ବରଗଡ଼: 2024 ସାଧାରଣ ନିର୍ବାଚନ ପାଇଁ ଅଧିକାଂଶ ଦଳୀୟ ପ୍ରାର୍ଥୀଙ୍କ ନାମ ଘୋଷଣା ହୋଇଯାଇଛି । ବରଗଡ଼ ଲୋକସଭା ଆସନ ପାଇଁ ପ୍ରଥମେ ବିଜେପି ନିଜ ଦଳୀୟ ପ୍ରାର୍ଥୀଙ୍କ ନାଁ ଘୋଷଣା କରିସାରିଥିବାବେଳେ କଂଗ୍ରେସ ମଧ୍ୟ ପ୍ରାର୍ଥୀଙ୍କ ନାଁ ଘୋଷଣା କରିଛି । ମାତ୍ର ବିଜେଡି ଦୀର୍ଘ ଦିନ ପର୍ଯ୍ୟନ୍ତ ବରଗଡ଼ ଲୋକସଭା ଆସନ ପାଇଁ ଦଳୀୟ ପ୍ରାର୍ଥୀଙ୍କ ନାମ ଘୋଷଣା କରିନଥିଲା । ବରଗଡ଼ ଲୋକସଭା ଆସନ 2019 ସାଧାରଣ ନିର୍ବାଚନରେ ବିଜେପି ହାତକୁ ଚାଲିଯାଇଥିବାବେଳେ ଚଳିତ ଥର କିପରି ଏହି ଆସନକୁ ପୁଣି ବିଜେଡି ଅକ୍ତିଆର କରିବ ସେନେଇ ରଣନୀତି କରିଛି ଦଳ । ଚଳିତ ଥର ନୂଆ ଚେହେରା ସହିତ ମହିଳା କାର୍ଡ ଖେଳିଛି ବିଜେଡି । ବିଜେପିରୁ ଅସନ୍ତୋଷ ହୋଇ ଇସ୍ତଫା ଦେଇଥିବା ସୁଶାନ୍ତ ମିଶ୍ରଙ୍କ ସ୍ତ୍ରୀ ପରିଣୀତା ମିଶ୍ରଙ୍କୁ ଟିକେଟ ଦେଇ ବିଜେଡି ନିଜର ସାଂସଦ ପ୍ରାର୍ଥୀ କରିଛି ।
ବିଜେପିର ପୂର୍ବତନ ବିଧାୟକ ପ୍ରଦୀପ ପୁରୋହିତଙ୍କୁ ଚଳିତ 2024 ସାଧାରଣ ନିର୍ବାଚନରେ ପଦ୍ମପୁର ବିଧାନସଭା ଆସନରେ ଟିକେଟ ନଦେଇ ଦଳ ବରଗଡ଼ ଲୋକସଭା ଆସନ ପାଇଁ ବାଛିଛି । ପ୍ରଦୀପ ପୁରୋହିତ ବରଗଡ଼ର ସାଂସଦ ପ୍ରାର୍ଥୀ ହୋଇଛନ୍ତି । ତେବେ କଂଗ୍ରେସ ଦଳର ପୁରୁଣା ଚେହେରା ସଞ୍ଜୟ ଭୋଇଙ୍କୁ ଟିକେଟ ଦେଇଛି । ଯିଏକି ପୂର୍ବରୁ କଂଗ୍ରେସରେ ଥିବାବେଳେ ପରେ ବିଜେପିରେ ସାମିଲ ହୋଇଥିଲେ ଓ ପୁଣି କଂଗ୍ରେସକୁ ଫେରିଛନ୍ତି । ବରଗଡ ଲୋକସଭା ଆସନ ପାଇଁ ଉଭୟ ବିଜେପି ଓ କଂଗ୍ରେସ ଦଳ ଦୁଇ ଜଣ ଦକ୍ଷ ପ୍ରାର୍ଥୀଙ୍କୁ ଟିକେଟ ଦେଇଥିବାବେଳେ ବିଜେଡି ମହିଳା କାର୍ଡ ଖେଳିଛି ।
ପଦ୍ମପୁର ବିଧାନସଭା ନିର୍ବାଚନ ମଣ୍ଡଳୀରେ ଉଭୟ ବିଜେପି ଓ କଂଗ୍ରେସ ଦଳର ପ୍ରାର୍ଥୀଙ୍କ ମଧ୍ୟରେ ଭଲ ଜନସମ୍ପର୍କ ରହିଛି । ବିଜେଡିର ପ୍ରାର୍ଥିନୀ ନୂଆ ଚେହେରା ହୋଇଥିଲେ ମଧ୍ୟ ତାଙ୍କ ସ୍ଵାମୀ ସୁଶାନ୍ତ ମିଶ୍ରଙ୍କ ଭଟଲି ବିଧାନସଭା ଆସନରେ ଭଲ ଲୋକସମ୍ପର୍କ ରହିଛି । ବରଗଡ଼ ଲୋକସଭା ଆସନ ବରଗଡ ଜିଲ୍ଲାର 5ଟି ଆସନ ସହିତ ଝାରସୁଗୁଡା ଏବଂ ବ୍ରଜରାଜନଗର ବିଧାନସଭା ଆସନକୁ ନେଇ ଗଠିତ । ସମୁଦାୟ 7 ଟି ଆସନକୁ ନେଇ ଗଠିତ ହୋଇଥିବାବେଳେ ତିନି ପ୍ରମୁଖ ଦଳର ପ୍ରାର୍ଥୀଙ୍କ ବରଗଡ଼ ଜିଲ୍ଲା ବାହାର ଦୁଇ ବିଧାନସଭା ଆସନରେ କୌଣସି ପ୍ରକାରର ଲିଙ୍କ୍ ନାହିଁ । ତେବେ ଝାରସୁଗୁଡା ଏବଂ ବ୍ରଜରାଜନଗରରେ କେଉଁ ଦଳର ଲୋକପ୍ରିୟତା ଅଧିକ ରହିଛି ତାହା ମଧ୍ୟ ଏକ ଗୁରୁତ୍ବପୂର୍ଣ୍ଣ ବିଷୟ । ଏହାବ୍ଯତୀତ ବିଜେଡି ପକ୍ଷରୁ ଖେଲାଯାଇଥିବା ମହିଳା କାର୍ଡ ଦଳ ପାଇଁ କେତେ ଫଳପ୍ରଦ ହେଉଛି ତା ଉପରେ ନଜର ।
ଇଟିଭି ଭାରତ, ବରଗଡ଼
