ଗାଡିରେ ଭର୍ତି କରି ଥିଲେ ଅଭିଯୁକ୍ତ ।
ପରେ ମାଷ୍ଟର ମାଇଣ୍ଡ ସେଠାରୁ ଟ୍ରେନ ଯୋଗେ ବିହାର ଯାଇଥିବା ବେଳେ ସେହିଠାରୁ ଟ୍ରକରେ ଗଞ୍ଜେଇ ଭର୍ତି କରି ଭୁବନେଶ୍ବର ଦେଇ ବିହାର ଚାଲାଣ ହେଉଥିବାର ଖବର ପାଇଥିଲା ଏସଟିଏଫ ଟିମ୍ । ଏନେଇ ଇଣ୍ଟେଲିଜେନସ ତଥ୍ୟ ଆଧାରରେ ଭୁବନେଶ୍ବର ରସୁଲଗଡ ଛକରୁ ଟ୍ରକକୁ ଜବତ କରିଥିଲା ଏସଟିଏଫ । ଏନେଇ ତିନି ଅଭିଯୁକ୍ତଙ୍କୁ ଗିରଫ କରାଯାଇଛି । ତିନିଜଣ ମଧ୍ୟରୁ ଜଣେ ବିହାର ଅଞ୍ଚଳର ଓ ଦୁଇ ଜଣ ୟୁପିର ହୋଇଥିବା ବେଳେ ସେମାନଙ୍କ ନାଁ ମହେନ୍ଦ୍ର ପାଲ ,ଅରୁନ ମହତୋ ଓ ସନ୍ନି କୁମାର ବୋଲି ଜଣାପଡିଛି ।
ଏହା ମଧ୍ୟ ପଢନ୍ତୁ... ଅବକାରୀ ଆଖିରେ ଧୂଳି ଦେଇ ନଡ଼ିଆ ବୋଝେଇ ଟ୍ରକରେ ଚାଲିଥିଲା ଗଞ୍ଜେଇ ଚାଲାଣ, ମାଡି ବସିଲା ପୋଲିସ
ସେମାନଙ୍କଠାରୁ ବ୍ୟାଟେରି ବୋଝେଇ ଟ୍ରକ ଜବତ କରାଯାଇଛି । ଏଥି ସହ ୧୪୮କେଜିର ଗଞ୍ଜେଇ ଜବତ କରାଯାଇଛି, ଯାହାକି ୧୫ଲକ୍ଷ ଟଙ୍କା ହେବ ବୋଲି ଅନୁମାନ କରାଯାଉଛି । ତେବେ ଗିରଫ ପରେ ଏସଟିଏଫ ଏସପି ସୂଚନା ଦେଇଛନ୍ତି ଯେ ବିହାରରେ ମଦ ବ୍ୟାନ ପରେ ନିଶା ପାଇଁ ଏବେ ଗଞ୍ଜେଇ ପାଇଁ ଡହଳ ବିକଳ ହେଉଛନ୍ତି । ଏନେଇ ବିଶେଷ କରି ଓଡ଼ିଶା ଗଞ୍ଜେଇ ଉପରେ ଡିମାଣ୍ଡ ରହିଛି । ତେଣୁ କମ ମୂଲ୍ୟରେ ଗଞ୍ଜେଇ ନେଇ ଚଢା ଦରରେ ବିକ୍ରି କରିବାକୁ ଗଞ୍ଜେଇ ବେପାରୀ ଯୋଜନା ଚଳାଇଛନ୍ତି ।
ଇତି ମଧ୍ୟରେ ଏହି କାରବାର ପଛର ମାଷ୍ଟର ମାଇଣ୍ଡ ସୁରାକ ପାଇଛି ଏସଟିଏଫ । ଏନେଇ ଖୁବଶୀଘ୍ର ଧରିବାକୁ ଯୋଜନା ଚାଲିଛି । ତେବେ ବିହାର ଚାଲାଣ ପାଇଁ କେବଳ ଏହି ଗୋଟିଏ ମଧ୍ୟମ ନୁହେଁ । ଏଥି ପାଇଁ ଭିନ୍ନ ଭିନ୍ନ ଉପାୟରେ ଗଞ୍ଜେଇ ଚାଲାଣ କରାଯାଉଛି ବିହାର । କିଛି ଦିନ ତଳେ ୨୬ ଫେବୃଆରୀରେ ଜଟଣି ଷ୍ଟେସନରୁ ବିହାର ଗଞ୍ଜେଇ ଚାଲାଣ ପାଇଁ ଉଦ୍ୟମ ବେଳେ ଦୁଇ ଜଣ ଧାନବାଦର ଅଭିଯୁକ୍ତ ଧରାପଡିଥିଲେ । ଯେ କି ଉତ୍କଳ ଏକ୍ସପ୍ରେସରେ ଗଞ୍ଜେଇ ଚାଲାଣ ପାଇଁ ଷ୍ଟେସନରେ ଯୋଜନା କରୁଥିଲେ । ଏନେଇ ଜାଣିପାରି ଜିଆରପି ପୋଲିସ ୩୬ କେଜି ଗଞ୍ଜେଇ ଜବତ କରିଥିଲା । ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ପୋଲିସ । ସେହିପରି ଗତ ଫେବୃଆରି ୮ରେ ବରମୁଣ୍ଡା ବସ ଷ୍ଟାଣ୍ଡରୁ ବସ ଯୋଗେ ୩୦ କେଜି ଗଞ୍ଜେଇ ବିଭିନ୍ନ ବ୍ୟାଗ ରେ ବିହାର ଚାଲାଣ ବେଳେ ୫ଜଣ ବିହାରୀ ଯୁବକଙ୍କୁ ଧରି ଅବକାରୀ ବିଭାଗର ଭୁବନେଶ୍ବରର ଟିମ । ଏହିଭଳି ବିଭିନ୍ନ ସମୟରେ ବିହାରକୁ ଏବେ ଗଞ୍ଜେଇ ଚାଲାଣର ଖବର ଆସିବା ପରେ ଆଲର୍ଟ ହୋଇଛି ଓଡ଼ିଶା ପୋଲିସ । ଏନେଇ ବିଭିନ୍ନ ସମୟରେ ଏସବୁ ଦିଗ ପ୍ରତି ନଜର ରଖିଛି ପୋଲିସ ।
ଇଟିଭି ଭାରତ, ଭୁବନେଶ୍ବର
