ଭୁବନେଶ୍ବର: ପଦ୍ମ ଧରିଲେ ଜଗତସିଂହ ନିର୍ବାଚନ ମଣ୍ଡଳୀର ଯୁବ ନେତା ଅମରେନ୍ଦ୍ର ଦାସ । ରାଜ୍ୟ ବିଜେପି କାର୍ଯ୍ୟାଳୟରେ ଆୟୋଜିତ ମିଶ୍ରଣ ପର୍ବରେ ବିଜେପିରେ ମିଶିଲେ ଜଗତସିଂହପୁର ଜିଲ୍ଲା ବିଜେଡ଼ି ସଭାପତି ଓ ପୂର୍ବତନ କାଜୁ ନିଗମର ଅଧ୍ୟକ୍ଷ ଅମରେନ୍ଦ୍ର ଦାସ । ବିଶାଳ ଶୋଭାଯାତ୍ରାରେ ହଜାର ହଜାର ସମର୍ଥକଙ୍କ ସହ ବିଜେପିରେ ଯୋଗ ଦେଲେ ଅମରେନ୍ଦ୍ର । ରାଜ୍ୟ ସଭାପତି ମନମୋହନ ସାମଲଙ୍କ ଉପସ୍ଥିତିରେ ଭାରତୀୟ ଜନତା ପାର୍ଟିରେ ସାମିଲ ହେଲେ । କିଛି ଦିନ ତଳେ ସେ ବିଜେଡି ଛାଡିଥିଲେ ଅମରେନ୍ଦ୍ର ।
ଏହାସହ ବିଜେପି ରାଜ୍ୟ ନିର୍ବାଚନ ପ୍ରଭାରୀ ବିଜୟ ପାଲ ସିଂ ତୋମାର, ସହ ପ୍ରଭାରୀ ଲତା ଉସେଣ୍ଡି, ବିଜେପି ରାଜ୍ୟ ସଭାପତି ମନମୋହନ ସାମଲ, ପୂର୍ବତନ ରାଜ୍ୟ ବିଜେପି ସଭାପତି ସମୀର ମହାନ୍ତି ପ୍ରମୁଖ ମିଶ୍ରଣ ପର୍ବରେ ଉପସ୍ଥିତ ଥିଲେ । ତେବେ ଟିକେଟ ଆଶାକୁ ନେଇ ସେ କହିଛନ୍ତି ଯେ, ରାଜ୍ୟ ସଭାପତି ଓ ବିଜେପିର ଶୀର୍ଷ ନେତୃବୃନ୍ଦ ଯାହା ନିଷ୍ପତି ନେବେ ତାହା ସେ ମାନିବେ । ଯଦି ତାଙ୍କ ଉପରେ ଆସ୍ଥା ରଖି ଟିକେଟ ଦିଅନ୍ତି, ତେବେ ସେ ଲଢ଼ିବେ ।
ବିଜେପିରେ ଯୋଗ ଦେଇ ଅମରେନ୍ଦ୍ର ଦାସ କହିଛନ୍ତି, "ବିଜେଡ଼ିକୁ ମୁଁ ମୋର ଶ୍ରମ ଦେଇଛି, ଆଉ ଝାଳ ବୁହାଇ ଜଗତସିଂହପୁରରେ ଦଳ ପାଇଁ ଘର ତୋଳିଥିଲି । ସେଠି ପେୟିଙ୍ଗ ଗେଷ୍ଟ ବା ଆମଦାନୀ ନେତାଙ୍କୁ ପ୍ରାଧାନ୍ୟ ଦେଇଛନ୍ତି ଘର ପୁଅକୁ ତଡି ଦେଇଛନ୍ତି । ତେଣୁ ତଡି ଦେବା ପୂର୍ବରୁ ମୁଁ ସେହି ଦଳ ପରିତ୍ୟାଗ କରି ଦେଇଛି । ଘର ପୁଅକୁ ଯେଉଁଭଳି ଭାବେ ଅସମ୍ମାନ କଲେ ଏବଂ ହକକୁ ଛଡେଇ ନେବା ପାଇଁ ଅପଚେଷ୍ଟା କଲେ , ଆଉ ଜଗତସିଂପୁର ନିର୍ବାଚନ ମଣ୍ଡଳୀ ପାଇଁ ଅବିଚାର କଲେ । ଯେଉଁଥିପାଇଁ ମୁଁ ଆଉ ମୋ ସମର୍ଥକ ବିଜେଡି ଛାଡିଲୁ ।"
ସେ ଆହୁରୀ ମଧ୍ୟ କହିଛନ୍ତି, "ଏହି ଘଡ଼ିସନ୍ଧି ମୁହୃର୍ତ୍ତରେ ବିଜେପି ମୋତେ ସମ୍ମାନର ସହ କୋଲେଇ ନେଇଥିବାରୁ ମୁଁ ଦଳକୁ ଧନ୍ୟବାଦ ଦେବା ସହ ନେତୃବୃନ୍ଦଙ୍କୁ ମୋର କୃତଜ୍ଞତା ଜଣାଉଛି । ଆଗମୀ ଦିନରେ ଦଳ ଦେଇଥିବା ସୁଯୋଗକୁ ନେଇ ଆମେ ଜଗତସିଂପୁରରେ ପଦ୍ମ ଫୁଟେଇବୁ । ସମସ୍ତ କର୍ମକର୍ତ୍ତା ଓ ମୁଁ ମିଶି ପ୍ରଧାନମନ୍ତ୍ରୀଙ୍କ ବିକାଶ ଧାରା ସହ ଆମ ନିର୍ବାଚନର ପୁରୁଣା ନେତାଙ୍କ ସହ ମିଶି ବିଜେପିକୁ ସୁଦୃଢ କରିବୁ ଆଉ ଦଳକୁ ଜିତାଇବୁ ।"
ଅନ୍ୟପଟେ ଜଗତସିଂପୁରରେ ବିଜେଡିର ପ୍ରାର୍ଥୀ ହୋଇଥୁବା ପ୍ରଶାନ୍ତ ମୁଦୁଲିଙ୍କୁ ଟାର୍ଗେଟ କରି କହୁଛନ୍ତି," ସେ ହେଉଛନ୍ତି ଆମଦାନୀ ନେତା । ଯିଏ ଦିନେ ଅଞ୍ଚଳକୁ ଯାଇନାହାନ୍ତି କି ସଭା ସମିତି କରି ନାହାନ୍ତି । କହିବାକୁ ଗଲେ କେବେ ତାଙ୍କର ଦେଖା ନଥାଏ ଅଞ୍ଚଳରେ । ମୁଁ ତାଙ୍କୁ ଖୋଲା ଆହ୍ବାନ ଦେଇ ଏହା କହୁଛି । ସରକାରୀ କାର୍ଯ୍ୟକୁ ବାଦ ଦେଲେ ସେ ଆଉ କେଉଁ କାମ କରନ୍ତି ନାହିଁ । ଏଭଳି ନେତାଙ୍କୁ ଦଳ ଟିକେଟ ଦେଇ ଜଗତସିଂହପୁର ବାସୀଙ୍କୁ ଅସମ୍ମାନ କରିଛନ୍ତି । ତେବେ ସେବା ବଦଳରେ ନେବା କାର୍ଯ୍ୟକ୍ରମ କରୁଥିବା ନେତାଙ୍କୁ ଦଳରେ ଟିକେଟ ମିଳୁଛି । ଯାହାର ଜବାବ ଜଗତସିଂହପୁରବସୀ ଦେବେ ।"
ଇଟିଭି ଭାରତ, ଭୁବନେଶ୍ବର
