ଭୁବନେଶ୍ବର: ନିର୍ବାଚନ ଯେତେ ପାଖଉଛି ରାଜନୈତିକ ଦଳ ମଧ୍ୟରେ ଆରୋପ ପ୍ରତ୍ୟାରୋପ ବୃଦ୍ଧି ପାଉଛି । ଭୋଟରଙ୍କୁ ନିଜ ଆଡ଼କୁ ଆକର୍ଷିତ କରିବା ଲାଗି ସମସ୍ତ ଉଦ୍ୟମ କରୁଛନ୍ତି ରାଜନୈତିକ ଦଳ । ଏହାରି ମଧ୍ୟରେ ବିଜେପି ସଭାନେତ୍ରୀ ଲେଖାଶ୍ରୀ ସାମନ୍ତସିଂହାର ଶାସକ ଦଳ ବିଜେଡି ଉପରେ ବର୍ଷିଛନ୍ତି । ବିଜେଡିର ଓଡ଼ିଶାବାସୀଙ୍କ ପ୍ରତି ଆନ୍ତରିକତ ନାହିଁ । ବିଜେଡି ନିର୍ବାଚନ ଆସିଲେ ବିଭିନ୍ନ ଲୋକଙ୍କୁ ବିଭିନ୍ନ ଲଲିପପ୍ ଧରାଇ ମିଛ ଆଶା ଦେବାରେ ବିଶ୍ବାସ କରେ ବୋଲି ସେ ଅଭିଯୋଗ କରିଛନ୍ତି । ଯଦି ଚଳିତ ନିର୍ବାଚନରେ ବିଜେପି ସରକାରକୁ ଆସେ ତେବେ ୩୦୦୦ ବାର୍ଦ୍ଧକ୍ୟ ଭତ୍ତା ଦେବ ବୋଲି ସେ କହିଛନ୍ତି ।
ଲେଖାଶ୍ରୀ କହିଛନ୍ତି, "ବିଜେଡି ନିର୍ବାଚନ ଆସିଲେ ବିଭିନ୍ନ ଲୋକଙ୍କୁ ବିଭିନ୍ନ ଲଲିପପ ଧରାଇ ମିଛ ଆଶା ଦେବାରେ ବିଶ୍ବାସ କରେ । ପିଠା, କାଳିଆ ଯୋଜନା ଭଳି ଅନେକ ଯୋଜନା କରେ । ତାଙ୍କର କୌଣସି ଆନ୍ତରିକତା ନାହିଁ । ୫ ବର୍ଷ ଧରି ଲୋକ ଛଟପଟ ହୁଅନ୍ତି, ଆନ୍ଦୋଳନ କରନ୍ତି, ହେଲେ କିଛି ଫଳ ମିଳେନି, ନିର୍ବାଚନ ମାସେ କି ୧୫ ଦିନ ଥିବ, ରାଜ୍ୟ ସରକାର ଗୋଟେ ଘୋଷଣା କରିଦିଅନ୍ତି । ଏହା ନବୀନ ବାବୁଙ୍କ ଏକ କାର୍ଯ୍ୟ ପଦ୍ଧତି ହେଇଗଲାଣି । ବିଜେପି ସରକାରକୁ ଆସିଲେ ୩୦୦୦ କରିବ ବାର୍ଦ୍ଧକ୍ୟ ଭତ୍ତା ।"
ସେ ଆହୁରି କହିଛନ୍ତି, " ବିଜେପି ଲୋକଙ୍କ ପାଇଁ ସମର୍ପିତ, ପ୍ରତିଶ୍ରୁତିବଦ୍ଧ, ସାମାଜିକ ଭତ୍ତା ଯାହା ସେମାନଙ୍କର ଏକ ଲମ୍ବା ଡିମାଣ୍ଡ ରହିଆସିଛି ଯେ ୫୦୦ରୁ ୩୦୦୦ ଟଙ୍କା ବୃଦ୍ଧି ହେଉ, ବିଜେପି କ୍ଷମତାକୁ ଆସିଲେ ଏକଥା ବିଜେପି ହିଁ ପୂରଣ କରିବ । ଲୋକଙ୍କ ଦାବି କୁ ପୂରଣ କରିବୁ,ଯେଉଁ ବିଭିନ୍ନ ବର୍ଗର ଲୋକଙ୍କୁ ଦୀର୍ଘ ସମୟ ଧରି ଉପେକ୍ଷା କରାଯାଇଛି ସେମାନଙ୍କ ଦାୟିତ୍ବ ବିଜେପି ନେଇଛି, ୟେ ହେଉଛି ମୋଦିଙ୍କ ଗ୍ୟାରେଣ୍ଟି ।"
