ନୂଆଦିଲ୍ଲୀ: ଆଜି ଭାରତୀୟ ଜନତା ପାର୍ଟି 5ମ ପର୍ଯ୍ୟାୟରେ 17 ରାଜ୍ୟର 111 ସଂସଦୀୟ ଆସନରେ ପ୍ରାର୍ଥୀ ଘୋଷଣା କରିଛି । ଏକାଧିକ କେନ୍ଦ୍ରମନ୍ତ୍ରୀ, ପୂର୍ବତନ କେନ୍ଦ୍ରମନ୍ତ୍ରୀ ଓ ବରିଷ୍ଠ ସାଂସଦଙ୍କୁ ଟିକେଟ ମିଳିଥିଲା ବେଳେ କିଛି ଚର୍ଚ୍ଚିତ ଚେହେରା ମଧ୍ୟ ବିଜେପି ଟିକେଟରେ ଚଳିତ ନିର୍ବାଚନୀ ଏଣ୍ଟ୍ରି କରିବାକୁ ଯାଉଛନ୍ତି । ବିବାଦୀୟ ଓ ଚର୍ଚ୍ଚିତ ଅଭିନେତ୍ରୀ କଙ୍ଗନା ରାଣାଓ୍ବାତ ନିଜ ଗୃହରାଜ୍ୟ ହିମାଚଳ ପ୍ରଦେଶର ମଣ୍ଡି ଲୋକସଭା ଆସନରୁ ନିର୍ବାଚନରେ ଡେବ୍ୟୁ କରିବାକୁ ଯାଉଛନ୍ତି ।
ସେହିପରି ରମାୟଣ ଧାରାବାହିକର ଲୋକପ୍ରିୟ ଷ୍ଟାର ଅରୁଣ ଗୋଭିଲ ମଧ୍ୟ ଟିକେଟ ପାଇଛନ୍ତି । ସଂଧ୍ୟାରେ ପ୍ରାର୍ଥୀ ଘୋଷଣାର କିଛି ମିନିଟ ପୂର୍ବରୁ ଦଳରେ ସାମିଲ ହୋଇଥିବା ବିଶିଷ୍ଟ ଶିଳ୍ପପତି ନବୀନ ଜିନ୍ଦଲ କଂଗ୍ରେସ ସମୟର ନିଜ ପୂର୍ବ ଆସନ ହରିୟାଣାର କୁରୁକ୍ଷେତ୍ରରୁ ପ୍ରାର୍ଥୀ ଭାବେ ଘୋଷଣା ହୋଇଛନ୍ତି । ନିକଟରେ ନ୍ୟାୟିକ ସେବାରୁ ଅବସର ନେଇ ବିଜେପିରେ ସାମିଲ ହୋଇଥିବା କୋଲକାତା ହାଇକୋର୍ଟର ବିଚାରପତି ଅଭିଜିତ ଗଙ୍ଗୋପାଧ୍ୟାୟଙ୍କୁ ମଧ୍ୟ ଟିକେଟ ମିଳିଛି । ନିକଟରେ ବିଜେପିରେ ସାମିଲ ହୋଇଥିବା ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଭାଉଜ ସୀତା ସୋରେନ ମଧ୍ୟ ବିଜେପି ଟିକେଟରେ ନିର୍ବାଚନ ଲଢିବାକୁ ଯାଉଛନ୍ତି ।
ରାଜ୍ୟଓ୍ବାରୀ ପ୍ରାର୍ଥୀ ସଂଖ୍ୟା:- ଏହି ତାଲିକାରେ ବିଜେପି ଆନ୍ଧ୍ର ପ୍ରଦେଶର 6ଜଣ ପ୍ରାର୍ଥୀ, ବିହାରର 17 ଜଣ, ଗୋଆର ଜଣେ, ଗୁଜୁରାଟର 6ଜଣ, ହରିୟାଣାର 4, ହିମାଚଳ ପ୍ରଦେଶର 2 ଜଣ, ଝାଡଖଣ୍ଡର 3ଜଣ, କର୍ଣ୍ଣାଟକର 4ଜଣ, କେରଳର 4ପ୍ରାର୍ଥୀ ସାମିଲ ରହିଛନ୍ତି । ସେହିପରି ମହାରାଷ୍ଟ୍ରରୁ 3, ମିଜୋରାମରୁ ଜଣେ, ଓଡିଶାରେ 18 ଲୋକସଭା ଆସନ, ରାଜସ୍ଥାନରେ 7, ସିକ୍କିମରେ ଜଣେ, ତେଲେଙ୍ଗାନାରେ 2, ଉତ୍ତର ପ୍ରଦେଶରେ 13 ଏବଂ ପଶ୍ଚିମବଙ୍ଗରେ 19 ଜଣ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି ।
ସେହିପରି କେନ୍ଦ୍ରମନ୍ତ୍ରୀ ଅଶ୍ବିନୀ କୁମାର ଚୌବେ, ଜେନେରାଲ ବି.କେ ସିଂ,ଅନନ୍ତ ହେଗଡେଙ୍କୁୁ ଦଳ ଏଥର ଟିକେଟ ଦେଇନାହିଁ । ଟିକେଟ ଘୋଷଣା ପରେ ଜେନେରାଲ ବି.କେ ସିଂ କହିଛନ୍ତି, ସେ ନିର୍ବାଚନ ଲଢିବାକୁ ଅନିଚ୍ଛା ପ୍ରକାଶ କରିଥିଲେ । ଅନ୍ୟତମ ଚର୍ଚ୍ଚିତ ଯୁବନେତା ବରୁଣ ଗାନ୍ଧୀଙ୍କୁ ଚଳିତଥର ଟିକେଟ ମିଳିନି । ମା ମାନେକା ଗାନ୍ଧୀ ସୁଲତାନପୁରରୁ ନିର୍ବାଚନ ଲଢିବାକୁ ଯାଉଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
