ଡେରାଡୁନ: ଦେଶର ପ୍ରଥମ ରାଜ୍ୟ ଭାବେ ବହୁଚର୍ଚ୍ଚିତ ‘ଏକକ ନାଗରିକ ସଂହିତା ବିଲ-2024’ ପାରିତ କରିବାରେ ସଫଳ ହୋଇଛି ଉତ୍ତରାଖଣ୍ଡ । ଗତକାଲି ସ୍ବତନ୍ତ୍ର ଅଧିବେଶନର ଦ୍ବିତୀୟ କାର୍ଯ୍ୟଦିବସରେ ଏହି ବହୁଚର୍ଚ୍ଚିତ ବିଲକୁ ବିଧାନସଭାରେ ଆଗତ କରିଥିଲେ ଧାମି ସରକାର । ଦୁଇଦିନର ଚର୍ଚ୍ଚା ପରେ ଆଜି ଅପରାହ୍ନରେ ଏହି ବିଲ୍ ସଂଖ୍ୟା ବହୁମତରେ ପାରିତ ହୋଇଛି । ଏହାକୁ ପାରିତ କରି ଆଇନରେ ପରିଣତ କରିବାରେ ବିଜେପି ଶାସିତ ଉତ୍ତରାଖଣ୍ଡ ଦେଶର ପ୍ରଥମ ରାଜ୍ୟ ହୋଇଛି । ବିଲ ପାସ ହେବା ପରେ ମୁଖ୍ୟମନ୍ତ୍ରୀ ଧାମି ଏକ ପ୍ରେସମିଟ କରି ଏହି ବିଲ ସମ୍ପର୍କରେ ବିସ୍ତୃତ ତଥ୍ୟ ପ୍ରଦାନ କରିଛନ୍ତି । ଏହି ପଦକ୍ଷେପକୁ ଐତିହାସିକ ବୋଲି କହିଛନ୍ତି । ପରେ ସେ ରୋଡ ସୋ’ ମଧ୍ୟ କରିଛନ୍ତି ।
ଉତ୍ତରାଖଣ୍ଡର ଧାମି ସରକାର ସର୍ବୋଚ୍ଚକୋର୍ଟଙ୍କ ଅବସରପ୍ରାପ୍ତ ବିଚାରପତି ରଞ୍ଜନା ପ୍ରକାଶ ଦେସାଇଙ୍କ ନେତୃତ୍ୱରେ ୟୁନିଫର୍ମ ସିଭିଲ କୋଡ (ୟୁସିସି) କାର୍ଯ୍ୟକାରିତା ନେଇ ଏକ 5ଜଣିଆ ଉଚ୍ଚସ୍ତରୀୟ କମିଟି ଗଠନ କରିଥିଲେ । ଏହି କମିଟି ଏହି ନିୟମକୁ ଲାଗୁ କରିବାର ସମସ୍ତ ଦିଗ ଉପରେ ଅନୁଧ୍ୟାନ କରିଥିଲା । ଏହା ପରେ ଏକ ଡ୍ରାଫ୍ଟ (ଚିଠା ପ୍ରସ୍ତାବ) ପ୍ରସ୍ତୁତ କରାଯାଇ ମୁଖ୍ୟମନ୍ତ୍ରୀ ଧାମିଙ୍କ କାର୍ଯ୍ୟାଳୟରେ ଦାଖଲ କରିଥିଲା କମିଟି । ଚଳିତ 5 ତାରିଖରେ ରାଜ୍ୟ ବିଧାନସଭାର ସ୍ବତନ୍ତ୍ର ଅଧିବେଶନ ଆରମ୍ଭ ହେବା ପୂର୍ବରୁ ଏହାକୁ କ୍ୟାବିନେଟ ମଞ୍ଜୁରୀ ମିଳିଥିଲା । ଗତକାଲି ଏହି ବିଲ୍ ଗୃହରେ ଆଗତ ହେବା ପରେ ଦୁଇଦିନ ଏହା ଉପରେ ସରଗରମ ଚର୍ଚ୍ଚା ହୋଇଥିଲା । ଆଜି ଭୋଟିଂ ମାଧ୍ୟମରେ ଏହା ପାରିତ ହୋଇଛି ।
