ଡେରାଡୁନ: ଉତ୍ତରାଖଣ୍ଡରେ ଭାରସାମ୍ୟ ହରାଇ ଓଲଟିଲା ଯାତ୍ରୀ ବସ୍ । ଦୁର୍ଘଟଣାଟି ଭଦ୍ରାକାଳୀଠାରୁ ନରେନ୍ଦ୍ରନଗର ଆଡକୁ ଯିବା ରାସ୍ତାରେ ଘଟିଛି । ତେହେରୀ ଗରୱାଲ ରାସ୍ତାରେ ବସଟି ଭାରସାମ୍ୟ ହରାଇ ଓଲଟି ପଡିଛି । ଏହି ଦୁର୍ଘଟଣାରେ ବହୁ ଯାତ୍ରୀ ଆହାତ ହୋଇଥିବା ବେଳେ ଅନେକ ଗୁରୁତର ରହିଛନ୍ତି । ତେବେ ଘଟଣା ସ୍ଥଳରେ ପୋଲିସ, SDRF ଏବଂ ଅଗ୍ନିଶମ କର୍ମୀ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ବସଟି ଋଷିକେଶର ତେହେରୀରୁ ଚମ୍ବାଲ ଆଡ଼କୁ ଯାଉଥିବା ଜଣାପଡ଼ିଛି । ସମସ୍ତ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲେ ଭର୍ତ୍ତି କରାଯାଇଛି ।
ସୂଚନାଯୋଗ୍ୟ, UK ୦୭ PC ୦୪୩୪ ନଂ ଏକ ଯାତ୍ରୀବାହୀ ବସ ତେହେରୀରୁ ଚମ୍ବାଲ ଆଡ଼କୁ ଯାଉଥିବା ବେଳେ ଭଦ୍ରାକାଳୀ ଠାରୁ କିଛି ଦୂରକୁ ଗଲା ପରେ ହଠାତ୍ ଭାରସାମ୍ୟ ହରାଇ ଓଲଟି ପଡ଼ିଥିଲା । ଏଥିରେ 35 ରୁ 40 ଜଣ ଯାତ୍ରୀ ରହିଥିଲେ । ଏଥିମଧ୍ୟରୁ 2 ଜଣ ଗୁରୁତର ଆହତ ହୋଇଥିବା ବେଳେ ଅନେକ ସାମାନ୍ୟ ଆହାତ ହୋଇଛନ୍ତି । ଦୁର୍ଘଟଣା ପରେ ସ୍ଥାନୀୟ ଲୋକେ ସଙ୍ଗେ ସଙ୍ଗେ ଆହତଙ୍କୁ ଉଦ୍ଧାର କରିବା ସହ ପୋଲିସରେ ଖବର ଦେଇଥିଲେ । ଖବର ପାଇ ପୋଲିସ, SDRF ଏବଂ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ବସରେ ଫସିଥିବା ଲୋକଙ୍କୁ ଉଦ୍ଧାର କରିଥିଲେ ।
ସେପଟେ ଏହି ଦୁର୍ଘଟଣାରେ କାହାର ଜୀବନହାନୀ ହୋଇନଥିବା ସୂଚନା ମିଳିଥିବା ବେଳେ ଅଳ୍ପକେ ଏକ ବଡ଼ ଦୁର୍ଘଟଣା ଏଡାଇ ଦିଆଯାଇଛି । ଆହତଙ୍କୁ ୧୦୮ ଆମ୍ବୁଲାନ୍ସ ଯୋଗେ AIIMS ଋଷିକେଶକୁ ସ୍ଥାନାନ୍ତରଣ କରାଯାଇଛି । କିଭଳି ବସଟି ଦୁର୍ଘଟଣା ଘଟିଲା, ତାହା ପୋଲିସ ତଦନ୍ତ ଆରମ୍ଭ କରିଛି । ଉତ୍ତରାଖଣ୍ଡରେ ବରମ୍ବାର ଏଭଳି ଦୁର୍ଘଟଣା ବାରମ୍ବାର ଘଟୁଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ପୋଲିସ ଦୁର୍ଘଟଣାଗ୍ରସ୍ତ ବସକୁ ଜବତ କରି ତଦନ୍ତ ଚଳାଇଛି ।
ପ୍ରକାଶ ଯୋଗ୍ୟ, ଗତକାଲି ହିମାଚଳ ପ୍ରଦେଶ କାଙ୍ଗଡା ଟନେଲ ନିକଟରେ ଓଲଟିଥିଲା ତୀର୍ଥଯାତ୍ରୀ ବସ୍ । ଏଥିରେ 52 ଜଣ ଶ୍ରଦ୍ଧାଳୁ ଯାତ୍ରା କରୁଥିବା ବେଳେ 21 ଜଣ ଆହତ ହୋଇଥିଲେ । ଆହତଙ୍କୁ ତୁରନ୍ତ ଟାଣ୍ଡା ରୋଡ୍ ନିକଟରେ ଥିବା ଡକ୍ଟର ରାଜେନ୍ଦ୍ର ପ୍ରସାଦ ସରକାରୀ ମେଡିକାଲ କଲେଜରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ଏହାର ଗୋଟିଏ ଦୁଇ ଦିନ ପୂର୍ବରୁ ହରିୟାଣାରେ ଘଟିଥିଲା ଭୟଙ୍କର ଦୁର୍ଘଟଣା । ସ୍କୁଲବସ ଓଲଟି ପଡ଼ିବା ଫଳରେ କିଛି କୋମଳମତୀ ଛାତ୍ରଛାତ୍ରୀଙ୍କର ଅକାଳ ବିୟୋଗ ଘଟିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
