ଖୋର୍ଦ୍ଧା: ସାଧାରଣ ନିର୍ବାଚନ ନେଇ ବିଗୁଲ ବାଜିସାରିବା ପରେ ଆରମ୍ଭ ହୋଇଯାଇଛି ନିର୍ବାଚନୀ ପ୍ରସ୍ତୁତି ପର୍ବ । ପ୍ରାର୍ଥୀଙ୍କ ନାଁ ଘୋଷଣା ହୋଇନଥିଲେ ବି ଜମିଲାଣି ପ୍ରଚାର । ହେଲେ ବଦଳିଛି ପାରମ୍ପରିକ ପ୍ରଚାର ଷ୍ଟ୍ରାଟେଜି । ଏବେ ସଭା ସମିତି ଓ ଘର ଘର ବୁଲି ପ୍ରଚାର କରିବା ନୁହେଁ ବରଂ ଡିଜିଟାଲ ପ୍ରଚାରକୁ ଅଧିକ ଗୁରୁତ୍ୱ ଦେଉଛନ୍ତି ଆଶାୟୀ ପ୍ରାର୍ଥୀ, ନେତା ଓ କର୍ମୀମାନେ । ସେପଟେ ଭୋଟର ବି ସୋସିଆଲ ମିଡିଆ ମାଧ୍ୟମରେ ଯୋଗ୍ୟ ନେତାଙ୍କୁ ବାଛିବାକୁ ବେଶ ପସନ୍ଦ କରୁଛନ୍ତି ।
ନିର୍ବାଚନ ଯେତିକି ପାଖଉଛି ସେତିକି ଜମୁଛି ପ୍ରଚାର । ତାରିଖ ଓ ପ୍ରାର୍ଥୀ ଚୂଡାନ୍ତ ହୋଇନଥିଲେ ମଧ୍ୟ ଗାଁ ଗାଁ ବୁଲି ବିଭିନ୍ନ ସ୍ଥାନରେ କରୁଛନ୍ତି ସଭା ସମିତି ସମ୍ମିଳନୀ କରିବା ଆରମ୍ଭ କରିଦେଲେଣି ଆଶାୟୀ । ତେବେ ସାଂପ୍ରତିକ ପରିସ୍ଥିତିରେ ବଦଳିଛି ପ୍ରଚାର ତରିକା । କେବଳ କାନ୍ଥବାଡ଼ରେ ପୋଷ୍ଟର ମାରି ନୁହେଁ ବରଂ ଏବେ ଡିଜିଟାଲ ପ୍ରଚାରକୁ ସବୁ ଦଳ ଅଧିକ ଗୁରୁତ୍ବ ଦେଉଛନ୍ତି । ସୋସିଆଲ ମିଡିଆରେ ଜୋରଦାର ପ୍ରଚାର ଚାଲୁଛି ।
ନେତାମାନେ ସକାଳୁ ରାତି ଯାଏ କୁଆଡ଼େ ଓ କାହିଁକି ଯାଉଛନ୍ତି, କାହାକୁ ଭେଟୁଛନ୍ତି ଏବଂ କଣ କାର୍ଯ୍ୟକ୍ରମ କରୁଛନ୍ତି ଏ ସବୁର ଟିକିନିଖି ଘଟଣାକୁ ସୋସିଆଲ ମିଡିଆରେ ଅପଲୋଡ କରୁଛନ୍ତି । ପାରମ୍ପରିକ ପ୍ରଚାରରୁ ଆଗକୁ ଗଲେଣି ନେତା । କର୍ମୀ ବି ଆଉ ପଛରେ ନାହାନ୍ତି । ଗାଁ ଗାଁ ବୁଲି ଜିନ୍ଦାବାଦ କରିବା ବଦଳରେ ମୋବାଇଲ ଖୋଲି ସୋସିଆଲ ମିଡିଆରେ ପ୍ରଚାର କରୁଛନ୍ତି । ସୋସିଆଲ ମିଡ଼ିଆ ଫେସବୁକ, ଏକ୍ସ, ଇନଷ୍ଟାଗ୍ରାମ ଓ ୟୁଟ୍ୟୁବ୍ରେ ଜୋରଦାର ହେଉଛି ପ୍ରଚାର ।
ସମସ୍ତଙ୍କ ହାତରେ ସ୍ମାର୍ଟ ଫୋନ ଥିବାରୁ ଏହାର ଭରପୁର ଫାଇଦା ଉଠାଇବା ଲକ୍ଷରେ ଅଛନ୍ତି ଆଶାୟୀ । ବିଭିନ୍ନ ପ୍ରକାର ଗ୍ରୁପ ଓ ପୋଷ୍ଟ କରି ଭୋଟରଙ୍କ ପାଖରେ ଅତି ସହଜରେ ପହଞ୍ଚି ନିଜର ମନର କଥା ରଖୁଛନ୍ତି । ସେହିପରି ନିଜର ନିର୍ବାଚନୀ ଇସ୍ତାହାର ମଧ୍ୟ ଭୋଟରଙ୍କ ପାଖରେ ରଖୁଛନ୍ତି । ଏଥିରେ ଯୁବ, ଛାତ୍ର, ମହିଳା ଠାରୁ ବରିଷ୍ଠ ଭୋଟର ମଧ୍ୟ ପ୍ରଭାବିତ ହେଉଛନ୍ତି ।
ନେତାମାନଙ୍କ କହିବାନୁଯାୟୀ, ଭୋଟରମାନଙ୍କ ପାଖରେ ପହଞ୍ଚିବାକୁ ସୋସିଆଲ ମିଡିଆ ବଳିଷ୍ଠ ମାଧ୍ୟମ । ଏହାଦ୍ୱାରା ସିଧାସଳଖ ଭୋଟର ମାନଙ୍କ ପାଖରେ ପହଞ୍ଚି ହେବ । ସୋସିଆଲ ମିଡିଆ ମାଧ୍ୟମରେ କମ ସମୟ ମଧ୍ୟରେ, ଅଳ୍ପ ଖର୍ଚ୍ଚରେ ସବୁ ଭୋଟରମାନଙ୍କ ପାଖରେ ପହଞ୍ଚି ହେଉଛି । ସେମାନଙ୍କ ମତାମତ ମଧ୍ୟ ନେଇ ହେଉଛି । ସୋସିଆଲ ମିଡିଆ ଏଥର ନିର୍ବାଚନକୁ ବେଶ ପ୍ରଭାବ ପକାଇବ ଓ ଭୋଟରଙ୍କୁ ମନେବାରେ ସହାୟକ ହେବ ବୋଲି କହିଛନ୍ତି ନେତା ।
ଅନ୍ୟପଟେ ଭୋଟର ବି ସୋସିଆଲ ମିଡିଆରେ ବେଶ ଆକ୍ଟିଭ । ସେମାନଙ୍କ କହିବାନୁଯାୟୀ, ସୋସିଆଲ ମିଡିଆ ମାଧ୍ୟମରେ ନିଜ ପସନ୍ଦର ନେତା ଚୟନ କରିବାରେ ବେଶ ସୁବିଧା ହେବ । ସାଧାରଣ ନିର୍ବାଚନରେ ସୋସିଆଲ ମିଡିଆ ପ୍ରଚାର ନିର୍ଣ୍ଣାୟକ ଭୂମିକା ଗ୍ରହଣ କରିବ ।
ଇଟିଭି ଭାରତ, ଖୋର୍ଦ୍ଧା