ଏହି ବିଲରେ ରାଜ୍ୟରେ ବସବାସ କରୁଥିବା ସବୁ ଧର୍ମାବଲମ୍ବୀଙ୍କ ପାଇଁ ବିବାହ, ବିବାହ ବିଚ୍ଛେଦ, ମାଲିକାନା ସ୍ୱତ୍ତ୍ବ ଓ ଲିଭ-ଇନ ରିଲେସନସିପ ପରି କ୍ଷେତ୍ର ସମ୍ପର୍କରେ ସ୍ପଷ୍ଟ ପରିଭାଷା ଓ ନୂତନ ନିୟମ ରହିଛି । କୌଣସି ପ୍ରକାର ଧର୍ମୀୟ ନିୟମ ଅନୁସାରେ, ବିବାହ କିମ୍ବା ଛାଡପତ୍ର ହୋଇପାରିବ ନାହିଁ । ଏହି ସବୁ ମାମଲାରେ ନ୍ୟାୟିକ ବ୍ୟବସ୍ଥା ହିଁ ନିର୍ଣ୍ଣାୟକ ହେବ । କୌଣସି ସମ୍ପ୍ରଦାୟ କ୍ଷେତ୍ରରେ ପୂର୍ବରୁ ଲାଗୁ ହେଉଥିବା ଧାର୍ମିକ ଆଇନ ସମ୍ପୂର୍ଣ୍ଣ ବେଆଇନ ହୋଇଯିବ ।
ଏହା ମଧ୍ୟ ପଢନ୍ତୁ :- Uniform Civil Code: ୟୁସିସି ଲାଗୁ କରିବାରେ ପ୍ରଥମ ରାଜ୍ୟ ହେବ ଉତ୍ତରାଖଣ୍ଡ !
ସେହିପରି ସବୁଠାରୁ ଅଧିକ ଚର୍ଚ୍ଚାରେ ଲିଭ-ଇନ ରିଲେସନସିପ ବା ବିନା ବିବାହରେ ଏକତ୍ର ରହିବା ପ୍ରସଙ୍ଗରେ ଥିବା ନିୟମ ରହିଛି । ଏଥିପାଇଁ ଗୋପନୀୟତା ବଜାୟ ରଖିବା ଅପରାଧିକ ଶ୍ରେଣୀଭୁକ୍ତ ହେବ । କେହି ପ୍ରାପ୍ତବୟସ୍କ ଯୁବକ-ଯୁବତୀ କିମ୍ବା ପୁରୁଷ ମହିଳା ଲିଭ-ଇନରେ ରହିଲେ, ସେମାନଙ୍କୁ ପଞ୍ଜୀକରଣ କରିବାକୁ ହେବ । ଜିଲ୍ଲା ପ୍ରଶାସନ ନିକଟରେ ଏହି ପଞ୍ଜୀକରଣ କରିବାକୁ ପଡିବ । ବିନା ପଞ୍ଜୀକରଣରେ ଏକତ୍ର ରହିବାକୁ ବେଆଇନ ଓ ଅପରାଧ ଶ୍ରେଣୀଭୁକ୍ତ କରାଯାଇଛି । ଏଥିପାଇଁ 3 ମାସ ପର୍ଯ୍ୟନ୍ତ ଉଭୟଙ୍କୁ ଜେଲ ଦଣ୍ଡ ମଧ୍ୟ ହୋଇପାରେ । ସେହିପରି ସମସ୍ତ ଧର୍ମ ପାଇଁ ବହୁବିବାହକୁ ସମ୍ପୂର୍ଣ୍ଣ ନିଷେଧ ଘୋଷଣା କରାଯାଇଛି । ଏହା ଏକ ସ୍ପଷ୍ଟ ଅପରାଧିକ ଶ୍ରେଣୀଭୁକ୍ତ କରାଯାଇଛି ।
ବ୍ୟୁରୋ ରିପୋର୍ଟ,ଇଟିଭି ଭାରତ
