ଗଜପତି: ଆଜି ଗଜପତି ଜିଲ୍ଲାରେ ବିଭିନ୍ନ ଦଳର ପ୍ରାର୍ଥୀମାନେ ନିଜର ନାମାଙ୍କନ ଦାଖଲ କରିଛନ୍ତି । ଉଭୟ ମୋହନା ଏବଂ ପାରଳାଖେମୁଣ୍ଡି ବିଧାନସଭା ଆସନ ପାଇଁ ୫ଜଣ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି । ପାରଳାଖେମୁଣ୍ଡି ବିଧାନସଭା ଆସନ ପାଇଁ କଂଗ୍ରେସ ପ୍ରାର୍ଥୀ ବିଜୟ ପଟ୍ଟନାୟକ ଏବଂ ବିଜେପି ପ୍ରାର୍ଥୀ କେ.ନାରାୟଣ ରାଓ ନିଜର ପ୍ରାର୍ଥୀପତ୍ର ଦାଖଲ କରିଥିବା ବେଳେ ଅଲ ଇଣ୍ଡିଆ ଫରୱାର୍ଡ ବ୍ଲକ ପକ୍ଷରୁ ପି.ମୂରଲୀ କ୍ରିଷ୍ଣା ମଧ୍ୟ ନିଜ ପ୍ରାର୍ଥୀପତ୍ର ଦାଖଲ କରିଛନ୍ତି । ସେହିପରି ମୋହନା ବିଧାନସଭା ଆସନ ପାଇଁ ବିଜେପି ପ୍ରାର୍ଥୀ ପ୍ରଶାନ୍ତ ମଲିକ ଏବଂ ବିଜେଡି ପ୍ରାର୍ଥୀ ଅନ୍ତର୍ଯ୍ୟାମୀ ଗମାଙ୍ଗ ମଧ୍ୟ ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି । ସମସ୍ତ ପ୍ରାର୍ଥୀ ନିଜ ନିଜ ସମର୍ଥକମାନଙ୍କ ସହ ଶୋଭାଯାତ୍ରା ଆସି ପ୍ରାର୍ଥୀପତ୍ର ଦାଖଲ କରିଥିବା ବେଳେ ସମସ୍ତେ ନିଜ ନିଜ ବିଜୟ ନେଇ ଖୁବ ଆଶାବାଦୀ ଥିବା କହିଛନ୍ତି ।
ଏହା ମଧ୍ୟ ପଢନ୍ତୁ...ସମର୍ଥକଙ୍କ ସହ ଆସି ରାୟଗଡ଼ାରେ ନାମାଙ୍କନ ଭରିଲେ ବିଭିନ୍ନ ଦଳର ପ୍ରାର୍ଥୀ - ODISHA ASSEMBLY ELECTION 2024
କଂଗ୍ରେସ ପାର୍ଥୀ ବିଜୟ ପଟ୍ଟନାୟକ କହିଛନ୍ତି ଯେ, ଲୋକଙ୍କ ସମର୍ଥନ ପାଇ ସେ ଉତ୍ସାହିତ ଅଛନ୍ତି । ଅଞ୍ଚଳର ବିକାଶକୁ ପ୍ରାଥମିକତା ଦେବା ସହ ଦାଦନ ସମସ୍ୟାକୁ ଦୂର କରିବାକୁ ସେ ପଦକ୍ଷେପ ନେବେ। ଏହା ସହ ସେ ବିଜେପି ଓ ବିଜେଡି ବିରୋଧରେ ବର୍ଷିଛନ୍ତି । ସେହିପରି ନାରାୟଣ ନିଜ ପ୍ରତିକ୍ରିୟାରେ କହିଛନ୍ତି ଯେ, ଲୋକଙ୍କ ସହ ମୁଁ ଗତ ଅନେକ ବର୍ଷ ହେଲା ରହିଛି, ଲୋକେ ମଧ୍ୟ ମୋ ସହ ରହିଛନ୍ତି । ତେଣୁ ଏଥର ମଧ୍ୟ ନିଶ୍ଚିତ ଭାବେ ବିଜୟୀ ହେବି ବୋଲି ସେ କହିଛନ୍ତି ।
ସେହିପରି ମୋହନା ଆସନ ପାଇଁ ପ୍ରାର୍ଥୀପତ୍ର ଦାଖଲ କରିଥିବା ବିଜେଡି ପ୍ରାର୍ଥୀ ଅନ୍ତର୍ଯ୍ୟାମୀ ଗମାଙ୍ଗ କହିଛନ୍ତି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶମୂଳକ କାମ ଲୋକଙ୍କୁ ଅନେକ ସହାୟକ ହୋଇଛି । ତେଣୁ ତାହାକୁ ଭିତ୍ତି କରି ସେ ଏହି ନିର୍ବାଚନ ବିଜୟୀ ହେବେ ବୋଲି ସେ କହିଛନ୍ତି । ବିଜେପି ପ୍ରାର୍ଥୀ ପ୍ରଶାନ୍ତ କହିଛନ୍ତି ଯେ,ଗତ ନିର୍ବାଚନରେ ସମୟ ଅଭାବରୁ ଆମେ ଟକ୍କର ଦେଇ ପାରି ନଥିଲୁ କିନ୍ତୁ ଏଥର ସେ ଭୁଲ ହେବ ନାହିଁ । ରାଜ୍ୟରେ ଚାଲିଥିବା ଭ୍ରଷ୍ଟ ସରକାରକୁ ହଟାଇବା ସହ ପ୍ରଧାନମନ୍ତ୍ରୀ ମୋଦୀଙ୍କ ବିକାଶ ଧାରାରେ ସାମିଲ ହେବା ପାଇଁ ଓଡିଶାର ଲୋକେ ସ୍ଥିର କରିସାରିଛନ୍ତି । ତେଣୁ ଏଥର ଲୋକେ ତାଙ୍କୁ ବିଜୟୀ କରାଇ ପ୍ରଧାନମନ୍ତ୍ରୀଙ୍କ ହାତମୁଠାକୁ ଟାଣ କରିବେ ବୋଲି କହିଛନ୍ତି ।
ଇଟିଭି ଭାରତ, ଗଜପତି