ଦୀର୍ଘ ଦିନର ଦାବି ସତ୍ତ୍ବେ ରାଜ୍ୟ ସରକାର ବୃଦ୍ଧ, ଭିନ୍ନକ୍ଷମ ଏବଂ ବିଧବାଙ୍କୁ ପୁଣି ଥରେ ନିରାଶ କରିଛନ୍ତି । ପଡୋଶୀ ରାଜ୍ୟମାନଙ୍କଠାରୁ କୌଣସି ଶିକ୍ଷା ଲାଭ କରିନଥିବା ବିଜେଡି ସରକାରର ହେୟଜ୍ଞାନ ମନୋଭାବ କୁଠାରାଘାତ ସଦୃଶ । ପ୍ରଚାର ସର୍ବସ୍ବ ନବୀନ ସରକାର ‘ନୂଆ-ଓ’ ଯୋଜନା ଜରିଆରେ ଶହ ଶହ କୋଟି ଟଙ୍କା ଭୋଜି ଭାତ ଓ ମୌଜ ମଜଲିସରେ ଖର୍ଚ୍ଚ କରି ପ୍ରଚାର କରୁଥିବାବେଳେ ଗରୀବ ବୃଦ୍ଧ, ଭିନ୍ନକ୍ଷମ ଏବଂ ବିଧବାମାନଙ୍କୁ ଉପେକ୍ଷା କରି ଭତ୍ତା ବାବଦରେ ମାସକୁ ମାତ୍ର ୫୦୦ ବୃଦ୍ଧି କରିବା ଅତ୍ୟନ୍ତ ଦୁର୍ଭାଗ୍ୟଜନକ । ଠିକ ନିର୍ବାଚନ ପୂର୍ବରୁ ଏକ ନିର୍ବାଚନୀ ଚାଲ ଚଲାଇ ବିଜେଡି ସରକାର ଏହି ଅସହାୟମାନଙ୍କୁ ଭଣ୍ଡେଇବାକୁ ଚେଷ୍ଟା କରିଛନ୍ତି ।
ସୂଚନା ଥାଉ କି ମଧୁବାବୁ ପେନସନ ଯୋଜନାର ହିତାଧିକାରୀଙ୍କ ପାଇଁ ଖୁସିର ଖବର । ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଯୋଜନାରେ ମାସିକ ପେନସନ ରାଶିରେ ୫୦୦ ଟଙ୍କା ବୃଦ୍ଧି ଘୋଷଣା କରିଛନ୍ତି । ଏଣିକି ମଧୁବାବୁ ପେନସନ ଯୋଜନାରେ ହିତାଧିକାରୀମାନେ ସର୍ବନିମ୍ନ ପେନସନ ରାଶି ୧୦୦୦ ଟଙ୍କା ପାଇବେ । ଏହି ବର୍ଦ୍ଧିତ ପେନସନ ହିତାଧିକାରୀମାନେ ଚଳିତ ଫେବୃଆରୀ ମାସରୁ ପାଇବେ । ପୂର୍ବରୁ ଏହି ଯୋଜନାରେ ହିତାଧିକାରୀମାନେ ଯଥାକ୍ରମେ ୫୦୦, ୭୦୦ ଓ ୯୦୦ ଟଙ୍କା ପାଉଥିଲେ । ବର୍ଦ୍ଧିତ ପେନସନ ଅନୁଯାୟୀ ସେମାନେ ଏବେ ଯଥାକ୍ରମେ ୧୦୦୦, ୧୨୦୦ ଓ ୧୪୦୦ ଟଙ୍କା ପାଇବେ। ଏହି ବର୍ଦ୍ଧିତ ପେନସନ ପାଇଁ ରାଜ୍ୟ ସରକାର ବାର୍ଷିକ ୩୬୮୩ କୋଟି ଟଙ୍କା ଖର୍ଚ୍ଚ କରିବେ ।
ଇଟିଭି ଭାରତ, ଭୁବନେଶ୍ବର
