ହାଇଦ୍ରାବାଦ: ବିଦେଶରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କ୍ରେଜ । ଲୋକସଭା ନିର୍ବାଚନରେ ମୋଦିଙ୍କ ସମର୍ଥନରେ ବିଦେଶରେ ହେଲା କାର ରାଲି । ଆମେରିକାରେ ଗତକାଲି (ରବିବାର) ଦିନ ବିଜେପି ତଥା ମୋଦିଙ୍କ ସମର୍ଥନରେ ଏକ ବିଶାଳ କାର ରାଲି ଦେଖିବାକୁ ମିଳିଛି । ଅବକି ବାର୍ 400 ପାର୍ (ଏଥର 400 ଉପରେ), ତିସରି ବାର୍ ମୋଦି ସରକାର୍ (ତୃତୀୟ ଥର ପାଇଁ ମୋଦି ସରକାର ), ମେଁ ହୁଁ ମୋଦି ପରିବାର୍ ( ମୁଁ ମୋଦି ପରିବାର) ନାରା ସହ ବିଜେପି ଓ ପ୍ଲାକାର୍ଡ ଧରି ଏକ ବିଶାଲ ରାଲି କରିଛନ୍ତି ଭାରତୀୟ ପ୍ରବାସୀ ।
ଦେଶରେ ଲୋକସଭା ନିର୍ବାଚନକୁ ନେଇ ବାଜିସାରିଛି ବିଗୁଲ । ପ୍ରମୁଖ ରାଜନୈତିକ ଦଳମାନେ ବି ନିର୍ବାଚନ ପ୍ରଚାର ଆରମ୍ଭ କରିଦେଲେଣି । ତେବେ କେବଳ ଦେଶରେ ମୋଦି ନାରା ନୁହେଁ ବରଂ ବିଦେଶରେ ମଧ୍ୟ ମୋଦିଙ୍କ ଲୋକପ୍ରିୟତା ଦେଖିବାକୁ ମିଳିଛି । ଆମେରିକାରେ ବାସ କରୁଥିବା ଭାରତୀୟମାନେ ଶିଖ ସମ୍ପ୍ରଦାୟର ଲୋକମାନେ ମାର୍ଚ୍ଚ 31 ତାରିଖରେ ପ୍ରଧାନମନ୍ତ୍ରୀଙ୍କ ସମର୍ଥନରେ ଏକ ବିଶାଳ କାର ରାଲି କରିଛନ୍ତି ।
ମେରିଲ୍ୟାଣ୍ଡ୍ ଓ ଜର୍ଜିଆର ରାଜଧାନୀ ଆଟ୍ଲାଣ୍ଟାରେ ଏହି କାର ରାଲି ଦେଖିବାକୁ ମିଳିଛି । ଏହି ରାଲିରେ ପାଖାପାଖି 150 କାର ସାମିଲ ହୋଇଥିବା ବେଳେ ଅବକି ବାର 400 ପାର୍ (ଏଥର 400 ଉପରେ) ନାରା ଦେଉଛନ୍ତି । ତିସରି ବାର ମୋଦି ସରକାର (ତୃତୀୟ ଥର ପାଇଁ ମୋଦି ସରକାର ), ମେଁ ହୁଁ ମୋଦି ପରିବାର ( ମୁଁ ମୋଦି ପରିବାର) ଭଳି ନାରା ଦେଇଥିଲେ । ଅନ୍ୟପଟେ ମୋଦିଙ୍କ ସମର୍ଥନରେ ବାହାରିଥିବା ଏହି କାର୍ ରାଲିର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ବିଜେପି ପତାକା ସହ ବିଭିନ୍ନ ପ୍ଲାକାର୍ଡ କାରରେ ଲଗାଯାଇଛି ।
ଭାରତର ଲୋକସଭା ନିର୍ବାଚନ ଉପରେ କେବଳ ଦେଶର ନୁହେଁ ବରଂ ସାରା ବିଶ୍ୱର ନଜର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ୍ରମାଗତ ଭାବେ 2 ଥର ପ୍ରଧାନମନ୍ତ୍ରୀ ଭାବେ ନିର୍ବାଚିତ ହୋଇଥିବା ବେଳେ ଚଳିତ ନିର୍ବାଚନରେ ତୃତୀୟ ଥର ପାଇଁ ସେ ପୁଣି ଦାୟିତ୍ୱରେ ରହୁଛନ୍ତି ନାଁ ଏଥିରେ ପରିବର୍ତ୍ତନ ଆସିବ ତାହା ଉପରେ ପୁରା ବିଶ୍ୱର ନଜର । ସୂଚନା ଯୋଗ୍ୟ, ଭାରତର ଲୋକସଭା ନିର୍ବାଚନର ପ୍ରଥମ ପର୍ଯ୍ୟାୟ ଭୋଟିଂ ମେ 19ରେ ଆରମ୍ଭ ହେବାକୁ ଯାଉଛି ଓ ଜୁନ 4ରେ ଫଳାଫଳ ପ୍ରକାଶ ପାଇବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
